Leta yashyize igorora abatazi gusoma no kwandika bahabwa smartphones
Amakuru

Leta yashyize igorora abatazi gusoma no kwandika bahabwa smartphones

Imvaho Nshya

October 17, 2023

Minisiteri y’Ikoranabuhanga no guhanga Ibishya (MINICT) yatangaje ko Leta yashyizeho Intore mu ikoranabuhanga, abarimu bahugura  abatazi gusoma no kwandika, gukoresha telefoni zigezweho (smartphones), mu rwego rwo guharanira ko buri Munyarwanda wese aryoherwa n’inyungu zitanga.

Abo barimu ni urubyiruko rwahawe akazi kugira ngo ruhugure abo bantu batazi gusoma no kwandika ku bumenyi bw’ibanze bwo gukoresha telefoni zigezweho no gukoresha ikoranabuhanga rigezweho muri rusange.

Abo barimu batangiye ari 100 mu Mirenge itandukanye mu Gihugu, ariko kuri ubu hongeweho abandi barenga 1000 nyuma y’uko Leta y’u Rwanda n’abafatanyabikorwa batandukanye bakomeje gahunda ya Connect Rwanda yo kugeza smartphones mu ngo z’Abanyarwanda bose, mu gihe intego ari iyo kugeza izo telefoni ku Banyarwanda 100% bitarenze mu 2027.

Muri abo bafatanyabikorwa harimo Ikigo cy’Itumanaho Airtel Rwanda cyiyemeje gutanga telefoni zigezweho zifata umuyoboro wa internet inyaruka ya 4G zigura amafaranga y’u Rwanda 20,000.

Kalema Goldon Umuyobozi Mukuru ushinzwe Ikoranabuhanga muri Minisiteri y’Ikoranabuhanga no guhanga Ibishya (MNIICT), yijeje Abanyarwanda batazi gusoma no kwandika ko bashyiriweho uburyo bwiza bwo kubigisha gukoresha ikoranabuhanga.

Kalema Goldon amara impungenge ko icyo bagitekerejeho bagishakira igisubizo. Ati: “Twatekereje gushyiraho Intore mu ikoranabuhanga, abo ni urubyiruko rwahawe akazi bahemberwa bashyizwe mu Mirenge hirya no hino, akazi kabo ni uguhugura abaturage kugira ngo bagire ubumenyi bw’ibanze mu gukoresha ikoranabuhanga.”

Ibarura Rusange ry’abaturage n’imiturire riheruka ryagaragaje ko ingo 24% gusa ari zo zirimo nibura telefoni imwe igezweho hakaba hari ingamba z’uko bitarenze mu mwaka wa 2027 telefoni zigezweho zizagera mu ngo zose 100%.

Imibare itangwa na MINICT muri ubu umuyoboro wa internet wa 2G na 3G uri hejuru ya 90% mu gihe ugera ku baturage bari hejuru ya 92.6%.

Umuyoboro wa 4 bivugwa ko umaze kugezwa ku kigero cya 95.2% mu gihugu hose ndetse ukaba ushobora kugera ku baturage bangana na 97.2%.

Kuri ubu abakoresha internet mu gihugu babarirwa ku kigero cya 58.3% mu gihe 16% ari bo bakoresha umuyoboro wa 4G.

Raporo ya vuba ya RURA igaragaza ko abatunze telefoni zigendanwa muri rusange babarirwa ku kigero cya 78.8% aho abasaga miliyoni 9.5 bazikoresha mu buzima bwabo bwa buri munsi.

KAMALIZA AGNES

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA