Mu myaka 6, Ibiza byahitanye abantu 1,615 n’amatungo 13,700
Amakuru

Mu myaka 6, Ibiza byahitanye abantu 1,615 n’amatungo 13,700

NTAWITONDA JEAN CLAUDE

June 30, 2023

Imyuzure n’inkangu byatewe n’imvura nyinshi, inkongi z’umuriro n’inkuba, byahitanye abantu 1,615 kuva mu mwaka wa 2017 kugeza mu kwezi kwa Gicurasi 2023. Abahanga mu iteganyagihe basanga ingaruka z’ibiza zishobora kuziyongera ku kigero cya 40%, naho amapfa (draught) akaziyongera ku kigero cya 30%.

Iyi mibare yagarutsweho na Minisitiri w’Intebe Dr. Ngirente Edouard kuri uyu wa Gatanu taliki ya 30 Kamena, ubwo yagezaga ku Nteko Ishinga Amategeko imitwe yombi, bimwe mu byo Guverinoma yakoze n’ibiteganywa gukorwa mu gucunga no guhangana n’ibiza.

Dr. Ngirente yavuze ko muri iyo myaka itandatu ibiza by’imyuzure byibasiye ibice bitandukanye by’Igihugu byahitanye abantu 1,289 bikaba byarakomerekeje abantu barenga 2,114, byangiza inzu zigera ku 51,700 na hegitari z’imyaka zigera ku 33,000 z’ibihingwa.

Muri icyo gihe gikabakaba imyaka itandatu, ibyo biza byahitanye inka zirenga 1,900, n’andi matungo magufi arenga 12,800.

Yagize ati: “Iyi mibare dukunda kuyivuga tubibwira Abanyarwanda kugira ngo byumvikane ko, nubwo ibiza utabirinda ngo bishireho, ariko hari imbaraga tugomba gushyira mu kurinda ibidukikije dutuyeho kugira ngo nibura ibiza bigabanyuke, nibinaza bihitane ibintu bikeya bishoboka.”

Ibi biza kandi byashenye ibyumba by’amashuri birenga 1,300 byica ibice by’imihanda 479, bisenya ibiraro birenga 484, imiyoboro y’amazi irenga 232 ndetse n’imiyoboro y’amashanyarazi igera kuri 350.

Hagaragaye kandi ko inkongi zabaye inshuro zirenga 132, zikaba zarangije inzu 117, inganda eshanu n’amasoko ane. Izi nkongi kandi zahitanye abantu babiri, zinakomeretsa abandi bane.

Yavuze ko muri izo nkongi hari iziterwa n’ibikorwa bya muntu zituruka ku buryo bashyira umuriro w’amashanyarazi mu nzu cyangwa se n’ibindi bishobora guteza inkongi z’umuriro.

Muri iyo myaka kandi, habaye inkubi y’umuyaga inshuro zirenga 44 mu Rwanda, ikaba yarasenye inzu zirenga 3,600 n’ibyumba by’amashuri birenga 397. Inkuba zahitanye abaturage 324 abandi 1,020 barakomereka.

Dr. Ngirente yakomeje agira ati : “Ibyo ni ibikorwa remezo byangijwe n’ibiza muri iyi myaka itandatu. Byumvikane ko muri buri ngengo y’imari tugenda dukuramo amafaranga yo gusana icyo ibiza biba byarangije, kugira ngo dusubizeho ibikorwa remezo cyangwa se no gufasha abaturage baba barangirijwe na byo.”

Imvura yaguye mu ntangiriro za Gicurasi yasize icyuho cya miliyari 500 Frw

Dr. Ngirente yagarutse by’umwihariko ku mvura idasanzwe yaguye mu ntangiriro za Gicurasi, mu ijoro ryo ku italiki ya 2 rishyira ku ya 3, avuga ko ari wo munsi mubi u Rwanda ruheruka kugira muri iyi myaka kuko rwabuze abaturage barenga 130 mu ijoro rimwe.

Ati : “Ibyo biza byahitanye abantu 135 binakomeretsa abandi 111. Aho navuze rero ko bikomeye ni uko abantu 130 bo bapfuye mu ijoro rya mbere, bakaba ari abantu benshi twapfushije umunsi umwe  bahitanywe n’ibiza.”

Ibyo biza ngo byanangije inzu zirenga 6,000 n’imyaka yari iteye ku buso bwa hegitari 3,100. Byahitanye amatungo 4,255 arimo inka 79, n’andi matungo magufi atandukanye.

Byangije ingomero z’amashanyarazi 14 n’imiyoboro y’amazi 69, iy’amashanyarazi igera kuri 35, imihanda migari yo ku rwego rw’Igihugu irenga 20, iyo ku rwego rw’Akarere 21 n’ibiraro 47.

Byanasenye ibikorwa remezo by’uburezi birimo ibyumba 32 by’amashuri, ubwiherero 55, inzitiro z’amashuri 83, ibigega 26 n’inkuta z’amabuye 27.

Muri rusange icyegeranyo cy’ibyangijwe n’ibiza byabaye muri Gicurasi 2023, kigaragaza ko bifite agaciro k’amafaranga y’u Rwanda asaga miliyari 222, ariko ngo ingengo y’imari ikenewe kugira ngo hasanwe ibyangiritse no gukumira iragera kuri miliyaari 500 z’amafaranga y’u Rwanda.

Minisitiri w’Intebe, yanakomoje ku byo Guverinoma y’u Rwanda yakoze kugira ngo abaturage bagizweho ingaruka n’ibiza bakomeze ubuzima busanzwe n’ibyo ikomeje gukora mu kwirinda no guhangana n’ingaruka z’ibyabaye.

Yagaragaje ko nyuma y’ibiza byo muri Gicurasi, abaturage barenga 20,000 bashyizwe muri site z’agateganyo 93 ziri mu Turere twa Rubavu, Nyabihu, Rutsiro, Karongi, Ngororero, Burera, na Gakenke aho bagiye bahabwa inkunga z’ibyo kurya, ibyo kwambara, ubuvuzi bw’ibanze n’ibindi.

Mu rwego rwo gusubiza mu buzima busanzwe imiryango yagizweho ingaruka n’ibiza, imiryango 3,711 yahawe amafaranga yo gukodesha inzu zo kuba batuyemo.

Abagize Inteko Ishinga Amategeko bashimye uburyo Guverinoma y’u Rwanda yihutira gutabara abaturage bahuye n’ibiza, by’umwihariko bashimira Perezida wa Repubulika Paul Kagame wakurikiranye bya hafi ubutabazi bahawe abaturage bibasiwe n’ibiza mu kwezi kwa Gicurasi 2023.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA