Ikigo cy’Igihugu gishinzwe Iterambere (RDB) cyatangaje ko mu mwaka wa 2025 u Rwanda rwanditse imishinga 799 y’ishoramari ifite agaciro k’asaga tiriyari 3.8 z’amafaranga y’u Rwanda (angana na miliyari 2.62 z’amadolari ya Amerika).

Iyo mishanga yariyongereye ugereranyije n’iyari yanditswe mu 2024 yari 612, bikaba biteganyijwe ko izatanga imirimo irenga 38,000 ku Banyarwanda.

Ibi bikubiye muri raporo y’umwaka wa 2025 yatangajwe kuri uyu wa Kabiri, tariki ya 28 Mata 2026, igaragaza ko u Rwanda rwakomeje kwitwara neza mu nzego z’ingenzi z’ubukungu, rukomeza gushyira imbaraga mu mavugurura agamije iterambere, no kwiyubaka nk’ahantu habereye gushora imari, ubucuruzi n’ubukerarugendo ku rwego mpuzamahanga.

Iyo raporo igaragaza ko inzego z’imyubakire, inganda n’ubucukuzi bw’amabuye y’agaciro ari zo zagize uruhare runini muri iri shoramari, binyuze  mu kongera amafaranga yinjira no guhanga imirimo mishya.

By’umwihariko, ishoramari rituruka mu mahanga  na ryo ryakomeje kwiyongera. Mu 2024 ryageze kuri miliyari 997 z’amafaranga y’u Rwanda (angana na miliyoni 872.9 z’amadolari ya Amerika), rivuye ku yasaga miliyari 1 y’amafaranga y’u Rwanda (miliyoni 716.5 z’amadolari mu 2023, bingana n’izamuka rya 21.8%.

RDB igaragaza ko iri zamuka ari ikimenyetso cy’icyizere abashoramari mpuzamahanga bakomeje kugirira u Rwanda, cyane cyane mu bijyanye n’imiyoborere myiza n’ubushobozi bwo gushyira mu bikorwa imishinga y’iterambere.

Ba uwa mbere mu kumenya amakuru agezweho!!!