Musanze: Gukingira COVID-19 ntibyateje ikibazo ku buzima bw’uwakingiwe
Amakuru

Musanze: Gukingira COVID-19 ntibyateje ikibazo ku buzima bw’uwakingiwe

NTAWITONDA JEAN CLAUDE

June 22, 2023

Umuyobozi w’Ikigo Nderabuzima cya Musanze, mu Kagari ka Rwambogo Gilbert Nduwayezu, yavuze ko bakomeje kugira uruhare mu kurwanya no guhangana na COVID-19, kandi ko urukingo ntawe rwagizeho ingaruka.

Ati: “Bimwe mu bikorwa dukomeje gukora ni ugukingira. Igikorwa cyo gukingira n’ubu turakingira nk’uko gahunda ya Leta  ibidushishikariza, kandi dukomeje gushishikariza abaturage ubwirinzi bwa COVID-19 n’izindi ndwara z’ubuhumekero harimo kugira isuku muri rusange bakaraba intoki,  bambara agapfukamunwa”.

Hari gahunda yitwa TT (Test to Treat) yo gupima abantu bose batugana cyangwa tukanabasanga iwabo,  uwo dusanze arwaye turamuvura dukoresheje umuti witwa  vaxilovide.

Yakomeje avuga ko kugera mu mataliki ya 8 Kamena 2023, imibare y’abamaze gukingirwa yari 62 270 muri iyo zone, aho abahawe urukingo rwa 1 bari 38238, Abafasha urukingo rwa kabiri ni 20 131, abakingiwe urwa gatatu bari 2868 naho abafashe urwa kane ni 1033.

Ati: “Tugeze mu cyiciro cyo gukingira abana bari hagati y’imyaka 5-11. Tubakingirira ku bigo by’amashuri. Abikingije bashishikarizwa gukomeza kwirinda kuko bishoboka ko n’uwikingije yarwara. Ntawugeze agira ingaruka zishingiye ku kwikingiza.”

Akomeza avuga ko ubwirinzi ari ugukomeza gushishikariza abaturage  bose gukaraba intoki no kwambara agapfukamunwa aho bishoboka, kugira isuku buri munsi no kuganiriza abaturage nibura 3 mu cyumweru.

Ati: “Iyo urwaye tuguha imiti,  tukakubwira uko witwara, tukakubwira n’umunsi uzagaruka twasanga uri muzima ugataha. Iyo dusanze urwaye tugushyira mu cyumba tukakwitaho twebwe ubwacu.

Ntawagize ikibazo biturutse ku rukingo ntawagaragaje ingaruka z’urukingo”.

Imyumvire y’ababyeyi ku rukingo yarahindutse

Umuyobozi w’Urwunge rw’Amashuri rwa Ntarama ya Gashaki, Birikunzira Daniel, yavuze ko abanyeshuri bagejeje igihe cyo gukingirwa bitabira kandi n’ababyeyi babyumva neza nubwo mu ntangiriro hari bamwe babanje kugira kwinangira. 

Ati: “Ikingira rigitangira habayeho umubare muto w’ababyeyi batabyumvaga, dufatanyije n’Ikigo Nderabuzima cya Gashaki dutumiza inama rusange y’ababyeyi barabisobanurirwa buzuza ifishi z’abana basinyeho, bitabira gukingiza abana.

Abamaze gukingirwa ni 315 hasigaye gukingirwa 90 bakingiwe doze ya mbere bategereje igihe. Imyumvire y’ababyeyi basobanuriwe akamaro k’urukingo barabyumva neza.”

Mbarubucyeye Xaverine warwaye COVID-19 akayikira ahamya ko kuyikingiza nta ngaruka byamuteye

Gasanabandi Nicole, umuforomo ushinzwe gukingira COVID-19 ku Kigo Nderabuzima cya Gashaki, giherereye mu Murenge wa Gashaki mu Karere ka Musanze, yavuze ko kugeza ubu nta mwana barakingira ngo agire ikibazo.

Byari biteganyijwe gukingira abana 60, ku Rwunge rw’amashuri rwa Ntarama, aho ashima uburyo bakorana n’Ikigo cy’amashuri cya Ntarama.

Umuyobozi w’Urwunge rw’Amashuri Ntarama yavuze ko ababyeyi basobanuriwe ibyiza byo gukingira, hagenzurwa niba umwana wari uteganyijwe gukingirwa yabikorewe. Umuyobozi w’Ikigo Nderabuzima n’Umunyamabanga Nshingwabikorwa w’Umurenge bagira uruhare mu igenzura.

Imibare y’abateganyijwe gukingira mu mwaka wa 2 no mu y’inshuke wari 315, hari hasigaye abana 90 bo bari batarageza igihe cyo gufata urukingo rwa 2 ku bakingiwe ku ya 19 Gicurasi 2023.

Abikingije batanga ubuhamya ko nta kibazo bagize

Munyaneza Elisa wo mu Murenge wa Musanze yavuze ko abaturage basobanuriwe neza ingamba zo kwirinda  COVID-19, bakomeza gukaraba intoki no kwambara agapfukamunwa kuri bamwe na bamwe.

Yongeyeho ko muri rusange COVID-19 yacitse ariko ko abantu bakomeje kwirinda ndetse no kwipimisha. Ati: “Nk’ubu naje hano kwa muganga, ndavuga ngo reka nipimishe. Aho ntuye nta bantu nigeze numva baseta ibirenge ku gufata urukingo”.

Uwitwa Mbarubucyeye Xaverine utuye mu Mudugudu wa Nyarubande,  mu Kagari ka Rwambogo, Umurenge wa Musanze  mu Karere ka Musanze warwaye COVID-19 akayikira avuga ko yatangiye akorora, guhumeka bikamugora, agiye kwa muganga bamupimye asanga arwaye, bamuha imiti arayinywa arakira kandi ngo nta ngaruka byamuteye.

Umuyobozi w’Urwunge rw’amashuri rwa Ntarama, Birikunzira Daniel, ahamya ko ababyeyi bahinduye imyumvire ku rukingo rwa Covid-19

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA