Mu myaka 5, ubuhuza bwakemuye ibirego birenga 4300 mu Rwanda
Amakuru

Mu myaka 5, ubuhuza bwakemuye ibirego birenga 4300 mu Rwanda

Imvaho Nshya

October 11, 2023

Urwego rw’Ubutabera mu Rwanda rwagaragaje ko ubuhuza ari inzira nziza yo gutanga ubutabera buboneye ndetse ko mu myaka 5 ishize Leta y’u Rwanda imaze ishyizeho iyo gahunda mu nkiko imanza zari kuburanwa zirenga 4000 zakemukiye muri ubu buryo, birinda abaturage gutakaza umwanya n’amafaranga.

Ni ibyagarutsweho ubwo hatangizwaga inama iteraniye i Kigali yiga ku bukemurampaka  yahuje inzego zitandukanye ziri mu butabera, yatangiye ku wa 9 ikazageza ku wa 13 Ukwakira 2023.

Perezida w’Urukiko rw’Ikirenga, Dr Ntezilyayo Faustin, yagaragaje ko ubuhuza ari inzira nziza yo gukemura ibibazo mu bwumvikane kandi yimakaza ubutabera.

Yagize ati: “Kuva hajyaho ubu buryo bw’ubuhuza mu nkiko mu mwaka wa 2019, ibibazo bigera ku 4,369 byarakemutse kandi byanatumye abari babifite bareka gutakaza amafaranga ndetse n’umwanya munini bari guta kuri ibi bibazo mu nkiko mu gihe bari guhitamo inzira zisanzwe zo kuburana.”

Yongeyeho ko kandi kuri ubu abahuza mu nkiko bongerewe ku buryo muri iyi myaka ishize hiyongeyereho abarenga 250 bakaba bari mu kazi ko kunga abaturage bafitanye ibibazo.

Ati: “Ubu ni uburyo bushoboka kandi dushaka ko n’aho butaragera na ho bukoreshwa”.

Perezida w’Urukiko rw’Ikirenga kandi yagaragaje ko mu Rwanda ubuhuza ari uburyo bukomeye butuma abaturage bikemurira ibibazo kandi bukaba inzira yihuse yo kubona ubutabera buboneye kandi bunyuze mu mucyo.

Harrison Mutabazi, Umuvugizi w’Inkiko mu Rwanda, na we yashimangiye ko iyi mibare y’abayoboka ubuhuza igenda izamuka ariko anongeraho ko ubuhuza bunongerera abaturage gusobanukirwa kurushaho amategeko yatuma bahabwa ubutabera buboneye ndetse no guhindura imyumvire.

Yagize ati: “Kugira amakuru birakenewe cyane, abantu bakeneye kumenya ko ibi bintu bifite akamaro kandi ko inzira y’ubuhuza ikemura ibibazo byinshi kandi ari uburyo bwizewe kandi butanga inyungu.”

Abunganizi mu mategeko na bo bahamya ko inzira z’ubuhuza ari ingenzi cyane mu gutanga ubutabera bunoze kandi burambye.

Moise Nkundabarashi, Perezida w’Urugaga rw’Abunganizi mu by’Amategeko bazwi nk’Abavoka, avuga ko ubu buryo butanga ubutabera bwuzuye ugereranyije no kuburana bisanzwe.

Ati: “Dushishikariza abantu cyane ko bagana inzira y’ubuhuza kandi ubuhuza ntabwo boshobora kubaho ngo butange umusaruro nta mwavoka uhari kubera ko usanga abantu benshi bagirira icyizere Abavoka kurusha undi muntu uwo ari we wese rero muri ubu buryo buhuza aba avoka baba bahari kandi bakabikora neza”.

Inzego z’ubutabera zitangaza ko mu mwaka wa 2022, binyuze mu buhuza, harengewe amafaranga menshi yari kugenda mu manza, arenga miliyari 11 z’amafaranga y’u Rwanda.

ZIGAMA THEONESTE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA