Minisitiri Mbabazi yagaragaje ibyiza byo guhuza ikoranabuhanga n’Ikinyarwanda
Amakuru

Minisitiri Mbabazi yagaragaje ibyiza byo guhuza ikoranabuhanga n’Ikinyarwanda

NTAWITONDA JEAN CLAUDE

February 15, 2023

Minisitiri w’Urubyiruko n’Umuco Mbabazi Rosemary, yatangaje ko kuba ururimi rw’Ikinyarwanda rwinjijwe mu ikoranabuhanga ari ibintu byo kwishimira, ubwo hamurikagwa inkoranyabuhanga ry’Ikinyarwanda kuri uyu wa Gatatu tariki 15 Gashyantare 2023.

Ni ikoranabuhanga ryakozwe n’ikigo cyitwa ‘Digital Umuganda’ hakoreshejwe ubwenge muntu butari karemano (Artificial Intelligence) ku bufatanye bwa Minisiteri y’Urubyiruko n’Umuco, Minisiteri y’Ikoranabuhanga no Guhanga Ibishya ndetse n’Ikigo cy’u Budage gishinzwe iterambere mpuzamahanga (GIZ).

Minisitiri Mbabazi avuga ko hari ubushakashatsi bwakozwe bugaragaza ko iyo abana biga mu rurimi rwabo biborohera kugira ngo bavumbure. Ati: “Kuba rero tugiye guhuza ikoranabuhanga n’ururimi rwacu kavukire rw’Ikinyarwanda, ni byiza birashimishije kandi nshimira abafatanyabikorwa badufashije muri runo rugendo”.

Avuga ko urubyiruko rwahoraga rwishakishiriza amagambo ariko ngo ni byiza ko Inteko y’Umuco n’aba bacukumbuzi batangiye gufasha gushaka amagambo y’ikinyarwanda ahura n’ikoranabuhanga.

Yagize ati: “Kuba duhuza ururimi rwacu tukarushyira mu Isi y’ikoranabuhanga, ni igikorwa cy’ingenzi, ni igikorwa cy’indashyikirwa.

Nitubishyira mu ikoranabuhanga bizatuma tubungabunga rwa rurimi rwacu kuko iyo Isi yimukiye mu ikoranabuhanga tugomba gushyira urubyiruko cyangwa abato mu Isi y’Ikoranabuhanga. Nitubasange, tubahuze bakore, bahange ibishya, bakore ibidasanzwe. Ikindi bizadufasha, ni ukubaka ikoranabuhanga mu Kinyarwanda kuko turarikorera Abanyarwanda”.

Ku rundi ruhande, Minisitiri w’Ikoranabuhanga no Guhanga Ibishya Ingabire M. Paula, yagaragaje ko ikoranabuhanga ritashoboka ritarimo amakuru ahagije.

Kabayiza Deborah, umunyeshuri muri UNILAK, avuga ko iri koranabuhanga rije kubafasha. Ahamya ko ikintu cyari kibakomereye ari ukuba ibintu byose biri mu zindi ndimi.

Ashimangira ko kuri gugo (Google) utazi urundi rurimi bigoye kuba wagera ku cyo ushaka. Ati: “Iri koranabuhanga ni ryiza kuko nkatwe abadotikomu bigiye kudufasha kumenya Ikinyarwanda cy’umwimerere. Hari amagambo tutari tuzi amwe n’amwe ariko bizaza bidufashe kuyamenya kuko tuzajya tuyakoresha”.

Uwase Divine utuye i Nyamirambo avuga ko hari igihe ushobora kubona ijambo mu ndimi z’amahanga ngo wajya kuri gugo ushaka kuribona mu Kinyarwanda, ukaribura.

Niyonkuru Audence, Umuyobozi w’Ikigo Digital Umuganda, ikigo gikora ubwenge muntu butari karemano (Artificial Intelligence/AI) n’imbonwa, avuga ko hamuritswe ku mugaragaro inkoranabuhanga eshatu.

Yasobanuye inkoranabuhanga zamuritswe, agira ati: “Icya mbere ni ikigega cy’imbonwa twamuritse. Ni igikorwa remezo kifashishwa mu bwenge muntu butari karemano kizafasha kubakirwaho inkoranabuhanga ishobora kwifashishwa muri serivisi zitandukanye.

Icya kabiri ni itahura mvugo aho umuntu ashobora kuvuga, ya majwi agashyirwa mu nyandiko, abadashoboye kubona serivisi mu ndimi z’amahanga bakazibona mu Kinyarwanda.

Icya Gatatu ni ivana inyandiko izishyira mu mvugo akaba ari yo ishobora gufasha umuntu ufite ubumuga bwo kutabona cyangwa hari inyandiko igomba kujya mu ijwi ry’Ikinyarwanda”.

Yizeza ko nubwo isemuranyandiko ritari mu byamuritswe ariko ko ari imwe mu mishinga irimo gukorwaho.

Amb Robert Masozera, Umuyobozi w’Inteko y’Umuco, agaragaza ko igikorwa cyakozwe gikomeye.

Avuga ko igikorwa cyo kumurika inkoranabuhanga mu Kinyarwanda, bigaragaza ko u Rwanda rurimo kujyana n’igihe mu mikoreshereze y’ikinyarwanda.

Yagize ati: “Mu Isi ya none biragoye kugira icyo wakora  utifashishije ikoranabuhanga. Byari ngombwa ko Ikinyarwanda kijya mu ikoranabuhanga kigasanga izindi ndimi zikomeye zarangije kwinjiramo”.

Ahamya ko muri Afurika u Rwanda ruri mu bihugu 6 bishoboye kwinjira muri iyi gahunda yo gushyira indimi zabyo mu ikoranabuhanga. Akomeza avuga ko ari ibintu byari ngombwa kuko ngo bizoroshya imitangire ya serivisi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA