Minisitiri Ugirashebuja yasabye abagenzacyaha kwitanga
Amakuru

Minisitiri Ugirashebuja yasabye abagenzacyaha kwitanga

Imvaho Nshya

July 9, 2023

Minisitiri w’Ubutabera akaba n’Intumwa Nkuru ya Leta, Ugirashebuja Emmanuel, mu mpera z’iki cyumweru yakiriye indahiro z’abagenzacyaha 133 b’Urwego rw’Ubugenzacyaha (RIB) basoje amahugurwa y’ibanze y’Ubugenzacyaha (Basic Criminal Investigation Course) icyiciro cya 6.

Ni umuhango wabereye mu Ishuri Rikuru rya Polisi (NPC) riherereye mu Karere ka Musanze mu Ntara y’Amajyaruguru, witabirwa n’Umunyamabanga Mukuru wa RIB Col. (Rtd) Jeannot Ruhunga n’izindi nzego z’umutekano.

Minisitiri Ugirashebuja yasabye abagenzacyaha kwitanga. 

Yagize ati: “Turabasaba kwitanga mu nshingano zanyu ziremereye nkuko biri mu ntego za RIB, kutabomaga no kwirinda ruswa ndetse n’ibindi byaba bishamikiye kuri ruswa kuko ibyo, muri uru rwego mwinjiyemo muri uyu munsi ntabwo byihanganirwa”.

Yabijeje ko Leta izakomeza kubaba hafi kandi ikabagenera ibyangombwa kugira ngo barusheho kunoza umurimo wo gutanga ubutabera.

Ruhunga, Umunyamabanga Mukuru wa RIB, yibukije abagenzacyaha barangije amahugurwa gukoresha  ikoranabuhanga kuko ngo ribafasha gukora ibyiza.

Ku rundi ruhande, Minisitiri w’Ubutabera akaba n’intumwa nkuru ya Leta, yashimiye abagenzacyaha bashoboye kumara amezi 7 bashaka ubumenyi bityo abaha ikaze mu Muryango mugari w’Urwego rw’Ubutabera.

Yagize ati: “Muje muri inyongera nziza ku bandi bakozi b’Inzego z’ubutabera mu Rwanda.

Iki gikorwa cy’uyu munsi kiri mu bitugaragariza ubushake n’umuhate wo gufatanya no kubaka uru rwego ku bufatanye n’izindi nzego cyane cyane Polisi y’Igihugu”.

Ashimangira ko ubufatanye bugaragarira mu mahugurwa, ibi ngo kandi bizajya bifasha inzego mu guhuza ubumenyi mu kurwanya no gukurikirana ibyaha cyane cyane ibirebana n’iterabwoba, icuruzwa ry’abantu, icuruzwa n’ikwirakwizwa ry’ibiyobyabwenge n’ibindi byaha.

Biturutse ku iterambere rya murandasi n’izindi nzira z’itumanaho, inzego z’ubutabera zatangiye kwinjira mu kindi kiragano (Génération) gishya cy’ikoranabuhanga ari cyo cyitwa ‘Artificial Intelligence’.

Minisitiri Ugirashebuja agaragaza ko iri koranabuhanga rifite akamaro kenshi cyane mu iterambere.

Yagize ati: “Mugomba kwitegura ko hari n’abagizi ba nabi biteguye kurikoresha bakora ibyaha mu buryo bwose bushoboka. 

Zimwe mu nzira zo guhangana n’ibi byaha, ni ukongerera ubushobozi n’ubumenyi abakozi bo mu nzego zose z’ubutabera by’umwihariko abagenzacyaha”. 

Abagenzacyaha 133 barangije amahugurwa mu Ishuri Rikuru rya Polisi riherereye mu Karere ka Musanze, abagore ni 39 n’aho abagabo ni 94.

Amakuru Imvaho Nshya yamenye ni uko mu Rwego rw’Igihugu rw’Ubugenzacyaha hinjiyemo abagenzacyaha bashya 81 mu gihe abandi 52 ari abo mu zindi Nzego z’umutekano.

Umuvugizi w’Urwego rw’Igihugu rw’Ubugenzacyaha, Dr Murangira Thierry, yabwiye Imvaho Nshya ko kuba hari abagenzacyaha bo mu zindi nzego z’umutekano barangije amahugurwa y’ubugenzacyaha, bigaragaza ubufatanye n’imikoranire myiza y’inzego kandi ko zose zikorera umuturage.

KAYITARE Jean Paul

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA