Musanze: Amakoperative yafashije abafite virusi itera SIDA kwiteza imbere bikuraho akato
Amakuru

Musanze: Amakoperative yafashije abafite virusi itera SIDA kwiteza imbere bikuraho akato

NYIRANEZA JUDITH

March 21, 2024

Abanyamuryango ba koperative Girubuzima Nyange bavuga ko kuba mbere barahabwaga akato kuko bari bafite virusi itera SIDA, byaje kugabanywa n’uko bishyize hamwe, bagakora ubuhinzi biteza imbere, ibyo bituma n’abandi babibonamo ntibongera kubakorera iheza n’akato.

Abo banyamuryango bavuga ko batagikorerwa akato n’ihezwa nka mbere bitewe n’uko bibumbiye muri koperative ihinga ibirayi na tungurusumu bakagaragaza ko bashoboye ibikorwa by’iterambere, bituma n’abadafite iyo virusi baza kwifatanya na bo.

Ibi byagarutsweho mu mahugurwa yahawe abanyamakuru bakora inkuru z’ubuzima bibumbiye muri ABASIRWA yateguwe ku bufatanye n’Urugaga Nyarwanda rw’Abafite virusi itera sida (RRP+).

Umuyobozi wa koperative Girubuzima Nyange iherereye mu Kagari ka Ninda, mu Murenge wa Nyange, Akarere ka Musanze yatangarije Imvaho Nshya ko   mbere abantu babahaga akato n’ihezwa, ariko nyuma babonye bafite ibikorwa baza kwifatanya na bo.

Ati: “Mbere tutaribumbira mu makoperative twakorerwaga akato gakabije cyane n’umuryango wawe ndetse n’umugore wawe yasanga we adafite virusi itera SIDA, ugasanga hari ikibazo, ariko tumaze kujya mu makoperative, tubona imiti twumva ko dufite gukora ubuvugizi tukabona imiti.

Twatangiye turi abantu 7, twajya guhinga abantu bakatunnyega abandi ntibaze, ariko tumaze kubona imiti, twagize imbaraga turahinga twagize agaciro ku muryango wacu bituma n’abandi badafite virusi badusanga.”

Yongeyeho ko icyo gihe byagabanyije akato n’ihezwa cyane.

Ayi: “Tumaze kugira ibikorwa n’abadafite ikibazo baradusanze bituma rya heza rigabanyuka ku buryo twavuga nta hezwa n’akato ku kigero cya 99%, hasigaye nka 1% na ryo riterwa n’imyumvire.”

Perezida w’Urugaga Nyarwanda rw’Abafite virusi itera SIDA (RRP+) Muneza Sylvie yavuze ko akato kari gahari ariko kagiye gacika.

Yagize ati: “Akato mbere kari gahari cyane, ariko tumaze kubakangurira kujya mu makoperative cyane cyane ko ubushakashatsi bwakozwe mu 2022 bwagaragazaga ko kugir ango umuntu agire akato cyane cyane wasanganga harimo n’ubukene, biba ngombwa ko dutekereza ukuntu abanyamuryango bakwikura mu bukene, tubakangurira kujya mu makoperative tubakorera ubuvugizi, bahinga ibirayi kandi bafite byinshi bakora.”

Yashimangiye ko akato mbere kari gahari, ariko ubu akurikije ubukangurambaga nibura kagabanyutseho 90%.

Undi munyamuryango yavuze ko kwibumbira muri koperative byabakuye mu bwigunge n’ubwihebe.

Ati: “Koperative nyikesha byinshi twavuye mu bwigunge tukimara kuva mu ngo twashishikarijwe kuva mu bwigunge twari twarihebye, twumvaga ko ufite virusi itera SIDA atashobora kugira icyo akora. Muri koperative hajemo n’abandi byabaye ngombwa ko ako kato kahava noneho turasangira. “

Ashimira RRP+ yababaye hafi, ikabitaho ikabaha n’amahugurwa, kuko biri mu byagiye bibakomeza, bikabaremamo icyizere.

Koperative Girubuzima Nyange yatangiye mu 2006 ifite abanyamuryango 7 gusa, ariko kubera guhindura imyumvire kuri virusi itera SIDA ubu ifite abanyamuryango 38 barimo 20 bafite virusi itera Sida.

Koperative Girubuzima ikora ubuhinzi bw’ibirayi na tungurusumu, yubatse ubwanikiro ku bufatanye n’abaterankunga, RRP+ yabahaye miliyoni 2,5.

Ubushakashatsi bwakozwe n’Urugaga Nyarwanda rw’Abafite Virusi itera SIDA mu mwaka wa 2019-2020 bwagaragaje ko urubyiruko  48%, abagore 22.4%  n’abagabo 34.8%  bafite virusi itera SIDA bakorewe ibikorwa byo guhabwa akato.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA