Ni ikosa rikomeye kudashora imari muri Afurika- Perezida Kagame   
Amakuru

Ni ikosa rikomeye kudashora imari muri Afurika- Perezida Kagame   

Imvaho Nshya

October 25, 2023

Mu gihe inkuru zikomeza kwisubiramo ku Mugabane w’Afurika ari iza kudeta n’umutekano muke ushingiye ku mitwe y’iterabwoba n’inyeshyamba mu bihugu bitandukanye, Perezida wa Repubulika y’u Rwanda Paul Kagame yavuze ko ari ikosa rikomeye gucikanwa n’amahirwe yo gushora kuri uyu mugabane.

Umukuru w’Igihugu yabigarutseho kuri uyu wa Kabiri tariki ya 25 Ukwakira, mu kiganiro yatangiye Riyadh muri Saudi Arabia, mu nama ya karindwi ya Gahunda yimakaza Ishoramari ry’Ahazaza (Future Investment Initiative/FII7).

Muri icyo kiganiro yagiranye na Richard Attias washinze Ikigo cy’Itumanaho Mpuzamahanga Richard Attias & Associates (RA&A), Perezida Kagame yamaze impungenge abashoramari bumva bazitiwe n’amakuru bumva buri munsi muri Afurika akaba ashobora kubabuza gushora imari yabo kuri uyu mugabane.

Yagize ati: “Ni ikosa rikomeye kudashora imari muri Afurika. Afurika kuri ubu ifite abaturage barenga miliyari 1.4, ifite imitungo kamere myinshi cyane n’indi mitungo itandukanye. Ariko ntibyaba birimo ubwenge kwirengagiza abaturage barenga miliyari, byaguteza ibibazo kubera ko bashobora guteza ibibazo atari muri Afurika gusa ahubwo n’ahandi.”

Yakomeje agira ati: “Ariko nanone Afurika si igihugu kimwe, uyu munsi igizwe n’ibihugu 55. Hari ibihugu byinshi, birashoboka ko bishobora kugira ibibazo ariko se ni he udashobora gusanga ibibazo? Ndahamya ko buri mushoramari uzavugana na we azaba aturuka mu gihugu gifite ikibazo kimwe cyangwa ikindi, bityo bakwiye kwemera kuganira kuri iyo ngingo. Ariko si cyo nashakaga kuvuga. Icyo nshaka kuvuga ni uko dukwiye kumva aho ibibazo biri kandi ntitubikabirize.”

Yakomeje ahamya ko Abanyafurika n’abayobozi babo bakomeje gukora ibishoboka byose mu gukemura ibyo bibazo bidindiza iterambere ry’umugabane, asaba abashoramari kurenga kumva kudeta gusa ahubwo bakareba no ku gishobora kuba intandaro yazo.

Yakomeje agira ati: “Nanone kandi kudeta ziba zivuze ko abazikora ari abasirikare baba bambura ubutegetsi ubuyobozi bwemewe n’Itegeko Nshinga. Ariko nanone mukwiye kumva ko hariho zimwe muri Guverinoma mbi cyane z’abasivili. Ikintu kimwe kiganisha ku kindi, bityo mu kubisesengura ukwiye kureba intandaro y’icyo kintu kibi cyabaye maze ukagikemura. Iyo ureba imiyoborere muri rusange, ukwiye kureba ubuyobozi bwita ku baturage, bukora ishoramari twavugaga kugira ngo abaturage n’igihugu babashe kubaho neza.”

Gusa na we ahamya ko imiyoborere mibi ikomeza kuba mibi yaba ituruka ku basivili cyangwa abasirikare, aboneraho no gushimangira ko usanga akenshi ibibazo biri muri Afurika bifitanye isano n’ibihugu byakolonije uyu mugabane byahinduriye ubwo bukoloni indi sura.

“[…] Mbere na mbere, ese ubukoloni bwari ikintu cyiza? Ariko bwarabaye. Na nyuma y’igihe cy’ubukoloni, isano y’abakolonijwe n’ababakolonije yakomeje kubaho mu bundi buryo. Bikomeza kugira ingaruka ku baturage bo ku mugabane.”

Yavuze ko ikibazo ari uko usanga abo bakoloni bagitegeka bimwe mu bihugu by’Afurika icyo bikwiriye gukora n’icyo bidakwiriye gukora, ariko haba hari ikintu kitagenze neza mu byo bababwiye gukora bakabyigurutsa ahubwo bakabigereka ku Banyafurika.  

Gushora imari mu bantu bishyizwe imbere mu Rwanda

Perezida Kagame yavuze ko gushora imari mu bantu ari inkingi ya mwamba y’ahazaza h’Afurika kubera ko ibigerwaho byose bikorwa n’abantu, maze umusaruro ukongerwa n’uko bameze neza kandi bafite imbaraga n’ubumenyi.

Ati: “Udafite ishoramari ryibanda ku kuzamura ubushobozi bw’abantu, ntushobora kugera kure kubera ko ukeneye abo bantu bose ushoramo imari ngo batange umusanzu wabo mu nzego zinyuranye. Ni urufunguzo, kandi nta wakwirirwa abyibazaho byinshi.”

Yashimangiye ko icya mbere u Rwanda rugerageza gushoramo imari ari abantu, binyuze mu kunoza urwego rw’ubuzima, uburezi ndetse no kongera ubumenyi bwabo mu nzego zitandukanye.

Yakomeje avuga ko icya kabiri u Rwanda ruhanze amaso ari ukongera ishoramari mu nzego zitandukanye uhereye ku rwego rw’ubuhinzi n’ubworozi mu kuzamura umutekano w’ibiribwa, kongera ibikorwa remezo ndetse no gushora imari mu ikoranabuhanga uko bishoboka kose.  

Yavuze ko icyerekezo abona ari uko Abanyafurika bakwiheraho bagakorana hagati yabo ndetse bakaba biteguye no gukorana n’Isi yose. Ati: “Twiringiye ko Abanyafurika bazarushaho gukorana bagashora imari hagati yabo. Nifuza ko u Rwanda n’Afurika byabasha gukorana n’ibindi bice by’Isi kugira ngo twungurane inyungu mu buryo bwose bushoboka haherewe ku mahitamo yacu y’uburyo dushobora gutera imbere.”

Umukuru w’Igihugu yanashimangiye ko ibikorwa byose bikwiye kubakira ku rubyiruko rugize hejuru ya 70% binyuze mu kurwubakira ubushobozi no kurwagurira amahirwe binyuze mu kurushoramo imari ihagije.

Perezida Kagame yagarutse no ku zindi ngingo zirimo amahitamo y’u Rwanda yo kwimakaza iterambere ry’umugore, n’umusaruro bikomeje gutanga ku iterambere ry’Igihugu.

Yagaragaje ko abagore na bo bafite uburenganzira nk’ubw’abandi ndetse bafite umwihariko wo kuba ari bo soko y’ubuzima bwa muntu hano ku Isi.

Yagarutse ku ibanga ryo kuba umuyobozi mwiza, aho yashimangiye ko agirwa we n’amahitamo afata ndetse n’uburyo ahuriza hamwe imbaraga z’abo ayoboye abatoza kwiyobora hagamijwe kugera ku ntego yo kuzamura igihugu cyangwa sosiyete iyo ari yo yose.

Yanagarutse kuri ruswa, aho yashimangiye ko itarandurwa no kujya mu rusengero cyangwa mu musigiti gusenga, ahubwo biva ku kuba umuntu atayishaka kandi agaharanira gukora ibintu biyihagarika yaba ari umuturage usanzwe cyangwa ari umuyobozi.

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA