Musanze: Abamotari barasaba Polisi y’u Rwanda kubagarurira abapolisi
Amakuru

Musanze: Abamotari barasaba Polisi y’u Rwanda kubagarurira abapolisi

Imvaho Nshya

October 13, 2023

Abatwara abagenzi kuri moto mu Mujyi wa Musanze, bavuga ko babangamiwe n’abitwa abamamyi bateza umutekano muke, bakaba basaba Polisi ko yasubiza abapolisi kuri parikingi y’abamotari nk’uko byari bisanzwe kuko iyo bahari bituma umutekano uba nta makemwa.

Kuva aho amakoperative y’abamotari asenyukiye abamotari bakomeje kujya batwara abantu n’ibintu ariko noneho buri wese yirebaho ku giti cye akora ibyo yishakiye.

Abari basanzwe bavuga ko binjiriwe n’abamotari bashya ari na bo bitwa abamamyi kuko binjiye mu mwuga nta handi hantu bigeze babarizwa, bikaba bihora bikurura amakimbirane kugeza n’ubwo barwana.

Hakizimana Viateur yagize ati: “Kuri ubu dufite ikibazo cy’abamotari bashyashya twita abamamyi badashobora kumva amabwiriza twishyiriyeho nyuma y’uko amakoperative yacu asenyutse. Aba rero baraza bagaparika neza mu  muryango wa parikingi, kugeza ubwo hano twirirwa turwana, twifuza ko Polisi yakongera ikaza hano hafi nk’uko byari bisanzwe byadufasha kugarura umutekano”.

Muhizi Jean Paul asanga kuba abamotari bakora nta mategeko basa n’abagenderaho kubera ko abamamyi binjije mu gutwara abagenzi batabyemerewe ari yo mpamvu bahora mu makimbirane.

Yagize ati: “Ubu hano dukeneye ko Inzego z’umutekano zitwegera kuko abamamyi batumereye nabi kuko bituma ari twe bantu duhora turwanira hano muri uyu Mujyi kandi hakorera amatsinda menshi.

Muhizi Jean Paul arasaba ko Polisi y’u Rwanda yabahora hafi kugira ngo hatazagira umumotari wica undi

Ibi rero bituma batwandikira amande menshi kubera guparika mu kavuyo, abandi bakaza  bihishe mu gutwara abagenzi bakiba bakambura ku buryo hari n’abagenzi batanga nk’inoti ya bitanu umumamyi akiyirukira ntamugaruze, Polisi nikore akazi kayo kuko hano umutekano ntawo hari ubwo muzasanga umwe yiciye undi kuri parikingi”.

Umwe mu bamamyi yagize ati: “Nta makoperative azwi cyangwa se urundi rwego ruharanira inyungu z’abamotari muri uyu mujyi, nta mpamvu rero njyewe nagura moto  mu gihe mbonye akanya nk’aka ngo ntakora kugeza igihe amakoperative azongera kugarukiraho, kuba bavuga ko duteza umutekano muke ni byo koko nta byera ngo de harimo abashobora kurwana kubera nyine imyitwarire mibi cyane ko baba bazi ko nta rwego rurabafatira ibyemezo. Nanjye nshyigikiye ko Polisi ibi bintu ibigiramo uruhare, ariko nanone bakihutisha ishyirwaho ry’amakoperative”.

Umuvugizi wa Polisi y’u Rwanda mu Ntara y’Amajyaruguru Supertendent Jean Bosco Mwiseneza, we asaba abatwara abagenzi kuri moto gukomeza kubungabunga umutekano wo mu muhanda ngo kuko ari inshingano ya buri wese.

By’umwihariko yavuze ko ikibazo cy’aba bamotari kigiye gukurikiranwa n’ubwo rimwe na rimwe abapolisi baba bagiye ahandi mu mujyi gucunga umutekano w’abantu n’ibyabo.

Yagize ati: “Abapolisi bafasha abamotari gucunga umutekano wabo barahari, ariko kubera ko haba ubwo bajya mu zindi nshingano gucunga umutekano; abamotari babaca mu rihumye bakikorera ibyo bashatse, nyamara baba bahari bakitwara neza.

Tugiye gushaka umuti urambye iki kibazo gikemuke, kandi bumve ko na bo nk’abantu bakuru bakwiye kwibungabungira umutekano mbese bakabigira ibyabo batarindiriye guhozwaho ijisho”.

Akomeza avuga ko niba hari itsinda ryiyise abamamyi riteza umutekano muke mu kimpotari, bakwiye kujya bahamagara Polisi ikabafasha gukemura ikibazo cyaba kivutse, kandi ngo bakwiye kwirinda ubushyamirane bwa hato na hato cyane ko biri mu bigize icyaha.

Amakoperative yasheshwe mu mwaka wa 2021, kuko byagaragaye ko hari amwe muri yo yacungaga nabi umutungo w’abanyamuryango.

PROTAIS NGABOYABAHIZI

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA