Muhanga: Ibitaro Perezida Kagame yabahaye byungutse serivisi zigoboka abahohotewe
Amakuru

Muhanga: Ibitaro Perezida Kagame yabahaye byungutse serivisi zigoboka abahohotewe

Imvaho Nshya

September 26, 2023

Hashize igihe abatuye mu bice bigize imisozi ya Ndiza mu Karere ka Muhanga basaba kwegerezwa serivisi z’Urwego rw’Igihugu z’Ubugenzacyaha(RIB) bajyaga gushakira kure y’aho batuye, by’umwihariko bakaba begerejwe Isange One Stop Center ku Bitaro bya Nyabikenke.

Mu kiganiro n’Imvaho Nshya, abo baturage bavuze ko bashimishijwe n’uko ibyo bitaro bahawe na Perezida wa Repubulika Paul Kagame byagejejwemo serivisi zifasha abahohotewe bidasabye ko bagana Ibitaro bya Kabgayi biherereye mu bilometero bisaga 40 cyangwa ngo bambuke uruzi bajya mu Karere ka Gakenke.

Abo baturage babikomojeho mu bukanguramba buhoraho RIB ikora yegera abaturage ikabasobanurira imikorere yayo, bwabereye Mudugudu wa Gatwa, mu Kagari ka Ruhina, Umurenge wa wa Kiyumba, ku wa 26 Nzeri 2023.

Tuyishime Sidonia avuga ko iyi serivisi yari ikenewe kuko uwo basambanyaga yagombaga kujya i Kabgayi cyangwa hakurya y’uruzi muri Gakenke, kugira ngo asabe serivisi.

Yagize ati: “Ntabwo byatworoheraga kubona serivisi ku bahuraga n’ibibazo by’ihohoterwa kuko twajyaga i Kabgayi cyangwa i Ruli muri Gakenke; baradufashije cyane kandi buri wese afite uburenganzira bwo gutanga ikirego kigakurikiranwa kandi ukarindirwa umutekano, uwafuditse akabibazwa.”

Tuyisenge Isaac yemeje ko bamwe muri bo batari bazi serivisi zitangirwa muri Isange ariko bazimenye kandi bagiye kuzibwira n’abandi.

Yongeyeho ko bidakwiye ko abantu bahisha amakuru y’umuntu wahohotewe, ahubwo akwiye kurindwa no kugana Isange agafashwa bikimara kuba.

Yagize ati: “Ntabwo twari twakamenye serivisi zitangirwa muri Isange One Stop Center ariko turazisobanukiwe kandi tugiye kuzibwira n’abandi kandi uzajya ahohoterwa agomba kwihutira kugera kuri Isange agafashwa kubona uburenganzira bwe, gusa twumvise ko dukwiye kujya dutanga amakuru ku muntu wakorewe ihohoterwa kuko hari aho bahisha bene ibi bikorwa byangiza uburenganzira bw’ikiremwamuntu”.

Umukozi w’Urwego rw’Igihugu rw’Ubugenzacyaha (RIB) ushinzwe ububiko bw’Ibirego n’iyandika ryabyo Njangwe Jean Marie, yasabye ababyeyi kurinda abana babo abafite imigenzereze mibi yatuma babahohotera.

Umuyobozi w’Ububiko bw’Ibirego no kwandika ibirego Njangwe JM asaba abaturage gukoresha neza Isange One Stop Center ntibangize ibimenyetso


Yagize ati: “Ntabwo RIB ije kubafata ngo ibafunge, ije kubegereza serivisi mwajyaga gushaka kure y’aha mutuye. Ariko mukwiye kugira uruhare mu kurinda buri wese ihohoterwa kuko abana banyu mutuma amazi ahantu hashobora gushyira ubuzima bwabo mu kaga ndetse rimwe na rimwe ugasanga utumye umwana kuri butiki akaza afite ibyo yaguriwe n’abandi bantu utazi, bashobora kwinjirira muri icyo cyuho bakamuhohotera”.

Akomeza abibutsa ko serivisi zitangwa muri Isange One Stop Center  zitagenewe uwahohotewe gusa kuko n’undi wese ashobora gutanga ikibazo kikakirwa.

Nsabimana Habuni  Jean Paul, Umuyobozi Ushinzwe guhuza ibikorwa bya Isange ku rwego rw’Igihugu muri RIB, yabwiye abaturage ko mu gihe uhuye n’uwakorewe ihohoterwa ugomba kumugira inama akagana  Isange One Stop Center yambaye uko yari yambaye ahohoterwa kugira ngo ibimenyetso bidasibangana.

Yagize ati: “Ntabwo umuntu wahohotewe ajya kwitunganya ngo aze kuri Isange oya uhita umuzana uko ameze kugira ngo ibimenyetso bibungabungwe kuko iyo wafashwe ku ngufu ugakuramo imyenda bagusambanyije wambaye  cyangwa ukoga uba wangije ibimenyetso iyo utugezeho tubura icyo tugukorera”.

Mu zindi serivisi zitangirwa muri Isange One Stop Center harimo ubujyanama mu by’ihungabana na serivisi y’icumbi kuko uwahohotewe acumbikirwa kuri Isange  akaganirizwa kugira ngo arindirwe n’umutekano atongera gukorerwa irindi hohoterwa rishobora kumuviramo no kwamburwa ubuzima.

Kugeza ubu mu Rwanda Ibitaro 48 byo ku rwego rw’Akarere bitanga serivisi za  Isange One Stop Center kandi habamo abajyanama ku bijyanye n’amategeko, abagenzacyaha, abajyanama b’ihungabana n’abatanga ubuvuzi ku wahohotewe yaba yakubiswe cyangwa yasambanyijwe.

Abaturage bishimira ko ibitaro bahawe na Perezida Kagame byungutse serivisi nshya

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA