Kuva taliki 21 kugeza 27 Werurwe 2023 u Rwanda ruzakira imikino ihuza ibihugu bigize umuryango w’abayobozi ba Polisi zo mu bihugu byo mu Karere k’Afurika y’Iburasirazuba “EAPCCO Games 2023”.

Ubusanzwe uyu muryango ugizwe n’ibihugu 14 ari byo  u Burundi, Uganda, Tanzania, Kenya, Sudani, Sudani y’Epfo, Ethiopia, u Rwanda, Comoros, Seychelles, RDC, Somalia, Djibouti na Eritrea.

Iyi mikino “EAPCCO Games 2023” igiye kuba ku nshuro ya 4 izitabirwa n’ibihugu 8 birimo u Rwanda ruzakira,  u Burundi, Uganda, Tanzaniya, Kenya, Sudani, Sudani y’Epfo na Ethiopia.

Biteganyijwe ko iyi mikino izitabirwa n’abakinnyi n’ababaherekeje  bagera ku 1250 mu bagabo n’abagore bakazahatana mu mikino 13 itandukanye irimo  umupira w’amaguru “Football”, Basketball, Volleyball,  Volleyball yo mucanga “Beach Volleyball”, Handball, Boxing, Taekwondo, Karate, Judo, Netball, Darts, Gusiganwa ku maguru “Athletics” no Kumasha “Shooting”.

Amakipe 83 ni yo agomba kwitabira iyi mikino harimo 56  y’abagabo na 28 mu bagore. Muri aya makipe , u Rwanda ruzahagararirwa mu mikino yose aho rufite amakipe 18 yose hamwe harimo 12 mu bagabo na 6 mu bagore.

Imikino ya “EAPCCO Games 2023” izabera ku bibuga bitandukanye mu Mujyi wa Kigali ndetse no mu Karere ka Bugesera.

Ibirori byo gufungura iyi mikino biteganyijwe ku wa Kabiri taliki 21 Werurwe 2013 kuri Kigali Pele Stadium i Nyamirambo  ari naho hazabera imikino y’umupira w’amaguru  naho ku munsi wa nyuma taliki 27 Werurwe 2023  ibirori byo gusoza imikino bizabere muri BK Arena i Remera  ahazabera imikino ya Handball na Volleyball.

Umuvugizi wa Polisi y’u Rwanda, CP Kabera John Bosco yatangaje ko iyi mikino yatangiye gukinwa muri 2017  ibera muri Uganda, muri 2018 ibera muri Tanzania naho muri 2019 ubwo iheruka ibera muri Kenya.

Yakomeje avuga ko u Rwanda rwagombaga kwakira iyi mikino muri 2020 ariko ntiyaba kubera COVID-19.

CP Kabera John Bosco avuga ko biteguye bihagije yaba ku ruhande rwo kwakira amarushanwa ndetse n’amakipe muri rusange. Akaba asaba Abanyarwanda kuzaza gushyigikira  amakipe yabo kuko kwinjira ari ubuntu ku mikino yose.

CP Munyambo Bruce, Komiseri w’ishami rishinzwe guhuza ibikorwa bya Polisi n’abaturage “Community Policing” akaba ari we ukuriye itsinda ririmo gutegura  “EAPCCO Games 2023” yavuze ko imyiteguro yo kwakira iyi mikino yagenze neza kandi bafite n’icyizere ko imikino izagenda neza.

Yasobanuye ko umuryango  wa EAPCCO watangijwe mu 1998  ugamije gushimangira ubufatanye bwa za Polisi n’ingamba zihuriweho zo gusangira amakuru ajyanye n’ibyaha no guhuza amategeko hagamijwe kongerera ubushobozi inzego zishinzwe kubahiriza amategeko ndetse no kurwanya ibyaha byambukiranya imipaka.

Iyi mikino ikaba yaratangiye gukinwa muri 2017  igamije gushimangira ubufatanye bwa za Polisi zo mu Karere k’Afurika y’Iburasirazuba mu kurwanya ibyaha ndengamipaka, guteza imbere impano z’abapolisi mu mikino itandukanye no gushimangira ubufatanye mu kubungabunga umutekano w’abaturage mu bihugu bigize uyu muryango hashingiwe ku bunararibonye bw’inzego za Polisi zo muri uyu muryango.

Iyi mikino ibaye ku nshuro ya 4, ifite insanganyamatsiko igira iti: “Guteza imbere ubufatanye bwa Polisi mu kurwanya ibyaha byambukiranya imipaka binyuze mu mikino n’imyidagaduro”.

Mu mikino iheruka “EAPCCO Games 2019”, u Rwanda rwegukanye imidali 46 muri rusange harimo 27  ya Zahabu, 6 ya Feza na 13 y’Umulinga ruza ku mwanya wa kabiri inyuma ya Kenya.

Imikino y’uyu mwaka “EAPCCO Games 2023” izatambuka mu buryo bw’ikoranabuhanga ku    murongo wa YouTube  ya  Polisi y’u Rwanda “https://www.youtube.com/@rwandapolice”.

Ba uwa mbere mu kumenya amakuru agezweho!!!