Mu Rwanda hagiye kubakwa Ububiko Nyafurika bw’Amakuru y’ubucuruzi
Amakuru

Mu Rwanda hagiye kubakwa Ububiko Nyafurika bw’Amakuru y’ubucuruzi

NTAWITONDA JEAN CLAUDE

November 29, 2022

Ubuyobozi bw’Ikigo “Africa Data Centres” bwemeje amakuru y’uko bugiye kubaka Ububiko Nyafurika y’Amakuru ku bucuruzi mu Mujyi wa Kigali, akaba ari bwo bubiko bw’amakuru y’ubucuruzi nyafurika bwa mbere bugiye kubakwa mu Rwanda.

Africa Data Centres ni ishami ry’Ikigo Nyafurika cy’Ikoranabuhanga cyitwa ‘Cassava Technologies’ gitanga ibisubizo bitandukanye by’ikoranabuhanga rigezweho, bifasha Umuganane w’Afurika kurushaho gutera intambwe zidasubira inyuma mu rugendo rwo kugera ku Cyerekezo 2063.

Africa Data Centres zimaze kuba icyenda mu bihugu bitandatu by’Afurika, u Rwanda rukaba rugiye kuba Igihugu cya karindwi cyubatswemo ububiko nyafurika bw’amakuru aho kizaba kimwe mu bihugu biri mu ruhererekane rw’ibihugu bikurwamo amakuru y’ubucuruzi n’ishoramari ryihariye ku mugabane w’Afurika.

Urwo ruhererekane rutanga amahirwe akomeye yo gukururira abashoramari bo ku yindi migabane gushora mu bucuruzi bw’imbere bufitiye akamaro Abanyafurika, cyane ko icyo kigo gifite intumbero yo gushyira hanze amakuru yose y’ingenzi ku bucuruzi nyafurika.

Intego nyamukuru yo gukwirakwiza ayo makuru hifashishijwe ikoranabuhanga, ni iyo kugaragaza amahirwe y’ubucuruzi n’ishoramari no guharura inzira y’ubufatanye bwihariye ku bashoramari bo muri Afurika n’abo ku yindi migabane. 

Biteganyijwe ko Ishami ry’u Rwanda rizaba rifite ubushobozi bwo gukoresha MW 2 z’ingufu; gushyira ibuye ry’ifatizo kuri icyo gikorwa remezo gishya mu Rwanda bizakorwa mu gihembwe cya mbere cy’umwaka wa 2023.

Biteganyijwe ko ishami ry’u Rwanda rizafasha guhaza ibyifuzo by’abanyamahanga bakeneye amakuru menshi mu Karere k’Afurika y’Iburasirazuba n’iyo hagati.

Tesh Durvasula, Umuyobozi wa Africa Data Centres, yagize ati: “Iki ni cyo gihe cyo kwaguka kw’ukubiko nyafurika bw’amakuru. Umwanzuro wo kubaka ishami i Kigali waratworoheye, dushingiye ku buryo u Rwanda rwihuse cyane mu kuzahura ubukungu nyuma ya COVID-19 ndetse na Guverinoma ikaba ishyize imbaraga mu mpinduramatwara mu bukungu zishingiye ku ikoranabuhanga.”

Durvasula avuga ko ubwo bubiko bw’amakuru buzazana inyongeragaciro y’amoko atatu ku isoko ry’u Rwanda, ari yo kugaragaza ubuziranenge bw’ibikorerwa mu Rwanda ku isoko mpuzamahanga, imitangire inoze ya serivisi zifashisha ikoranabuhanga ndetse na serivisi zikarushaho guhenduka no kwigonderwa na buri wese.

Umuyobozi Mukuru wa Cassava Technologies Added Hardy Pemhiwa, na we yakomeje agira ati: “Aya makuru mashya yiyongera ku ishoramari ritandukanye dufite mu Rwanda no mu bindi bice by’Afurika y’Iburasirazuba. Tuzakorana bya hafi n’ibigo bya Leta n’iby’abikorera mu Rwanda, mu guharanira ko babyaza umusaruro inyungu ishami ryacu ry’amakuru mu kwihutisha imitangire ya serivisi z’ikoranabuhanga Abanyarwanda n’abanyamahanga bakeneye.”

Ubuyobozi bwa Africa Data Centres buhamya ko nubwo u Rwanda ari igihugu kidakora ku nyanja mu Burasirazuba bw’Afurika, gifite ihuzanzira rya internet ridacikagurika n’ibikorwa remezo bigihuza na Uganda ndetse na Kenya ifatira kuri Uganda.

Biteganyijwe ko Africa Data Centres izafasha u Rwanda kwinjira mu ruhererekane rw’amakuru y’ubucuruzi muri Afurika y’Iburasirazuba, iryo shami rishya rikazahuzwa n’irindi rikuru riherereye i Nairobi muri Kenya.

Africa Data Centres ifite gahunda yo gufungurira Isi y’ubucuruzi abakiliya ba yo mu Rwanda nk’uko isanzwe ibigenza mu bihugu yubatsemo izina.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA