Loni yeretswe Ingufu Perezida w’Angola ashyira mu guhuza RDC n’u Rwanda
Amakuru

Loni yeretswe Ingufu Perezida w’Angola ashyira mu guhuza RDC n’u Rwanda

Imvaho Nshya

July 21, 2023

Francisco da Cruz, Intumwa y’igihugu cy’Angola mu Muryango w’Abibumbye (Loni), yavuze ku mbaraga za Perezida wa Angola João Lourenço ashyira mu guhosha umwuka mubi uri hagati ya Repubulika Iharanira Demokarasi ya Congo (RDC) n’u Rwanda.

Yabigarutseho ku wa Gatatu taliki 19 Nyakanga 2023, i New York muri Leta Zunze Ubumwe z’Amerika, ku cyicaro gikuru cy’Umuryango w’Abibumbye.

Ni mu gihe Ingabo za RDC (FARDC) kuri uyo munsi zasakaje ikinyoma ko Ingabo z’u Rwanda zitegura kugaba igitero ku butaka bwa RDC, na zo zikavuga ko zizagaba igitero ku Rwanda. Guverinoma y’u Rwanda yanenze RDC yifashishije ikinyoma mu gushaka kugaragaza

Perezida wa Angola, João Manuel Gonçalves Lourenço, asanzwe ari n’umuhuza mu bibazo by’u Rwanda na RDC, bishingiye ku kuba ubuyobozi bw’icyo gihugu cy’abaturanyi bwihunza inshingano zo kugarura amahoro bugashinja u Rwanda kuba nyirabayazana w’ibyo bibazo bimaze imyaka ikabakaba 30.

Uyu mudipolomate ubwo yari mu Kanama ka Komite ishinzwe ibihano 1533 kuri DRC, yashimangiye ko mu nshingano za Perezida João Lourenço usanzwe ayobora Umuryango wa ICGLR, kwari uguhuza impande zitumvikana kuva M23 yatangira inzira y’imirwano kandi ikigarurira uduce twinshi muri RDC.

Yavuze ku masezerano y’Angola y’uburyo mu Burasirazuba bwa Congo hakongera kugaruka amahoro, byemejwe ku rwego rwa ICGLR.

Yagize ati: “Uburyo bwashyizweho ni umwanzuro wavugaga ko umutwe wa M23 uva mu bice wafashe ugashyirwa, abawugize bagashyirwa mu kigo gishinzwe gusubizwa mu buzima busanzwe ku butaka bwa RDC.

Ibi bizafasha mu biganiro kugira ngo hagaruke umwuka mwiza mu rwego rwa politiki na dipolomasi hagati ya RDC n’u Rwanda”.

Yongeyeho ko Angola yiyemeje kohereza ingabo (FAA) mu Burasirazuba bwa Repubulika Iharanira Demokarasi ya Congo kugira ngo bacungire umutekano abssivili n’abasirikare ba M23 bazaba basubijwe mu buzima busanzwe.

Ati: “Ni muri urwo rwego taliki 03 Kamena 2023, i Luanda habereye inama idasanzwe ya 10 ya ICGLR yahuje Minisitiri w’Ububanyi n’Amahanga w’ Angola, DRC, uw’u Rwanda n’uw’u Burundi kugira ngo barebere hamwe aho ibyo biyemeje bigeze bishyirwa mu bikorwa”.

Francisco da Cruz yavuze ko Angola izakomeza gufasha mu biganiro bigamije kugarura amahoro mu Burasirazuba bwa Congo no guhamagarira impande zombi gushyira mu bikorwa imyanzuro yafatiwe mu nama zitandukanye kugira ngo habeho amahoro mu Karere.

Inama yabereye i New York yari igamije gutanga ibitekerezo kuri raporo ya nyuma y’impuguke n’ishyirwa mu bikorwa ry’ibihano byafatiwe inyeshyamba zikorera muri Repubulika Iharanira Demokarasi ya Congo, abantu 36 bafatiwe ibihano ndetse n’imitwe 9 yitwaje intwaro.

Mu bihano bafatiwe harimo gufatira imitungo yabo no kubambura uburenganzira bwo gukora ingendo.

Yanditswe na KAYITARE Jean Paul

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA