Korali Ambasadors of Christ ibarizwa mu Itorero ry’Abadiventisiti b’Umunsi wa Karindwi rya Remera, yakoze indirimbo nshya bise ‘Ninde Utagushima’ abayigize bagaragaza ko bashima Imana yabandikiye amateka mu myaka isaga 30 ishize bakora umurimo w’Imana.

Iyo ndirimbo iteguwe mu njyana gakondo, ikomeje gushimisha abakunzi babo kuko bahuje inganzo yabo bashima Imana ariko banimakaza umuco nyarwanda. Indirimbo isohotse mu gihe abagize iyo  Korali n’abakunzi bayo bakomeje kwitegura igitaramo cyo gushima Imana bizihiza iyo myaka bamaze babayeho gitegerejwe muri BK Arena ku ya 30 Kanama 2026. 

Ni indirimbo yageze kuri YouTube yabo tariki 17 Nyakanga 2026, bayivugaho ku wa 19 Nyakanga 2026. Mu butumwa bwaherekeje iyo ndirimbo iyo Korali  yasobanuye icyabateye gukora iyo ndirimbo, n’impamvu bahisemo kuyikora mu njyana gakondo ndetse bakambara imikenyero.

Umwe mu bagize iyo Korali yagize ati: “Nshuti zacu, Korali Ambassadors of Christ twabateguriye indirimbo yitwa Ni nde Utagushima. Twaririmbye injyana nyinshi mu ndimi zitandukanye ariko twabateguriye indirimbo iri mu njyana nyarwanda. Kuko ariyo soko y’amateka yacu, muzaze dufatanye gushima iyatwandikiye amateka nk’aya atangaje.”

Ambassadors of Christ Choir ni Korali yashinzwe mu 1995, ubu ikaba imaze imyaka isaga 30 ikora umurimo wo kwamamaza ubutumwa bwiza binyuze mu ndirimbo. Iyi Korali yavutse nyuma y’igihe gito u Rwanda rubohowe hanahagaritswe Jenoside yakorewe Abatutsi mu 1994, ikaba ishimirwa umusanzu ukomeye yagize mu isanamitima rishingiye ku iyobokamana. 

Nk’uko izina ryayo ribivuga, urubyiruko rwatangije iyo Korali rwari rufite intego yo kuba Intumwa za Yesu Kirisito bamamaza ubutumwa bwiza no gukomeza abizera barimo n’abafite imitima itentebutse. Imirimo ya Korali yarenze imipaka, bakomeza kwagurira umurimo w’Imana mu Karere no hanze yako ari na ko bakora indirimbo mu ndimi zumvwa n’abaturanyi ndetse n’amahanga yose muri rusange. 

Kugeza uyu munsi, iyi korali imaze gukorera ibitaramo mu bihugu birimo Uganda, Kenya, Tanzania, u Burundi, Zambia, Afurika y’Epfo, Leta Zunze Ubumwe za Amerika, Canada na bimwe mu bihugu byo ku mugabane w’u Burayi. 

Yanditswe na NIYIRORA Théogène

Ba uwa mbere mu kumenya amakuru agezweho!!!