Muhanga: Uwarohamishije abana 10 bagapfa yasabiwe igifungo cy’imyaka 2
Amakuru

Muhanga: Uwarohamishije abana 10 bagapfa yasabiwe igifungo cy’imyaka 2

Imvaho Nshya

August 8, 2023

Ndababonye Jean Pierre ukurikiranyweho icyaha cy’ubwicanyi butagambiriwe bwahitanye abana 10 muri 13 bari mu bwato barohama muri Nyabarongo hagati ya Ngororero na Muhanga,  yasabiwe gufungwa imyaka ibiri n’ihazabu ya miliyoni ebyiri.

Icyo cyaha Ndababonye  yagikoze ku itariki 17 Nyakanga mu Murenge wa Mushishiro, mu Karere ka Muhanga,  ubwo ubwato yari yashyizemo abana 13 bwarohamaga, 10 muri bo bakitaba Imana.

Ndabamenye ashinjwa kuba abo bana yari abajyanye mu mirimo kandi badafite imyaka y’ubukure, kuba yarahaye umwana umwe muri bo ngo atware ubwato, kuba  yarabatwaye atabimenyesheje ababyeyi babo ndetse akarenza umubare w’abari bemerewe kubugendamo.

Ubushinjacyaha buvuga ko Ndababonye yarengeje umubare w’abantu batatu nyir’ubwato yari yamubwiye ko ari bo babujyamo.

Ubushinjacyaha bishingiye kandi ku birego by’ababyeyi baburiye abana mu irohama ry’ubwo bwato, bavuga ko Ndababonye atari abigambiriye.

Umushinjacyaha avuga ko iperereza ryakozwe ryagaragaje ko ubwo bwato bwari bwaratobotse, ndetse ibimenyetso by’imibiri ya ba nyakwigendera 10  yapimwe kwa muganga byaragaragaje ko bishwe n’amazi.

Abana batatu barokotse bavuga ko babugiyemo Ndababonye ababwiye ko agiye kubaha akazi ko kwikorera  amategura kandi ko bagihaguruka ubwato bwinjiyemo amazi, kuko bwari bwarasadutse hanyuma bakarohama.

Ubushinjacyaha bushingiye kuri ibyo bimenyetso, bwasabiye Ndababonye igifungo cy’imyaka ibiri n’ihazabu ya miliyoni ebyiri z’Amafaranga y’u Rwanda.

Urukiko rwavuze ko Ndababonye yishe itegeko ry’umurimo riteganya imirimo ibuzanyije ku bana batarageza imyaka 18.

Ndababonye  yavuze ko ibyo yakoze atari azi ko bibujijwe, asubiza ko asaba imbabazi kandi ko ibyabaye bitamuturutseho, akemera icyaha agasaba imbabazi.

Ati: “Ndumva rwose icyaha nkemera.

Rwose ni ikosa nabirenzeho ntabizi, ndabisabira imbabazi”.

Urukiko rwasabye ubushinjacyaha kuba ragabanya ibihano hakaba hanabaho gusubika igihano cyahawe Ndababonye kuko yabikoze atabizi, umushinjacyaha arabihakana, amusabira ko afungwa.

Urubanza rwabereye mu ruhame aho icyaha cyabereye mu Murenge wa Mushishiro kuri uyu wa Kabiri tariki ya 8 Kanama, ariko ruzasomwa tariki 15 Kanama 2023 ku Rukiko rw’Ibanze rwa Nyamabuye.

Yanditswe na NYIRANEZA JUDITH 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA