Kigali: Herekanywe ibikibangamiye iterambere ry’Umunyarwandakazi mu ikoranabuhanga
Amakuru

Kigali: Herekanywe ibikibangamiye iterambere ry’Umunyarwandakazi mu ikoranabuhanga

NTAWITONDA JEAN CLAUDE

January 11, 2023

Kutabona ubushobozi bwo kubona ibikoresho by’ikoranabuhanga, ubumenyi bukiri hasi mu mikoreshereze yabyo ndetse n’ imyumvire ya bamwe,  ni bimwe mu bikibangamiye iterambere ry’Umunyarwandakazi mu ikoranabuhanga.

Izi mbogamizi zagarutsweho ubwo abahagarariye inzego zitandukanye zirimo Minisiteri y’Uburinganire n’Iterambere ry’Umuryango (MIGEPROF), abafatanyabikorwa  n’Ishami ry’Umuryango w’Abibumbye ryita ku iterambere ry’umugore  (UN Women/Rwanda), bari mu nama nyunguranabitekerezo ku mibereho y’umugore, by’umwihariko ibirebana n’imikoreshereze y’ikoranabuhanga.

Muri iyi nama yabereye i Kigali uyu munsi ku wa 11Mutarama 2023, umwe mu bayitabiriye Ingabire Marie Immaculée  Umuyobozi w’Umuryango   “Transparency International Rwanda”  (TI-Rwanda), yagaragaje uko abona  Umunyarwandakazi ahagaze ubu  mu gukoresha ikoranabuhanga rifatwa nk’imwe mu nzira zo kwihutisha iterambere.

Mu kiganiro n’itangazamakuru, yagize ati: “Ntabwo ahagaze neza, ikoranabuhanga ubundi ni kimwe mu bintu bituma abantu batera imbere, kugira ngo urikoreshe kandi neza birasaba ibintu bitatu abagore batarageraho; icya mbere birasaba kuba ujijutse ukoresha n’ururimi rurenze rumwe, rurenze Ikinyarwanda, abagore b’Abanyarwandakazi bafite ubwo bushobozi si benshi”.

Yakomeje agaragaza ko icya kabiri ari ukugira  ibikoresho by’ikoranabuhanga. Ati: “Abanyarwandakazi ubungubu bafite telefoni zigezweho ntabwo baragera kuri 20%, urumva ko ari bake cyane. Mudasobwa yo ntuyivuge, yo ishobora kuba ifitwe na 5% niba ntakabije, ariko icyo nzi cyo si benshi”.

Ati: “Benshi mu ngo z’u Rwanda, bamwe bakoresha imirasire y’izuba…, mbese bya bintu bitaguha amashanyarazi ahoraho, ibyo rero bikaba ikibazo. Birasaba n’umwanya, iyo uroye inshingano z’umugore ntabwo zimwemerera   kuba yakoresha ikoranabuhanga cyane, ndavuga Umunyarwandakazi”.

Ku birebana n’icyakorwa mu guhangana n’izo mbogamizi kugira ngo ziveho, Ingabire Marie Immaculée   asanga   bisaba ubufatanye bw’inzego zose, kandi ubushake bwa Politiki bwo buhari.

Uwamaliya Madeleine wo mu Karere ka Kicukiro ni umwe mu baturage baganiriye n’Imvaho Nshya ku bijyanye n’ikoranabuhanga, yavuze  ko ubumenyi amaze kugira mu ari ubwo gukoresha telefoni ngendanwa.

Ati: “Icyo nzi ni ugukoresha telefoni ngahamagara abantu nkaba naboherereza n’ubutumwa, ariko nta kindi wambaza, urabona ko mfite isanzwe, igezweho yo isaba ubundi bushobozi ntarabasha kugeraho, umunsi nayobonye wenda nzamenya n’irindi koranabuhanga ryisumbuyeho […], mudasobwa yo nta na duke nyiziho ni ukuyibona gutyo, uwabashije kwiga cyane buriya ni we wabimenya”.

Ingabire Marie Immaculée Umuyobozi w’Umuryango Transparency International Rwanda

MIGEPROF igaragaza ko nubwo hakiri inzitizi ariko hari intambwe nziza yatewe.

Umunyamabanga Uhoraho muri iyi Minisiteri   Batamuliza Mireille yagize ati: “Navuga ko tudahagaze nabi, niba duhereye ku gutunga ibikoresho by’ikoranabuhanga, abagore ntabwo basigajwe inyuma ndetse hari na gahunda za Leta zagiye zizamura uwo mubare, tugenda tubona ko abagore n’abakobwa badasigara inyuma mu ikoranabuhanga. Hari ibindi navuga bijyanye n’uburezi, ku mubare w’abiga Siyansi ndetse no gukoresha iryo koranabuhanga; hari imishinga itandukanye ikangurira urubyiruko kwinjiramo no gushaka ibisubizo  bakoresheje ikoranabuhanga”.

Yongeyeho ati: “Uyu munsi tumaze kubona abagore mu byiciro bitandukanye bakoresha ibyo bikoresho by’ikoranabuhanga bakabikoresha neza bikabyara imishinga ibabyarira inyungu”.

Avuga ko abageze kuri urwo rwego ari icyitegererezo mu guhindura imyumvire ifitwe na bamwe muri sosiyete ikumira umukobwa kwiga siyansi, ikoranabuhanga,…babumvisha  ko ari ibintu bikomeye batabasha.

Ibi binashimangirwa na Jennet Kem uhagarariye UN Women mu Rwanda aho avuga ko binyuze muri gahunda  yo guhugura abana b’abakobwa mu ikoranabuhanga ubu hari  abamaze kuba ba rwiyemezamirimo bakomeye.

Iyi nama nyunguranabitekerezo ibaye mu rwego rwo gutegura indi ibera i New York buri mwaka itegurwa n’Umuryango w’Abibumbye mu rwego rwo kureba ibibazo bikibangamiye iterambere ry’umugore bigashakirwa  ibisubizo. Iy’uyu mwaka ikaba iteganyijwe ku wa 6-17Werurwe.

Insanganyamatsiko yaganiriweho n’iyo kuzamura umubare w’abagore n’abakobwa mu bijyanye no kugera ku ikoranabuhanga no kugira ibikoresho byaryo haba ku bagore bize n’abatarize, abari mu mijyi no mu cyaro.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA