Musanze: Hagaragajwe impamvu z’itumbagira ry’ibiciro by’ibirayi
Amakuru

Musanze: Hagaragajwe impamvu z’itumbagira ry’ibiciro by’ibirayi

Imvaho Nshya

September 20, 2023

Ibiciro by’ibirayi byaratumbagiye ari ibyo kurya ndetse n’imbuto, ikibazo bamwe mu baturage bakomeje kwibaza niba ibi biciro bizagera ubwo bigabanyuka, bagasaba Leta ko mbere na mbere yagira uruhare mu kubonera imbuto ku gihe kimwe n’ifumbire.

Bamwe mu baturage bo mu Karere ka Musanze ahakunze kuvugwa ko ari ikigega cy’ibirayi baganiriye n’Imvaho Nshya bayigaragariza impamvu zinyuranye z’izamuka ry’ibiciro by’ibirayi.

Umuhinzi w’ibirayi mu murenge wa Kinigi Nzabarinda Isaac yagize ati: “Mu mateka yacu nk’abahinzi b’ibirayi ni bwo duhuye n’ikibazo nk’iki. Icya mbere twahuye n’ikibazo cy’imvura nyinshi, nyuma yaho izuba ryabaye ryinshi muri ibi bice, ikindi nanone hari ubwo ifumbire itazira igihe tekereza kugira ngo mu mujyi wa Musanze ikilo cy’ibirayi bya Kinigi iyi nziza ni amafaranga 1200, muri Kigali ho numvise ko ari 1500, bigakubitiraho ko n’ubwo imbuto ibura bitewe n’umusaruro iyo utabonetse ubwo urumva ko n’imbuto itaboneka”.

Umurenge wa Nyange, mu Kagari ka Kabeza Ntakirutimana Philomene, na we ashimangira ko izuba ryatumye ibirayi bitaboneka.

Yagize ati: “Imvura yangije ibyo twari twateye, nyuma yaho duteye ibindi aho kugira ngo dusarure dusanga byose nta kirayi wabona ukuramo ibyo kurya kuko ku giti nibura kimwe wakuragaho uturayi dutatu natwo udashobora guhata.

Ikindi ni uko n’ibyo twari twarahinze mbere byaheze mu butaka kubera umuswa wabibujije gukura, dukeneye ko Leta yashakisha imbuto hose binyuze mu batubuzi kandi ikibazo cy’ifumbire kigakemuka ikajya ibonekera ku gihe”.

Umwe mu baturiye Umujyi wa Kigali, mu Murenge wa Remera Nsanzubuhoro, avuga ko ibirayi kuri ubu birya umugabo bigasiba undi
Yagize ati: “Kuri ubu ikilo cy’ibirayi bya bimwe bita mucoma ikilo ni amafaranga 1500, urumva rero ko bikaze mu gihe ibishyimbo ari 1200, urumva ubwo umuntu yagusura ukirirwa uvuga ngo uragura ibirayi se?ya! twayobotse agahunga, numva inzego bireba zashyira imbaraga mu kuzamura ibirayi bikaboneka mu bwinshi no mu bwiza”.

Umwe mu batubuzi b’imbuto y’ibirayi wabigize umwuga mu Murenge wa Kinigi, ukorana n’ikigega SPF Karegeya Appolinaire na we ashimangira ko ikirere cyabigezemo uruhare ariko ko barimo gushakira umuti urambye ikibazo k’ibura ry’ibirayi

Yagize ati: “Ikibazo cy’ibura ry’ibirayi kigenda gifata indi ntera kugeza ubwo ikilo kigura amafaranga asaga 1000, ibi byose rero byatewe n’ihindagurika ry’ibihe, ubundi muri kano gace twagiraga imvura mu mpera z’ukwezi kwa Kamena none ntayo twabonye, ibiza kandi byibasiye ibice byinshi byeramo ibirayi mu Ntara y’Iburengerazuba n’Amajyaruguru kandi uzi ko ari ikigega cy’ibirayi, kuri ubu rero nkatwe dutubura ibirayi twafashe ingamba zo gutubura imbuto y’ibirayi ku bwinshi, ikibazo gikomeye ahubwo ni uko tutamenya n’abahinzi bakeneye imbuto y’ibirayi kugira ngo n’iyo dufite tuyibasaranganye”.

Karegeya yongeraho ko ngo uretse no kuba hari imbuto zirimo gutuburwa ziri muri Green House nk’abantu bakorana na SFP bafite imbuto mu bigega byabo imbuto igera kuri toni 16000, bafite bigera kuri24 mu gihugu kuri ubu imbuto igura 1200 ku kilo, ariko nawe ashimangira ko kubonera imbuto n’ifumbire ku gihe byatuma bashobora guhashya ibura ry’ibirayi, kandi banki na yo ikajya itanga inguzanyo ku bahinzi ikazira ku gihe ndetse n’abafite ubuhinzi mu nshingano zabo basabwa kubigiramo uruhare cyane.

Guverineri w’intara y’Amajyaruguru Mugabowagahunde Maurice na we ashimangira ko imbuto y’ibirayi ari kimwe mu byatumye ibirayi bihenda.

Yagize ati: “Izuba ryaravuye nyuma y’aho imvura yangije imyaka mu mezi Mata na Gicurasi, 2023 ku buryo n’ibirayi bateye muri Kanama 2023 nabyo byaheze mu butaka, turakomeza gushishikariza abatubuzi gushakisha uburyo imbuto yaboneka ku bwinshi, ikindi abacuruza ibirayi ntibakwiye kuba ba rusahurira mu nduru ngo bazamure ibiciro uko bishakiye”.

Guverineri w’intara y’Amajyaruguru Mugabowagahunde Maurice

Umuyobozi wa RAB Station ya Musanze Rukundo Aimable yemeranya n’abahinzi ko ihindagurika ry’ibihe ryagize uruhare mu izamuka ry’igiciro cy’ibirayi.

Yagize ati: “Kimwe byatumye igiciro cy’ibirayi kizamuka harimo imihindagurikire y’ibihe, kuko imvura yabaye nyinshi yangiza ibirayi byari byatewe, nyuma y’aho nabwo izuba riba igikatu ryica ibyari bimaze guterwa, ku byerekeye ifumbire hari ubwo ishobora kuza itinze ariko rero, ubu hafashwe ingamba ko ifumbire izajya ibonekera igihe, turakomeza gukangurira abatubuzi b’imbuto kuzitubura ku bwinshi kandi abahinzi na bo turakomeza kubegera twumva neza ibikenewe kugira ngo umusaruro urusheho kongera kwiyongera”.

Kugeza ubu mu Karere ka Musanze hafatwa nk’ikigega cy’ibirayi imbuto igura amafaranga 1200, mu gihe ibirayi byo kurya bimwe bita mucoma ari amafaranga 1000, bikaba bikomeje gutera abaturage guhangayika kuko ibirayi ari kimwe mu bigize amafunguro yabo.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA