MINAGRI na AGRA mu gukemura ikibazo cy’ubushomeri
Amakuru

MINAGRI na AGRA mu gukemura ikibazo cy’ubushomeri

NTAWITONDA JEAN CLAUDE

August 15, 2023

Minisitiri w’Ubuhinzi n’Ubworozi Dr. Musafiri Ildephonse, yatangaje ko gahunda z’Umuryango Nyafurika ushinzwe iterambere ry’ubuhinzi ishami ry’u Rwanda (AGRA) zidatandukanye cyane n’iz’igihugu gifite.

Yabigarutseho ejo ku wa Mbere taliki ya 14 Kanama, mu muhango wo gutangiza ku mugaragaro gahunda y’imyaka itanu yitezweho kuzageza mu mwaka wa 2027.  

Mu kiganiro n’itangazamakuru, Minisitiri Dr. Musafiri yavuze ko ubuhinzi atari uguhinga gusa ahubwo hazamo kurya kandi ko abantu bagomba guhinga ku buryo burengera ibidukikije.

Ati: “Igishya kijemo ni ukuzana urubyiruko mu buhinzi n’ubworozi”.

Akomeza agira ati: “Twiteguye guhanga imirimo myishi y’urubyiruko, tuzanye na AGRA ubushobozi bwo kugira ngo tubafashe babe abahinzi b’umwuga.

Urubyiruko turarufite ari urwize n’urutarize, hari abarangije muri Isiraheli bize ubuhinzi bw’umwuga, abo bose tubahuriza hamwe bakabasha kubona igishoro”.

Guhanga akazi kenshi binyuze mu rubyiruko ndetse no mu yandi mashyirahamwe, MINAGRI yiteguye gufatanya na AGRA kandi bakazabona impinduka mu buhinzi n’ubworozi by’u Rwanda.

Minisitiri w’Ubuhinzi n’Ubworozi Dr. Musafiri Ildephonse

Dr. Agnes Karibata, Perezida wa AGRA, yavuze ko intego yabo mu 2023-2027 ari ugufasha abakora ubucuruzi buto n’ubucuriritse mu bijyanye n’ubuhinzi kugira ngo barusheho guhatana.

Asobanura ko ibigo bito n’ibiciriritse bizarushaho gukorana n’abahinzi bato bityo bitange umusaruro utandukanye ndetse n’amasoko.

Yagize ati: “Birashoboka gushyiraho amahirwe mu buhinzi by’umwihariko ku rubyiruko ruri hejuru ya 70% rufite imyaka 35 kugira ngo na rwo rushobore kwiteza imbere”.

Mukazayire Nelly, Umuyobozi wungirije wa RDB, yavuze ko 97% by’ubucuruzi mu Rwanda buri mu bucuruzi buto n’ubuciriritse bukaba inkingi mwikorezi mu iterambere ry’u Rwanda. 

Ati: “Twakoranye bya hafi n’ingando nto n’iziciriritse zigera hafi 300 mu rwego rwo guteza imbere igenamigambi ry’ubucuruzi bwabo hagamijwe gukurura abashoramari”.

Minisitiri w’Urubyiruko, Dr. Utumatwishima Jean Nepo Abdallah, agaragaza icyo bakora ari ugutuma urubyiruko rubona amahirwe y’akazi.

Ati: “Hafi 36% b’urubyiruko rwacu muri miliyoni Enye ntibari mu ishuri, amahugurwa cyangwa mu kazi. Intego yacu ni ukubashishikariza gukora ubuhinzi n’ibibukomokaho”. 

Ndagijimana Jean Paul, Umuyobozi w’Umuryango Nyafurika ushinzwe iterambere ry’ubuhinzi ishami ry’u Rwanda, avuga ko hagati ya 2006 na 2017 amafaranga AGRA yashyize mu buhinzi mu Rwanda ari hafi miliyoni 6 z’amadolari y’Amerika.

Hagati ya 2017 na 2023 amafaranga yarikubye, ava kuri miliyoni 6 agera kuri miliyoni hafi 11.

Mu myaka 5 iri imbere bagiye kuva kuri miliyoni 11 US$ bagere kuri miliyoni 50.

Ndagijimana avuga ko AGRA izashishikariza abanyarwanda 1,500,000 guhinga ku buryo bujyanye n’ibihe.

Yizeza kandi ko imirimo 132,000 mishya izinjira mu buhinzi by’umwihariko ku rubyiruko mu gihe cy’imyaka 5.

Yanditswe na KAYITARE JEAN PAUL 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA