Menya Budapest, Umujyi u Rwanda rugiye gufunguramo Ambasade
Amakuru

Menya Budapest, Umujyi u Rwanda rugiye gufunguramo Ambasade

NTAWITONDA JEAN CLAUDE

July 18, 2023

Mu gihe u Rwanda rwemeje ko mu bihe bya vuba rugiye gutangiza Ambasade yarwo i Budapest muri Hongiriya, hari amahirwe menshi uwo Mujyi utanga n’amasomo imijyi yo mu Rwanda yakwigiraho mu rwego rw’ubukerarugendo n’udushya dutandukanye mu iterambere.

Budapest ni Umurwa Mukuru wa Hongiriya uza ku mwanya wa cyenda mu mijyi minini yo mu Muryango w’Ubumwe bw’u Burayi, uramutse ushingiye ku mubare w’abaturage bawutuyemo, ukaba n’uwa kabiri mu mijyi ikora ku ruzi rwa Danube.

Uyu mujyi w’ubukerarugendo wifashishijwe n’abakinnyi ba filimi benshi kubera ubwiza bwawo, wakira ba mukerarugendo barenga miliyoni 12 buri mwaka, ukaba ari na wo uza imbere mu mijyi y’i Burayi ikunze gusurwa cyane.

Uyu mujyi uri kuri kilometero kare 525 mu gihe uwa Kigali uri kuri kilometero kare 730, ariko yombi ituwe n’abasaga miliyoni 1.7 kandi yombi ni imijyi ifatwa nk’Umurwa Mukuru, ikabarwa n’Intara ubwayo.

Muri rusange Intara ya Budapest muri rusange iri kuri kilometero kare 7,626 ikaba ituwe n’abaturage basaga miliyoni 3.3 bangana na 33% by’abaturage ba Hongiriya.

Uyu Mujyi ufite byinshi uhuriyeho n’uwa Kigali, harimo kuba ari cyo cyicaro gikuru cya serivisi z’ingenzi mu gihugu uhereye ku rwego rw’amabanki, imiturire, ubucuruzi, ubwikorezi, ubukerarugendo, ikoranabuhanga rigezweho mu isakazamakuru, ibitangazamakuru, iyamamazabikorwa,  serivisi z’ubucamanza, icungamutungo, ubwishingizi, ukagera ku mideli, ubuhanzi n’ubugeni.

Budapest icumbikiye icyicaro gikuru cy’ibigo hafi ya byose bya Leta n’ibigo by’abikorera, n’imiryango itegamiye kuri Leta yaba iyo mu Gihugu n’iyo ku rwego mpuzamahanga.

Ni umujyi ufite amateka ahera mu kinyejana cya cyenda ariko ukaba waramenyekanye cyane mu kinyejana cya 15 ubwo ubucuruzi bwagendaga neza muri uwo mujyi wahuje uwa Obuda n’uwa Pest, aho wabaye Umurwa Mukuru w’ubwami butandukanye kugeza Hongiriya ibaye Repubulika.

Uyu mujyi wakomeye cyane ku rwego mpuzamahanga mu bucuruzi, urwego rw’imari, itangazamakuru, ubuhanzi n’ubugeni, ubushakashatsi, ikoranabuhanga, uburezi n’imyidagaduro ari na yo ituma uwo mujyi ukundwa cyane. 

Umujyi wa budapest usurwa na ba Mukerarugendo barenga miliyoni 12 buri mwaka

Uyu mujyi urangwamo amashuri makuru na kaminuza birenga 40 harimo Kaminuza ya Eötvös Loránd, Kaminuza ya Corvinus, Kaminuza ya Semmelweis, Kaminuza yigisha Ubuvuzi bw’Amatungo ya Budapest na Kaminuza y’ikoranabuhanga n’Ubukungu ya Budapest.

Mu ruzinduko Perezida wa Hongiriya Katalin Éva Veresné Novák arimo mu Rwanda, yakurikiranye isinywa ry’amasezerano y’ubufatanye bw’ibihugu byombi mu rwego rw’uburezi, aho abanyeshuri bo mu Rwanda bongerewe amahirwe ya Buruse muri icyo Gihugu.

Kuri ubu habarurwa abanyeshuri 40 b’Abanyarwanda bakomereje amasomo muri Kaminuza zo muri icyo Gihugu.

Ku rundi ruhande, ba Mukerarugendo bo muri icyo gihugu babona amahirwe yo guhabwa amakarita y’ikoranabuhanga ku buntu abayobora ahantu nyaburanga n’ahari ibirori hose mu Mujyi wa Budapest. Uburyo bw’ingendo rusange bworoshywa na gariyamoshi zifasha abantu bagera kuri miliyoni 2.3 batembera mu mujyi buri munsi. 

Mu Murwa Mukuru, ku nkengero z’uruzi rwa Danube, hashyizwe mu Murage w’Isi wa UNESCO ndetse hakaba hari n’ibibumbano byo mu binyejana bya kera. Uyu mujyi urangwamo amasoko arenga 80 y’amashyuza, inyubako nini ya kabiri y’isinagogi ndetse n’inyubako ya mbere y’Inteko Ishinga Amategeko ku Isi.  

Perezida Kagame yiteguye gusura Budapest

Perezida Kagame yahishuye ko yiteguye gusura Budapest mu minsi iri imbere muri ibi bihe imyiteguro yo gufungura Ambasade igeze kure, bikaba biri mu byo yasezeranyije Perezida Katalin Novák witabiriye inama yiga ku iterambere ry’abagore (Women Deliver 2023) iteraniye i Kigali guhera ku wa 17 ikazageza ku ya 20 Nyakanga 2023.

U Rwanda na Hongiriya byishimira ko umubano urangwa hagati yabyo ukomeje gutera imbere nk’uko bishimangirwa n’amasezerano yashyizweho umukono ku Cyumweru.

Abayobozi bombi bahagarariye isinywa ry’amasezerano arebana no guhugura ndetse no kongera ubumenyi mu bijyanye n’urwego rw’ingufu za nikeleyeri hagamijwe kuzikoresha mu buryo bw’amahoro, ndetse n’arebana n’ubutwererane bujyanye na buruse itangwa na Guverinoma ya Hongiriya (Stipendium Hungaricum).

Perezida Novák yavuze ko yishimiye kuba u Rwanda rugiye gufungura Ambasade i Budapest mu gihe na bo baherutse gufungura Ibiro by’uhagarariye Hongiriya i Kigali.

Yagize ati: “Nishimiye kuba Perezida yatangaje ubushake na gahunda yo gufungura Ambasade muri Hongiriya. Bivuze ko mu minsi iri imbere bazaba bafite ubahagarariye i Budapest. Twakiranye umunezero icyemezo cy’u Rwanda, ndizera ko ibyo bizongerera ikibatsi ubutwererane dufitanye.”

U Rwanda rwabaye Igihugu cya mbere cy’Afurika Perezida Novák agiriyemo uruzinduko, nyuma y’igihe kirenga umwaka umwe atorewe kuba Perezida wa Hongiriya nk’umugore wa mbere uyoboye icyo gihugu.

Yavuze ko yashakaga kwihera ijisho intambwe u Rwanda rwateye mu myaka ikabakaba 30 ishize hahagaritswe Jenoside yakorewe Abatutsi mu 1994, nyuma yo kuva mu Rwanda bikaba byitezwe ko azakomereza muri Tanzania.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA