“Kwibuka Jenoside yakorewe Abatutsi ni inshingano za buri Munyarwanda”
Amakuru

“Kwibuka Jenoside yakorewe Abatutsi ni inshingano za buri Munyarwanda”

NTAWITONDA JEAN CLAUDE

June 22, 2023

Ku gicamunsi cyo ku wa Gatatu, ku Biro by’Akarere ka Kayonza habereye igikorwa cyo Kwibuka ku nshuro ya 29 abahoze ari abakozi b’izari Komini Rukara, Kabarondo, Muhazi bazize Jenoside yakorewe Abatutsi mu 1994.

Ni igikorwa cyitabiriwe n’ubuyobozi n’Abakozi b’Akarere, IBUKA, inzego z’Umutekano, n’abahagarariye imiryango yabuze ababo. Mu butumwa bwahatangiwe, hibukijwe ko Kwibuka Jenoside yakorewe Abatutsi ari inshingano za buri Munyarwanda.

Ikiganiro ndetse n’ubuhamya byatanzwe muri iki gikorwa byibanze ku mateka y’ingengabitekerezo ya Jenoside yigishijwe Abanyarwanda mbere ya Jenoside yakorewe Abatutsi mu 1994.

Mu ijambo rye, Umuyobozi wa IBUKA ku rwego rw’Akarere Ndindabahizi Didas, yashimye ingabo za RPA Inkotanyi zahagaritse Jenoside yakorewe Abatutsi mu 1994.

By’Umwihariko yashimye Leta y’u Rwanda yimakaje imiyoborere myiza ihuza Abanyarwanda ndetse no ku nyigisho z’urukundo zigishijwe Abanyarwanda bakaba babanye mu mahoro.

Yasabye Abarokotse Jenoside yakorewe Abatutsi gukomera bakumva ko ibihe bibi baciyemo byarangiye ahubwo ko bagomba kwiyubaka bakumva ko bagomba kuba mu mwanya w’abataragize amahirwe yo kurokoka Jenoside yakorewe Abatutsi.

Mu butumwa yagejeje ku bitabiriye igikorwa cyo kwibuka ku nshuro ya 29 abari abakozi b’Amakomini yahujwe akaba Akarere ka Kayonza, Umuyobozi w’Akarere John Bosco Nyemazi, yagize ati:”Uyu munsi turibuka abari abakozi ba Komini zahujwe zikavamo Akarere ka Kayonza ari zo Rukara, Kabarondo na Muhazi”.

Yongeyeho ati: “Kwibuka Jenoside yakorewe Abatutsi ni inshingano za buri Munyarwanda kandi bizahoraho kuko ikigamijwe ni ukwigisha cyane cyane urubyiruko ububi bwa Jenoside no guharanira ko itazongera kubaho ukundi.

Abanyarwanda, by’umwihariko urubyiruko, dufite inshingano zo kwigira ku mateka no kubungabunga ubumwe bw’Abanyarwanda bwo musingi w’iterambere rirambye.”

Yasoje ubutumwa bwe asaba abitabiriye iki gikorwa kwimakaza umuco w’amahoro, kwamagana ibikorwa byose ndetse n’amagambo agaragaramo guhembera ingengabitekerezo ya Jenoside. 

Hanagabiwe inka umwe mu miryango yarokotse Jenoside yakorewe Abatutsi mu 1994.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA