Lt. Gen Mubarakh Muganga na Maj. Gen. Nyakarundi bakiriwe mu nshingano nshya
Amakuru

Lt. Gen Mubarakh Muganga na Maj. Gen. Nyakarundi bakiriwe mu nshingano nshya

NTAWITONDA JEAN CLAUDE

June 6, 2023

Umugaba Mukuru w’Ingabo z’u Rwanda (CDS) ucyuye igihe Gen. Kazura Jean Bosco yahererekanyije ububasha na Lt. Gen. Mubarakh Muganga waraye agizwe Umugaba Mukuru na Perezida wa Repubulika akaba n’Umugaba w’Ikirenga  w’Ingabo z’u Rwanda, Paul Kagame. 

Kuri uyu wa Kabiriri taliki ya 6 Kamena 2023, ni bwo Lt Gen Mubarakh Muganga na Maj. Gen Vincent Nyakarundi wamusimbuye ku nshingano z’Umugaba w’Ingabo zirwanira ku Butaka (ACOS), bashyikirijwe ibiro bishya mu muhango w’ihererekanyabubasha wabereye ku Birindiro Bikuru by’Ingabo z’u Rwanda (RDF) biherereye ku Kimihurura.

Uyu muhango witabiriwe n’Abajenerari ndetse n’Abasirikare bakuru batandukanye batoranyirijwe guhagararira bagenzi babo.

Bike wamenya ku Mugaba Mukuru mushya wa RDF

Lt. Gen. Muganga afite imyaka 56 y’amavuko, akaba amaze mu gisirikare imyaka irenga 30.

Ni impuguke mu buyobozi aho afite impamyabumenyi y’icyiciro cya Kabiri cya Kaminuza mu bijyanye n’Ubuyobozi (Public Administration), bivuze ko afite ubuhanga mu miyoborere iharanira impinduka nziza n’iterambere. 

Nanone kandi yize n’andi masomo ajyanye n’imiyoborere arimo irirebana n’Ubumenyi bwo Kuyobora yigiye muri Kaminuza ya Gisirikare ya Tsinghua mu Bushinwa, n’andi yihariye kuri Afurika yigiye mu Ishuri Rikuru rya Gisirikare rya Nasser, High War College-Cairo, mu Misiri (Egypt).

Lt. Gen. Muganga yakurikiranye amahugurwa mpuzamahanga atandukanye ya gisirikare arimo aya gisirikare no gutegura intambara muri Kaminuza ya Gisirikare y’Igihugu cy’u Bushinwa, n’amahugurwa ajyanye no gushyigikira ibikorwa byo kubungabunga amahoro yakurikiraniye mu Kigo cy’Amahugurwa ashyigikira Amahoro cyo muri Kenya  

Mu mwaka wa 2006, Lt. Gen. Muganga yahuguwe no ku kuyobora ingabo mu gihugu kigendera kuri demokarasi, isomo yakurikiraniye mu Kigo cy’Amahugurwa ashyigikira Amahoro cyo muri Kenya. 

Mu 2005 na bwo yakurikiranye amahugurwa agenerwa Abagaba b’Ingabo yakurikiraniye i Lusaka muri Zambia. 

Mu busore bwe, ahayinga mu mwaka wa 1988-1989, ni bwo yasoje amasomo ya gisirikare mu mahugurwa yaherewe i Jinja muri Uganda.

Lt. Gen. Muganga yayoboye inzego zinyuranye mu Ngabo z’u Rwanda muri icyo gihe gisaga imyaka 30 y’ubunararibonye mu bya gisirikare. 

Hagati y’umwaka wa 2008 na 2012, yabaye Umuyobozi wa  Diviziyo ya Kane, na ho hagati ya 2013 na 2015 ayobora Diviziyo ya Gatatu.

Hagati y’umwaka wa 2016 n’uwa 2021, Lt. Gen. Muganga yari Umuyobozi wa Diviziyo ya Mbere akaba n’umwe mu bagize Inama y’Ubutegetsi y’Isoko ry’Inzego z’Umutekano (AFOS).

Uyu mugabo yahawe ibihembo n’imidali bitandukanye harimo umudali wo kubohora Igihugu, uwo kurwanya Jenoside, uw’ububanyi n’amahanga impeta y’indwanyi ku rugamba n’ibindi. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA