Kimironko: Abahoze ari abazunguzayi bibukijwe ko umwana urezwe neza ari we gihugu
Imibereho

Kimironko: Abahoze ari abazunguzayi bibukijwe ko umwana urezwe neza ari we gihugu

Imvaho Nshya

September 15, 2023

Nyiramasengesho Jeannette, Umuyobozi Mukuru wa Sendika y’abakozi bakora imirimo itanditse, avuga ko umwana wahawe uburere kandi akagaburirwa neza ari we gihugu.

Yabigarutseho ubwo iyi Sendika yasuraga abahoze ari abazunguzayi bakorera mu isoko ryubakiwe abazunguzayi mu Murenge wa Kimironko mu Karere ka Gasabo no kureba niba bita ku mikurire y’abana babo.

Ni igikorwa cyahuriranye no kugaburira abana indyo yuzuye mu rwego rwo kurwanya indwara ziterwa n’imirire mibi.

Nyiramasengesho yagize ati “Umwana urezwe neza, agakura neza, ni we gihugu kandi ni we dutezeho byinshi”.

Asobanura ko ari yo mpamvu bahisemo gusura ababyeyi bakorera muri iri soko by’umwihariko muri gahunda yo gusangira n’abana, kureba uko abana bitabwaho, uko bagaburirwa ariko ngo no gushishikariza ababyeyi kwita ku mirire y’abana babo.

Ubuyobozi bwa Sendika bwishimira ko abana bubakiwe Irerero kugira ngo ababyeyi bajye bakorera mu isoko ariko n’abana bari mu Irerero.

Umuyobozi Mukuru wa Sendika akomeza agira ati “Nta mpamvu yo kubasiga mu rugo, umwana ugasanga bamusize mu baturanyi, bamureresheje mukuru we, mukuru we ntashobore kujya kwiga, biriya ntabwo ari byo.

Turabakangurira ko bazana abana babo, bakabashyira mu Irerero kandi noneho bakita no ku mirire yabo”.

Uwamahoro Rosine wahoze azunguza imyenda muri Kimironko ubu akaba acuruza boda boda n’imyenda, yabwiye Imvaho Nshya ko kuba abana babo bahawe indyo yuzuye ari ibintu bishimiye.

Agira ati “Natwe bituma tubasha kumenya ngo tuzajya dutekera abana bacu gute, iby’ingenzi ni ibingibi ku buryo badashobora guhura n’uburwayi buterwa n’imirire mibi”.

Mu buhamya bwe, Uwamahoro agaragaza ko mbere agicururiza mu mihanda hari igihe saa Sita atagaburiraga umwana we ariko ubu bicaye hamwe batekanye.

Ati “Turateka tukazana ibiryo, bakarya, bakarira igihe. Ntakwirukanka, umuntu aba yicaye atuje n’umwana agatuza.

Ndi mu muhanda hari igihe saa Sita umwana wanjye ataryaga cyangwa akarya nk’ako kabuto, twabaga turi mu miguruko gusa ugasanga umwana ntabayeho neza”.

Uwonkunda Apolline na we wahoze ari umuzunguzayi avuga ko kuba abana babo bagaburirwa, bituma abana bahura bagahuza urugwiro kandi bahabwa indyo yuzuye ibyo ngo bigatuma bamererwa neza mu buzima bwa buri munsi.

Yagize ati “Tukizunguza ntabwo byari byiza cyane ko hari n’abatari bafite ikibazo bitewe nuko bari bafite ababasigaranira abana ariko n’abari bafite ikibazo ubu bahuye n’abandi nta kibazo bagifite”.

Komezusenge Chantal, umwe mu bahoze ari abazunguzayi mu Murenge wa Kimironko, avuga ko ubuzima bwari bukomeye kuko abana birirwaga babirukankana mu mugongo.

Akomeza agira ati “Bagaburiye abana bacu indyo yuzuye. Tuba twumva dufite ibyishimo dukurikije ukuntu Leta iba itwitayeho.

Tunashimira Sendika yaje ikatugaburira abana bacu indyo yuzuye”.

Ashima ko bubakiwe isoko ikindi kandi hakanubakwa Irerero ry’abana rizatangira mu kwezi kwa Nzeri.

Sendika y’abakozi bakora imirimo itanditse, isanzwe ihugura abahoze ari abazunguzayi, ikanigisha uburenganzira abacuruzi bakora ubucuruzi butanditse.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA