Leta, FERWABA na Orion BBC mu bukangurambaga bwo kurengera ibidukikije
Amakuru

Leta, FERWABA na Orion BBC mu bukangurambaga bwo kurengera ibidukikije

Imvaho Nshya

September 29, 2023

Ministeri y’Ibidukije (MoE) ifatanyije n’Ikipe ya Orion BBC ibarizwa mu cyikiro cya mbere muri shampiyona ya Basketball mu bagabo batangije ubukanguramba bwiswe “One shot one Tree Green Campaign” bugamije kurengera ibidukikije no kubaka ubudahangarwa ku mihindagurikire y’ibihe.

Muri iyi gahunda yiswe “One Shot, One Tree Green Campain” abakinnyi ba Basketball bazafatanya n’abandi mu gutera ibiti bingana na miliyoni 100 nk’uko biri mu ntego ya Minisiteri y’Ibidukije hagamijwe kongera amashyamba.

Minisitiri w’Ibidukije Dr Mujawamariya Jeanne d’Arc, avuga ko ubu  bukanguramba buzafasha igihugu kongera amashyamba.  

Yagize ati: “Ubu bukangurambaga bugiye kudufasha gukangurira abantu bose kugira uruhare mu gutera igiti kugira ngo intego twihaye yo kugira amashyamba tuyingereho.” 

Uyu mushinga wateguwe n’Ikipe ya Orion BBC ikina muri Shampiyona y’Icyiciro cya mbere mu Rwanda, iwugeza kuri FERWABA ndetse na minisiteri y’ibidukije.

Umuyobozi wa Orion BBC Mutabazi James, yavuze ko n’ubundi iyi kipe yaje ifite intego yo gukora ibindi bikorwa bitari Basketball ariko bizagirira akamaro abaturage, iki kikaba ari igitekerezo cyaje mu rwego rwo kurwanya ihindagurika ry’ikirere ryugarije Isi.

Ati: “Basketball ntabwo ari umukino gusa. Ihindagurika ry’ikirere ni kimwe mu bintu bihangayikishije Isi. Kuri ubu, Isi yose ubu iri mu bukangurambaga kugira ngo irebe ko ikirere kitagumya kwangirika ngo gihangayikishe Isi.”

Yakomeje avuga ko bifuza gukoresha izina bafite bakomora kuri Basketball, ubumenyi n’imbaraga zabo haterwa ibiti byinshi bishoboka mu kurwanya ihindagurika ry’ikirere.

Ati: “Turashaka gukoresha izina dufite, ubumenyi dufite turwanye iri hindagurika dutera ibiti byinshi bishoboka, kuri gahunda ni ugutera ibiti ibihumbi 100, tumenye neza ko inota ritsinzwe muri Basketball ari igiti gitewe. Intego nta yindi ni ukurwanya imihindagurikire y’ikirere.”

Muri iyi gahunda kandi hazaba irushanwa ryiswe “One Shot One Tree Green Tournament” aho hazaterwa ibiti bingana n’umubare w’amanota azinjizwa muri iryo rushanwa.

Iri rushanwa rizaba mu byiciro by’abagabo n’abagore rizitabirwa n’amakipe atandatu ya mbere muri Shampiyona ndetse nandi makipe abiri y’i Burundi

Ikipe ya mbere izahembwa ibihumbi 20 by’amadolari y’Amerika ni ukuvuga amafaranga y’u Rwanda asaga miliyoni 20, ni mu gihe umukinnyi uzitwara neza (MVP) azahembwa imodoka yo mu bwoko bwa SUV ikoresha amashanyarazi.

Biteganyijwe ko iri rushanwa rya “One Shot One Tree Green Tournament” rizatangira tariki 5 rikazageza ku ya 12 Ugushyingo 2023.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA