MINAGRI yasabye abatubuzi b’imbuto kurwanya ababiyitirira bagahombya abahinzi
Amakuru

MINAGRI yasabye abatubuzi b’imbuto kurwanya ababiyitirira bagahombya abahinzi

Imvaho Nshya

October 26, 2023

Mu gihe hagiye hagaragara abahinzi binubira ko bahabwa imbuto zitari nziza zikabahombya, Minisiteri y’Ubuhinzi n’Ubworozi (MINAGRI) irakangurira abacuruza n’abatubura imbuto kwishyira hamwe bakigenzura ubwabo kugira bamenye ubavangira akora uyu mwuga atabyemereye.

Dr. Karangwa Patrick, Umuyobozi Mukuru ushinzwe kuvugurura ubuhinzi muri Minisiteri y’Ubuhinzi n’Ubworozi (MINAGRI), yavuze ko abakora akazi ko gutubura imbuto bakwiye kwigenzura no kwishyiriraho amabwiriza abagenga (self-regulation).

Yashimangiye ko ibyo babikora bagamije kureba niba hari abiyitiririra aka kazi k’ubutubuzi bw’imbuto bagakora imbuto zitari nziza, bigatera igihombo abahinzi ndetse bikananduza isura y’abatubura imbuto n’abazicuruza muri rusange.

Yagize ati: “Abikorera bari muri ibi by’imbuto, babashe kumenya abantu babavangira babarimo. Nkuko mu kiganga utagenda ukora ibintu ubeshya abantu ko uzi kuvura ukora amahano ngo bategereze ko ari Leta izakubona, no mu bindi nk’abenjenyeri, hano rero mu batubura imbuto  na bo  bagomba gushyiramo imbaraga mu kureba niba hari ababavangira bidategereje ko Leta ibizamo.”

Uyu muyobozi kandi akomeza gushishikariza abari mu rwego rwo gutubura imbuto gushora imari ifatika kugira ngo babone inyugu ihagije, ariko kandi banatekereza gukorera imbuto nziza isoko mpuzamahanga.

Namuhoranye Innocent Umuyobozi w’Ishyirahamwe ry’abacuruza n’abatubura imbuto mu Rwanda (NSAR), avuga ko na bo barimo gushaka umuti w’ikibazo cy’imbuto mbi zihombya  baturage, aho hamaze gutangizwa Icyerekerezo 2030 kizatuma u Rwanda ruba igicumbi cy’imbuto nziza.

Ati: “Tuzubaka uruhererakane rwo gutubura imbuto rw’abazitubura, abazicuruza  n’abazigeza ku bahinzi, ku buryo imbuto izajya igera ku muturage hari n’uwayitunganyije ku buryo mu gihe itabaye nziza umuturage yateye igihombo ashobora kubikurikira akaba yamwishyura. Uko gushyira ku murongo kw’abari mu butubuzi, n’abazicuruza ndetse n’abazigeza ku bahinzi, bizajya bitanga umusaruro ku bazitubura kandi utawutanga azajya abona ingaruka bizamugiraho.”

Namuhoranye kandi anavuga ko imbaraga bagiye kuzishyira cyane mu bushakashatsi kugira ngo bongere ingano y’imbuto batubura kimwe n’ubuziranenge bwazo.

Ati: “Twahamagariye abikorera ko niba wari ufite ubutaka butanga toni 3 turashaka ko ubushakashatsi tuzakora batuma abona toni 7 cyangwa  10 . Uburyo bwa kabiri n’abahinzi bamenye ko mu gihe babonye imbuto nziza, irajyana n’iki? Harimo guhingira ku gihe no kubagara ku gihe n’ibindi, ibyo ni byo tuzibandaho cyane muri iyi myaka irindwi y’icyerekezo cyo kugira imbuto nziza ku rwego mpuzamahanga, kugira ngo umuhinzi abashe kubona umusaruro bityo abashe no kugira ubuhinzi buteye imbere.”

Abahuriye mu Ishyirahamwe NSAR basabwe kwimakaza imikoranire ihamye hagati yabo bakanimakaza ubufatanye mpuzamahanga, kongera ishoramari, gukora ubushakashatsi no kurushaho guhanga udushya nk’umusingi wo kugera ku ntsinzi mu rwego rw’ubutubuzi bw’imbuto mu Rwanda.

ZIGAMA THEONESTE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA