MINAGRI yakuyeho gahunda ya “Zoning” ku bahinzi b’ikawa
Amakuru

MINAGRI yakuyeho gahunda ya “Zoning” ku bahinzi b’ikawa

NTAWITONDA JEAN CLAUDE

June 16, 2023

Hashingiwe kuri gahunda ya Guverinoma y’u Rwanda yo kongera ubwiza n’ubwinshi bw’ikawa, Minisiteri y’Ubuhinzi n’Ubworozi ( MINAGRI) yatangaje ko gahunda ya “Zoning” ikuweho.

Iyi gahunda ya “Zoning” yasabaga abahinzi b’ikawa  kugemura  umusaruro ku ruganda rubegereye, muri zone barimo gusa, ikaba ari ho itunganyirizwa. 

Bamwe bagiye bagaragaza ko ibateza igihombo kuko hari aho babonaga abahinzi bagenzi babo bagurirwa n’inganda bagemuraho ku giciro kiri hejuru kurusha icyo bagurirwaho kandi ntibabe bemerewe kuhajyana umusaruro.

Umwe mu baganiriye n’Imvaho Nshya wo mu Karere ka Gatsibo witwa Uwihanganye, yagize ati: “Uruganda runaka ruraguha amafaranga hirya ukumva urundi ruratanga andi kandi ari mu Murenge umwe; ukumva ruratanga menshi utemerewe kuzijyanayo”.

Mu mabwiriza yatangajwe n’iyi Minisiteri agenga ubuhinzi n’ubucuruzi bw’ikawa, hagaragaramo kandi ko iki cyemezo gifashwe hashingiwe  kuri Gahunda y’Igihugu ya 4 yo kuvugurura ubuhinzi(PSTA 4) 2018-2024 cyane cyane mu bijyanye no kongera umusaruro w’ibyoherezwa mu mahanga.

Ikigo cy’Igihugu gishinzwe iyoherezwa mu mahanga ry’ibikomoka ku buhinzi n’ubworozi (NAEB) kikaba kizakomeza gushyiraho igiciro fatizo cy’ikawa gihabwa umuhinzi kuri buri sizeni.

Ubwoko bw’ikawa bwemewe gutunganywa mu Rwanda ni ikawa yogejwe neza, ubundi bwoko bw’ikawa busabirwa uburenganzira muri kiriya kigo nk’uko byatangajwe na MINAGRI.

Itangazo yatanze rikomeza rigira riti: “Uretse ikawa y’ubwiza buhebuje ifite amanota ari hejuru ya 80, ibindi byiciro by’ikawa yogejwe neza bizajya byishyura amafaranga angana na 3% by’agaciro k’ikawa. Ku wabiherewe uburenganzira, ikawa isanzwe bakunze kuvuga ko ari “oridineri”(ordinaire) izajya yishyura amafaranga angana na 5% by’agaciro k’ikawa.

MINAGRI yemeje ko andi mabwiriza abanziriza aya kandi anyuranyije n’ingingo zavuzwe haruguru akuweho, aya mashya akaba yatangiye gushyirwa mu bikorwa kuva aho ashyiriweho umukono ku wa 15Kamena 2023.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA