Musanze: Bacukura amabuye bakinjiriza abatabaha ibikoresho by’ubwirinzi
Amakuru

Musanze: Bacukura amabuye bakinjiriza abatabaha ibikoresho by’ubwirinzi

Imvaho Nshya

October 11, 2023

Abakora umurimo w’ubucukuzi bw’amabuye bo mu Karere ka Musanze mu Mirenge inyuranye, bavuga ko babangamiwe n’abakoresha babo batabaha ibikoresho by’ubwirinzi mu gihe bari mu kazi, bakaba babona ntagikozwe bashobora kuhakura ubumuga.

Ubucukuzi bw’amabuye ni kimwe mu mirimo isaba ingufu n’ubwirinzi bukomeye, ariko bamwe mu bakoresha ntibita ku bijyanye no kurinda abakozi, ibi bintu rero ngo bibagiraho ingaruka.

Basabose Eric wo mu Murenge wa Muko, ukora ubucukuzi bw’amabuye yo kubaka mu Kagari ka Mburabuturo, Umudugudu wa Bugese, yavuze ko bababazwa no guha imbaraga abakoresha babo ariko bo ntibite ku buzima bw’ababakorera.

Yagize ati: “Kuba twebwe duha imbaraga zacu abakire bo ntibite ku buzima bwacu ni ibintu  bitubabaza cyane. Reba nk’ubu kwishora muri kiriya cyobo, ibuye ryaturuka hejuru rikamena umutwe, nta nkweto za boti mfite ibuye ryansha umurundi, nta turindantoki (Gants) wabona hano. Ibi bintu rero bitugiraho ingaruka zikomeye ku buzima bwacu kuko hari n’abahamugarira cyane ko buriya nta n’ubwishingizi tugira ngo niba kuye ubumuga hano bamvure”.

Himbaza Marie Helene,  umwe mu bakozi bo kwa rwiyemezamirimo witwa Nkurunziza Pierre akaba cukura amabuye  ayakuramo garaviye n’umucanga mu Kagari ka Mburabuturo, avuga ko hari umuntu wakuye ubumuga muri ako kazi kubera kubura ubwirinzi akaba yaraheze mu nzu kuko ibuye ryamwituye ku kirenge.

Ati: “Ba rwiyemezamirimo nta mpuhwe batugirira, apfa kubona gusa umusore azanye umutarimba, agahita amushora ku rutare, akarucukura kugeza ageze muri metero 20, nta nkweto, nta ngofero ubwo akumva ko yamuhaye akazi ariko ntiyite ko ashobora kuhahurira n’ingorane. Twebwe nk’ubu rwiyemezamirimo Nkurunziza Pierre hari umusore umaze imyaka igera kuri 2 arembeye mu rugo kubera imvune yakuye mu bucukuzi bw’amabuye ye, kandi nta bwishingizi bundi yamushyizemo ngo nibura azahabwe indishyi”.

Nzabahimana Fidele ukora mu bucukuzi bw’amabuye yo kubaka, na we asanga abakora mu bucukuzi bakwiye kwitabwaho by’umwihariko, kuko asanga badafatwa mu buryo bwa kimuntu.

Yagize ati: “Uyu murimo wacu ntabwo bawuha agaciro, rwiyemezamirimo agushora mu kirombe, agahondagura amabuye, amwe akugwa mu kanwa, rero nka twe dukora ku mashini zabo zisya amabuye imitima yazibye kubera ivumbi. Nta dupfukamunwa twabugenewe tugira, n’ibindi bikoresho byo kwirinda kubera ko nyine tuba twabuze uko tubigenza uremera ukiyahura ariko dukwiye ubwishingizi ni ukuri kandi ibi bintu inzego zikabikurikirana”.

Uyu mugabo akomeza avuga ko ngo kuba hari ibikoresho byo kwirinda badahabwa bituma bahora basemeka kubera ko nta dupfukamunwa bagira, abandi ngo kubera guhonda imitarimba badafite uturindantoki bamwe barwara ibisebe mu ntoki bagahitamo kureka akazi kandi ngo na byo hashize igihe ntibahabwe ubufasha bwa ba rwiyemezamirimo.

Imvaho Nshya yegereye bamwe muri ba rwiyemezamirimo bacukura amabuye ndetse bakanayatunganya, bavuga ko hari bimwe mu bitagenda neza bagiye gukosora nk’uko Habitegeko Barnabe yabitangaje.

Yagize ati: “Ibikoresho byo kwirinda barabifite ikibazo ni uko batabyikoza ngo ni ku zuba gusa; tugiye kubishyiraho umwete tubashakire inkweto za bote, ingofero kimwe n’uturintoki, gusa uyu munsi bwo n’ubwo bari gukora batambaye ibikoresho bibarinda ubutaha muzasanga babifite”.

Rwiyemezamirimo Nkurunziza Pierre we avuga ko hari igihe ibikoresho byo kwirinda asanga ari ngombwa.

Yagize ati: “Niba umukozi atari mu cyobo acukura amabuye, ni ngombwa ko yambara ingofero. None se uwikoreye igikarayi na we wavuga ngo niyambare ingofero, igikarayi cyangwa ku bijyanye n’inkweto ndizera ko bamwe batazambaye ubwo nyine barenze ku mategeko ariko ibi turakomeza tubibashishikarize. Ku byerekeye ubwishingizi bwo ndumva Mituweli ihagije, iyo bakomeretse bajya kwivuza bisanzwe”.

Umunyamabanga Nshingwabikorwa w’Umurenge wa Muko Bisengimana Janvier, avuga ko bidakwiye ko umukozi ajya mu bucukuzi bw’amabuye adafite ubwirinzi, gusa ngo bakomeza gukora ubukangurambaga.

Yagize ati: “Uburenganzira bw’umukozi ni ngombwa, akwiye ibikenerwa byose kugira ngo akore akazi ke neza, aha rero niba koko abo ba rwiyemezamirimo badaha abakozi ibyo kubarindira ubuzima, tugiye kubikurinda tubahe inama, kandi buri gihe mu nama dukorana na bo tuganira kuri icyo kintu.

Ubu tugiye gusura buri wese turebe koko niba nta byangombwa nkenerwa ku buzima bw’umukozi ucukura uhonda amabuye afite, ndasaba kandi abo bose bacukura nta byangombwa kubihagarika bakuzuza ibyo basabwa”.

Ukora mu mirimo ijyanye n’ubucukuzi wese akwiye kuba afite ingofero yabigenewe, inkweto za bote, uturindantoki, agapfukamunwa byaba na ngombwa agahabwa indorerwamo zabugenewe, ariko henshi ntabwo byari byumvikana ku bakoresha.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA