Muhanga: Agakiriro kafungiwe amazi kubera ideni rya 100 000 Frws
Amakuru

Muhanga: Agakiriro kafungiwe amazi kubera ideni rya 100 000 Frws

Imvaho Nshya

October 10, 2023

Abakorera mu Gakiriro ka Muhanga gaherereye mu Kagari ka Gahogo, mu Murenge wa Nyamabuye, Akarere ka Muhanga, bataka ko nta mazi bafite mu gihe hashize imyaka irenga 4 bayafungiwe kubera ideni ry’amafaranga y’u Rwanda 100 000.

Bamwe mu bakorera n’abagenderera agakiriro ka Muhanga barasaba inzego bireba gukemura ibibazo bijyanye n’amazi kuko hashize igihe kirekire batayafite, bikaba byashyira ubuzima bwabo mu kaga.

Batangarije Imvaho Nshya ko hashize igihe kirekire batagira amazi bakabimenyesha Akarere n’abacunga Agakiriro inzego ntizigire icyo zibikoraho bakemeza ko batereranwe.

Umucungamutungo w’Agakiriro ka Muhanga, Mutuyeyezu Vedaste yatangarije Imvaho Nshya ko koko hashize igihe kirekire kirenga imyaka 4 batagira amazi kuko habuze uyishyura.

Ati: “Hashize igihe kirekire kirenga imyaka 4 nta mazi ku mpamvu zuko amazi yacunzwe nabi bageramo ideni ry’ibihumbi 100, habura uyishyura bituma ikigo cy’Isuku n’isukura, ishami rya Muhanga ribafungira”.

Yakomeje asobanura ko Agakiriro kakoresheje amazi nabi mu myaka ya 2018-2019 noneho mu 2019-2020 barayafunga ngo abakoreramo babanze bishyure umwenda w’amafaranga 100 000 bari bagejejemo.

Yemeza ko imwe mu mpamvu zaba zaratumye fagitire iba nini ni uko nta micungire ihamye yari ihari, kuko n’abaturage bahaturiye bajyaga kuvomayo.

Ati: “Imicungire y’amazi ntiyitaweho kuko n’abaturage bahaturiye bazaga kuhavoma. Kuva mu 2019-2023 nta mazi ahari ariko twabanje gukemura ibindi bijyanye n’imicungire yako. Ikibazo kigiye gukurikiraho, tugiye kuvugana na WASAC, tubishyure nibura bazadufungurire konteri 2 kuri 6 ziri mu gakiriro”.

Bamwe mu bakorera muri ako gakiriro bemeza ko nta mazi aboneka aho bakorera.

Munyankindi Sylvere yatangarije Imvaho Nshya ko ahamaze hafi imyaka irenga 4 ariko atigeze abona n’umunsi umwe amazi yabonetse ahubwo bahoraga bibutsa ubuyobozi ko amazi akwiye.

Abakorera muri aka Gakiriro bavuga ko batazi impamvu bamaze imyaka ine bafungiwe amazi

Yagize ati: “Muri aka gakiriro mazemo amezi 6 ariko nta n’umunsi umwe amazi yabonetse nkibaza impamvu ahantu hirirwa abantu bangana gutya hatari amazi, twanakwandura indwara zikomoka ku mwanda”.

Nyaminani Telesphore avuga ko bigaragara ko ubuzima bw’abakorera muri aka gakiriro bushobora kwibasirwa n’indwara bitewe no kutagira amazi meza.

Ati: “Ni byo rwose ubuzima bw’abakorera muri aka gakiriro buri habi kuko tuzengurutswe n’ibibazo birimo n’amazi, kutayagira byatuma ubuzima bwacu bushobora guhura n’ibibazo by’indwara zikomoka ku mwanda kandi zikaba zanafata n’abahagenderera umunsi ku munsi”.

Gasana Egide avuga ko batakiye ubuyobozi bw’Agakiriro bukababwira ko inzu icuruza amafunguro muri aka Gakiriro ari yo ifite uburenganzira bwo kugira amazi.

Yagize ati: “Twatakiye abayobozi b’Akarere ndetse n’ubuyobozi bw’Agakiriro burabizi ariko amazi ari kuri resitora, naho ahandi amarobine yose yarumye tukibaza niba ari ukuyimana ku bushake cyangwa hari ibwiriza ryo kubikora”.

Umucungamutungo w’Agakiriro avuga ko barimo kureba uko iki kibazo cyakemuka hakirindwa indwara zakomoka ku mwanda kandi abantu bakaba bayanywa cyangwa bakayakoresha.

Umuyobozi w’Akarere ka Muhanga wungirije ushinzwe iterambere ry’Ubukungu, Bizimana Eric avuga ko ubuyobozi bw’Agakiriro bwasabwe kwishyura amafaranga y’amazi.

Yagize ati: “Ubuyobozi bw’Akarere, twasabye ubw’agakiriro kwishyura amazi yakoreshejwe kugira ngo bafungurirwe, ariko kandi ntabwo bakwiye gutegereza ko twebwe nk’ubuyobozi tuza kubibutsa ko bakwiye kubikora barabizi ko amazi ari isoko y’ubuzima”.

Yongeyeho ko nk’ubuyobozi babibutsa ko bakwiye gukemura ikibazo cy’amazi kugira ngo hirindwe ibyorezo byaturuka ku mwanda, bubegera bubibutse ko isuku ibareba.

Agakiriro ka Muhanga kubatswe mu mwaka wa 2015.

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA