Urwego rw’Igihugu rw’Iterambere (RDB) rwatangaje ko urwego rw’ubukerarugendo rwinjirije u Rwanda, milayiri 997 z’amafaranga y’u Rwanda (miliyoni 685 z’amadolari z’Amerika) mu 2025, avuye kuri miliyari 947 (miliyoni 647 z’amadolari z’Amerika) mu 2024.

Byasohowe muri raporo ngarukamwaka y’Urwego rw’Igihugu rw’Iterambere (RDB) y’umwaka wa 2025, igaragaza ishusho y’ishoramari, ubukerarugendo, ibyoherezwa mu mahanga, ndetse n’ubundi bucuruzi.

Ni izamuka ryagizwemo uruhare n’abashyitsi miliyoni 1,49 bingana n’izamuka 11% basuye u Rwanda bakuruwe n’ibyiza nyaburanga birimo Pariki z’Igihugu zitandukanye.

Harimo kandi Inama Mpuzahanga n’imurikabikorwa byinjirije u Rwanda asaga miliyari 141 (miliyoni 94.7 z’amadolari y’Amerika), zivuye ku yasaga miliyari 123 (miliyoni 84.8 z’amadolari z’Amerika) mu 2024 bingana n’izamuka rya 11% ku mwaka.

Mu bikorwa by’ingenzi byabaye muri 2025, harimo Shampiyona y’Isi y’Amagare (UCI Road World Championships 2025) yabereye bwa mbere muri Afurika muri Nzeri, Move Afrika, i Kigali yitabiriwe n’umuhanzi John Legend; Inama mpuzamahanga ihuza ibigo by’ikoranabuhanga izwi nka (Mobile World Congress: MWC), imikino ya Basketball African League yakinwe ku nshuro ya gatanu n’ibindi.

IyI raporo yagaragaje ko ibi bikorwa byagize uruhare rukomeye mu kongera umubare w’abasura u Rwanda, kongera kumenyekanisha igihugu ku rwego mpuzamahanga no guteza imbere urwego rw’ubukerarugendo rushingiye ku nama.

Ku bijyanye n’ibyoherezwa mu mahanga raporo ya RDB igaragaza ko agaciro k’ibyo u Rwanda rwoherezayo kuri miliyari 3.6 z’amadolari, ashingiye ku mikorere ihamye mu by’ubucukuzi bw’amabuye y’agaciro n’ubuhinzi bw’indabo n’imbuto.

Serivisi zoherezwa mu mahanga ziyongereyeho 2.7% ku mwaka, bikomeza kongera uruhare rwazo mu bukungu. Ubwikorezi bwo mu kirere bw’ibicuruzwa (air cargo) bwiyongereyeho 2.4% bugera kuri toni 6,257, buvuye kuri toni 6,113 mu 2024, bikomeza gufasha u Rwanda kugera ku masoko mpuzamahanga arimo u Burayi n’Uburasirazuba bwo Hagati.

U Rwanda rwakomeje gukoresha ubufatanye bufatika binyuze muri gahunda ya Visit Rwanda mu kongera kumenyekanisha izina ryarwo ku rwego mpuzamahanga no kureshya ba mukerarugendo n’abashoramari.

Mu 2025, u Rwanda rwongereye amasezerano y’ubufatanye na Paris Saint-Germain kugeza mu 2028, ndetse rwasinye amasezerano mashya y’imyaka itatu na Atlético de Madrid azageza mu 2028.

Hari kandi amasezerano y’igihe kirekire n’amakipe arimo Los Angeles Clippers na Los Angeles Rams azageza mu 2030.

Ni amasezerano yitezweho kongera kumenyekanisha u Rwanda ku rwego mpuzamahanga, gukurura ba mukerarugendo bafite ubushobozi n’abashoramari no gukomeza guteza imbere ishoramari n’Urwego rw’Ubukerarugendo bushingiye ku Nama n’Imurikabikorwa (MICE).

Ba uwa mbere mu kumenya amakuru agezweho!!!