MINAGRI yagaragaje icyateza imbere ubuhinzi hakomozwa kuri RDO
Amakuru

MINAGRI yagaragaje icyateza imbere ubuhinzi hakomozwa kuri RDO

Imvaho Nshya

July 14, 2023

Dr. Kamana Olivier, Umunyamabanga Uhoraho muri Minisiteri y’Ubuhinzi n’Ubworozi (MINAGRI), yagaragaje icyo abahinzi bakora kugira ngo batere imbere kandi bakabona  amasoko.

Yabivuzeho ku mugoroba wo kuri uyu wa Kane taliki 13 Nyakanga 2023 ubwo hashimirwaga abahinzi ku ruhare rwabo mu iterambere ry’Igihugu. 

Yavuze ko kugira ngo umuhinzi ashobore gutera imbere, icyamufasha ari ukwibumbira mu makoperative ndetse no kwitabira gahunda za Leta zijyanye n’ubuhinzi n’ubworozi.

Ati: “Harimo kwitabira ubwishingizi bw’ibihingwa byabo kugira ngo bikomeze bigire agaciro ndetse n’ibiba byaribasiwe n’ibiza cyangwa n’izindi ngorane zazamo zishobore gushumbushwa.

Ikindi bitabire izindi gahunda zisanzwe zose za Leta zihari zo guhuza ubutaka kandi bagakoresha imbuto z’indobanure n’ifumbire”.

Yibutsa ko Leta ishyira mu buhinzi nkunganire ihagije kugira ngo abaturage babashe kubona ifumbire ndetse n’imbuto ku giciro gito.

Ibyo byose bagomba kubyitabira bityo umusaruro wabo ukarushaho kugenda uzamuka.

Asaba abahinzi kwegera abafashamyumvire mu buhinzi kugira ngo barusheho gutera imbere, ikindi ngo bituma ubuhinzi bwabo buba ubwa kinyamwuga.

Ku rundi ruhande, haracyari ikibazo cyo kuba abahinzi bagorwa no kutabona inguzanyo muri banki. 

Dr Kamana, Umunyamabanga Uhoraho muri MINAGRI,  yemeza ko abahinzi gukorana na banki hakirimo imbogamizi.

Ati “Uko bimeze ndetse n’ibyo banki zisaba, bisaba ko umuhinzi agomba kuba ari ku rwego ruri hejuru cyane, afite hegitari nyinshi z’ubutaka, akoresha imashini mu guhinga, afite n’amafaranga menshi. Uwo ni we banki igirira icyizere.

Ariko n’abahinzi bo ku rwego ruciriritse turabamara impungenge ko igihe bagiye mu bwishingizi banki ishobora kubagirira icyizere kuko ibona ko ibikorwa byabo byishingiwe, banki na yo itazahomba”.

Hari ubundi buryo buhari kugira ngo abahinzi n’aborozi babe bakunganirwa, aho abahinzi bashobora kubona inguzanyo yo hasi kandi yunganiwe ku bikoresho byifashishwa mu buhinzi n’ubworozi bityo bakaba batera imbere.

Rwibasira Eugène, Umunyamabanga Nshingwabikorwa w’Umuryango Nyarwanda Utsura Amajyambere (RDO),  agaragaza ko abahinzi ari abantu bakomeye kandi bafite agaciro kuko ngo ni bo bagaburira Isi yose. 

Yagaragaje ko ubuhinzi bugira uruhare mu bukungu bw’Igihugu kuko ngo ni 31% by’umusaruro mbumbe.

Yavuze ko hashyizweho umunsi wo gushimira abahinzi kugira ngo bagaragaze agaciro bahaye umuhinzi.

Nubwo ngo bishimira ibyiza by’abahinzi bagezeho, hari ibyo batarashobora kugeraho.

Yavuze ko ubuhinzi mu Rwanda bumaze gutera imbere kuko mu 1994 umuhinzi yasaruraga 0.8 Kg z’ibigori kuri hegitari.

Umuhanzi Intore Tuyisenge n’Itorero basusurukije abitabiriye Farmers Gala Night

Ni mu gihe kugeza uyu munsi umuhinzi asarura toni hagati ya 5 na 8 kuri hegitari.

Gatana Erasso, Umuhinzi wo mu Murenge wa Macuba mu Karere ka Nyamasheke mu Ntara y’Iburengerazuba, avuga ko RDO yashoboye kubigisha guhinga kijyambere ndetse no gutandukanya ibihingwa, gukoresha ifumbire y’imborera n’imvaruganda hakiyongeraho gushaka isoko ry’umusaruro.

Yagize ati: “Ubu nta musaruro wacu ucyangirika, iyo twejeje ibigori RDO idushakira isoko tugakora amasezerano n’inganda umusaruro wacu bakawujyana kandi bakatwishyura neza”.

Nsengiyumva Innocent wo mu murenge wa Busasamana mu Karere ka Nyanza mu Ntara y’Amajyepfo, mu buhamya bwe yavuze ko yabaye mu Mujyi wa Kigali ari umuzunguzayi ariko nyuma asubira mu cyaro ajya gukora imirimo y’ubuhinzi.

Ashimira Leta uko ikomeje kwita ku bahinzi ndetse na RDO yegera abahinzi ikabashakira isoko ry’ibyo bejeje.

Agira ati: “Ndashimira RDO iduha amakuru y’isoko ku buryo kugeza ubu navuga ko nk’abahinzi tutagitsikamirwa n’abamamyi”.

Cyubahiro Bonaventure na we ni umwe mu bahinzi umaze imyaka 10 ahinga urusenda.

Avuga ko agorwa no gukorana na banki agasaba ko abahinzi bakoroherezwa kugira ngo babone inguzanyo mu mabanki.

Yagize ati: “Hari aho ntaragera mu buhinzi, ndasaba ko banki zakorana n’abahinzi, mutube hafi”.

Ubuyobozi bwa RDO butangaza ko ibikorwa byo gushimira abahinzi ku munsi wabo, ubera mu karere ka Kayonza mu Ntara y’Iburasirazuba,  kuri uyu wa Gatanu taliki 13 Nyakanga 2023.

Yanditswe na KAYITARE Jean Paul 

Dr Kamana, Umunyamabanga Uhoraho muri MINAGRI (iburyo) n’Umunyamabanga Nshingwabikorwa wa RDO

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA