Musanze: Nkongwa yibasiye ibigori bikiri mu gihe cy’ibagara
Amakuru

Musanze: Nkongwa yibasiye ibigori bikiri mu gihe cy’ibagara

Imvaho Nshya

October 12, 2023

Bamwe mu bahinzi bo mu Karere ka Musanze bahinga ibigori, bavuga ko batewe impungenge na Nkongwa ikomeje kubarira ibigori bitararenga n’igihe cy’ibagara, bakaba nta cyizere bafite ko hari icyo bazasarura muri iki gihembwe cy’ihinga.

Hamwe mu ho Imvaho Nshya yageze nko mu Murenge wa Cyuve, ku gasozi Indatwa ka Rutemba, hahinze ibigori ku buso bungana na hegitari 75.

Abahinzi bavuga ko inzego bireba zitagize icyo zikora maze bakabura umuti wica utwo dukoko bashobora kuzahazwa n’inzara mu bihe biri imbere kubera nkongwa yibasiye ibigori byabo.

Mukamwezi Annoncita wari mu murima warimo kubagara ibigori bye, yavuze ko nkongwa yabateje igihombo, agasaba ubuyobozi kubaba hafi.

Yagize ati: “Kuri ubu nkongwa imaze kudutesha umutwe kuko ntabwo tugoheka kubera iyi nkongwa. Ni ukwirirwa dutoragura utu dukoko, twateye imiti ariko byaranze kuko imiti dutera ntabwo yica iyi nkongwa. Ndifuza ko ubuyobozi butuba hafi bugashaka igisubizo kuko nibikomeza gutyo inzara izatwica mu minsi iri imbere”.

Harerimana Celestin, we asanga niba aka gakoko kadafatiwe ibyemezo bazahura n’ibihombo bikaze harimo n’imyenda bafashe muri banki bashobora kuzananirwa kwishyura.

Yagize ati: “Twaje kubagara dusanga nkongwa yarabimaze. Ibi bigori kandi ni ho tuba twiteze gukura amafaranga yo twikenuza muri byose, amafaranga y’ishuri, ubwisungane mu kwivuza, ariko nanone ibirenze ibyo ni uko bamwe muri twe twafashe inguzanyo muri banki tukaba tutazabona uburyo twishyura. Ikindi kibazo nanone ni uko mu bwishingizi bw’imyaka bavuga Nkongwa ntaho nayumvise, gusa abafite mu nshingano zabo ibijyanye n’ubuhinzi nibadutabare cyane cyane RAB izadusure.”

Rukundo Aimable, Umukozi w’Ikigo cy’Igihugu gishinzwe Iterambere ry’Ubuhinzi n’Ubworozi (RAB) ishami rya Musanze, avuga ko iki kibazo biyemeje kukigira icyabo bahagurukira kurwanya iyi Nkongwa mu buryo bwose bushobotse.

Yagize at: “Iki kibazo turakizi, ko Nkongwa yatangiye  kwibasira imwe mu mirima y’ibigori mu Karere ka Musanze. Ubundi bakoreshaga imiti yo mu bwoko bwa roketi cyangwa iperimetirine, ku bijyanye n’imiti turaza kureba koko niba abacuruzi ntayo bafite, icyo ni cyo cya mbere twabafasha kugira ngo abahinzi babe bayibona hafi yabo.

Ikindi kandi na RAB ishobora kuba yareba niba hari ubufasha bw’imiti na yo yabaha nubwo bwose isanzwe ibikora mu gihembwe cy’ihinga, haba Imirenge haba Akarere  turabasura vuba tubagereho tubanze tumenye ikibazo uko gihagaze natwe nka RAB niba hari ubufasha twabaha mu gihe cyihuse tubikore vuba cyane.”

Uyu muyobozi akomeza avuga ko niba koko hari imiti itujuje ubuziranenge, hazakorwa ubugenzuzi kugira ngo bamenye koko niba iyo miti batera yaba nyirabayazana yo gutuma Nkogwa idashobora gupfa ngo ive mu murima nyuma yo gutera iyo miti.

Yagize ati: “Ibyo by’imiti itujuje ubuziranenge ubwo ni amakuru na yo turayafashe, ubwo turayaha izindi nzego kuko hari inzego zibishinzwe by’umwihariko zishinzwe kugenzura ubuziranenge bw’imiti cyane cyane nk’ikigo cyitwa RICA. Tugiye gusura abo bahinzi n’ayo makuru tuyahuze neza kugira barebe koko niba iyo miti yaba itujuje ubuziranenge”.

Kugeza ubu mu Karere ka Musanze imibare igaragaza ko ibigori bihinzwe ku buso busaga hegitari ibihumbi birindwi.

Abahinzi bavuga ko bahinze imbuto y’ibigori izwi nka Iburide (Hybrid) 628 bahawe na Tubura, ikaba ari nayo ikomeje kwibasirwa na Nkongwa.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA