Ikipe ya  Black Scorpion yo mu Karere ka Kayonza  ni yo yegukanye irushanwa ry’abakiri bato mu mukino njyarugamba  wa Kung Fu Wushu  “National Junior Wushu Championships 2022” ryabereye mu Karere ka Ngoma  taliki 14 Kanama 2022.

Iri rushanwa ryari ribaye ku nshuro ya kabiri ryateguwe n’ishyirahamwe ry’umukino wa Kung Fu Wushu mu Rwanda “RKWF” mu rwego rwo gufasha abakiri bato kwimenyereza uyu mukino no kuzamura impano zabo.

Muri rusange ryitabiriwe n’abana 108 bafite hagati y’imyaka 4 na 15 barimo 40 b’abakobwa na 68 b’abahungu baturutse mu makipe 17. Aba bakinnyi  bahatanye mu kwiyereka “Taolu” mu byiciro bitandukanye by’imyaka  harimo abafite hagati y’imyaka 4 na 7, abafite hagati ya 8 na 10 n’abafite hagati y’imyaka 11 na 15.

Nyuma yo guhatana, ikipe ya Black Scorpion mu Karere ka Kayonza ni yo yitwaye neza yegukana umwanya wa mbere.

Perezida wa RKWF, Uwiragiye Marc yatangaje ko irushanwa muri rusange ryagenze neza kandi ryitabiriwe ku bwinshi bikaba bitanga icyizere cy’ejo hazaza heza h’uyu mukino.

Agaruka ku bwitabire yagize ati: “Amakipe 17 muri 31 ni yo yitabiriye,  mwabonye ko hari n’ikipe yavuye i Rubavu ikaza i Ngoma , ibi biragaragaza  ko bafite ishyaka n’umurava.”

Mu bakinnyi bitabiriye harimo 40 b’abakobwa, aha Perezida wa RKWF, Uwiragiye avuga ko bishimiye ubu bwitabire kuko bigaragaza iterambere ry’umukino  mu byiciro byose.

Akomeza avuga ko  intego bafite ari ugutangiza uyu mukino mu mashuri ndetse bakajya banategura amarushanwa ahuza amashuri atari ibi bisanzwe by’amakipe. Ati : “Ibi nitubigeraho ni ho tuzavuga ko ibyo twiyemeje tubigezeho, biragoye kuko  bisaba umuhate no kwitanga ariko turizera ko bizakunda.”

Umuyobozi  w’Akarere ka Ngoma, Niyonagira Nathalie  yashimiye RKWF kuba barahisemo aka Karere kugira ngo habere  iri rushanwa kandi ko hasanzwe hari n’ikipe n’ubwo uyu mwaka ititwaye neza.

Yakomeje avuga ko biteguye gutanga ubufasha bushoboka kugira ngo uyu mukino utere imbere  mu Karere n’ahandi hose.

Umuyobozi muri Minisiteri ya Siporo “MINISPORTS” ushinzwe ingaga n’amashyirahamwe y’imikino, Habyarimana Florent yatangaje ko bishimiye uruhare rwa RKWF mu guteza imbere impano z’abana.

Yagize ati : “Biragaragara  ko iterambere  rya siporo rigomba gushingira ku bakiri  bato, iki gikorwa ni cyiza kuko cyatumye tubona ko hari impano. Nka Minisiteri rero tuzakomeza gushyigikira RKWF muri ibi bikorwa bigamije iterambere rya siporo mu bakiri bato.”

Amakipe 17 yitabiriye

Aya makipe  ni Tsen Sport, Tiger Wushu, Muhanga Shaolin Tiger, Rwamagana Chin woo, Ging Hu Kabuga, Chow Gar Mantis, Chin woo orgasation, Musanze Shaolin Temple, Angel Kung-fu Club, Black eagle Ngoma, Black Scropion Kayonza, Gasabo Wushu, Lion Wushu Nyagatare, Mahoko Kung fu Wushu, Ryabizige Wushu Club, Rubavu Wushu na Dragon Wushu Batsinda.

Ubwo iri rushanwa ryabaga  ku nshuro ya mbere muri Nyakanga 2019 ryabereye mu  Kigo cy’Urubyiruko ku Kimisagara  ryitabirwa n’abana 175 baturutse mu makipe 15. Aba bana barimo abahungu 111  n’abakobwa 64.

Ikipe ya  Black Eagle yo mu Karere ka Ngoma ni yo yitwaye neza yegukana imidali 16 ikurikirwa na Black Scorpion yo mu Karere ka Kayonza  yegukanye imidali 15 mu gihe ikipe ya 3 yabaye Mantis Academy ibarizwa mu Mujyi wa Kigali yegukanye imidali 9.

Amafoto

Ba uwa mbere mu kumenya amakuru agezweho!!!