Nta Nkotanyi isaza- Amb Harelimana ahanura urubyiruko
Amakuru

Nta Nkotanyi isaza- Amb Harelimana ahanura urubyiruko

Imvaho Nshya

July 6, 2023

Amb. Harelimana Abdul Karimu yabwiye urubyiruko rusaga 5,000 ko Ingabo z’u Rwanda (RDF) ari ingabo z’umutamenwa ko zihari kandi zirinze inkiko z’Igihugu, anakomoza ku buryo “nta Nkotanyi isaza.”

Yabigarutseho mu ntangiriro z’iki cyumweru, mu birori byateguwe n’urubyiruko rwa Musanze ku bufatanye n’Akarere ka Musanze, mu rwego rwo kwishimira Umunsi Mukuru wo Kwibohora ku nshuro ya 29. 

Ni nyuma yo gukora urugendo rw’ibilometero 11 rwaturutse ku Murenge wa Kinigi rwerekeza kuri Stade Ubworoherane mu Karere ka Musanze mu Ntara y’Amajyaruguru.

Urubyiruko rwasobanuriwe uko izahoze ari Ingabo za RPA zabohoye imbohe zari muri Gereza ya Ruhengeri.

Rwahawe ibiganiro bitandukanye bivuga ku butwari bw’Inkotanyi no gusigasira ibyagezweho ariko rukarwanya uwo ari we wese washaka gusubiza inyuma Igihugu. 

Amb Harelimana yagaragarije urubyiruko ko Inkotanyi zidasaza kandi ko urugamba rusigaye ari urw’imbuga nkoranyambaga ari na rwo urubyiruko rugomba kurwana.

Amb Harelimana Adbul Kalimu yasabye urubyiruko kurwana urugamba ku mbuga nkoranyambaga

Yagize ati: “Nta nkotanyi isaza, biramutse bibayeho hakagira umuntu wibeshya […] bari hariya bari maso.

Urugamba rufite ba nyirarwo, urwanyu ni hariya ku mbuga nkoranyambaga, haracyariyo umwanzi ahongaho ahafite uruhare kimwe namwe nkuko namwe murufite”.

Urubyiruko rwabwiwe ko rimwe na rimwe umwanzi ashobora kugaragaza ko afite imbaraga ariko ngo nkuko ataza afite imbaraga za Politiki nko muri ya myaka, n’iza dipolomasi agatsindwa, ntagire iza gisirikare na zo agatsindwa, za mbaraga nkeya yari afite n’izo agifite.

Ati: “Icyo musabwa mwebwe ni ugukoresha izo ntege nke ze n’aho mukahamutsinda, mukamutsinsura mukahamukura.

Mwese muhamagariwe kujya kuri urwo rugamba bariya bantu mukabahagarika, bareke gukomeza kubeshya Abanyarwanda, kuyobya urubyiruko.

Bareke gukomeza gushaka kuzana amacakubiri yatumye boreka u Rwanda muri Jenoside yakorewe Abatutsi hanyuma tukagira ingaruka zikomeye cyane zatugoye kugira ngo Igihugu kigakurwa aho bari baragishyize hanyuma tukakizamura kikaba kigeze kuri uru rwego”.

Shyaka Vedaste wamenyekanye ku mbuga nkoranyambaga nka “Minister of Happiness” ari na we uhagarariye itsinda ‘MuzeTurwubake’ yavuze ko bazakomeza gusigasira ibyagezweho.

Shyaka avuga ko itsinda ‘MuzeTurwubake’ rigizwe n’abakoresha imbuga nkoranyambaga barwanya ingengabitekerezo ya Jenoside igaragara ku mbuga nkoranyambaga.

Akomeza agira ati: “Tunagaragaza kandi ku mbuga nkoranyambaga ibyiza tumaze kugeraho kubera imiyoborere myiza irangajwe imbere na Nyakubahwa Perezida Paul Kagame”.

Mu kiganiro gito Shyaka yahaye Imvaho Nshya, yakomoje ku rugendo rw’ibilometero 11 bakoze.

Ati: “Urugendo twakoze, rwatumye twongera kuzirikana ubwitange RPA yagize, nubwo twe nta mvura yatunyagiye nka bo, tutari dushonje nka bo, nta n’amasasu yavugaga ariko nibura byatumye dutekereza uko bari bamerewe.

Umunaniro twagize byatumye twibaza abakoze ku rugendo imyaka 4 ariko kandi binatubera imfashanyigisho mu gukomeza gukangurira urubyiruko kurwanya ingengabitekerezo ya Jenoside ku mbuga nkoranyambaga”.

Uru rubyiruko rushimira Ingabo zahoze ari iza RPA ku kuba zarabohoye Igihugu ndetse zigakomeza no kururinda nka RDF,  bityo ngo ahasigaye ni aharwo.

Urubyiruko rusaga ibihumbi 5 rwakoze urugendo rw’ibirometero 11
Urubyiruko rwishimira ibyo igihugu kimaze kugeraho kandi ngo rwiteguye kurwana intambara yo ku mbuga nkoranyambaga
Shyaka Vedaste wamenyekanye nka Minister of Hapiness ku mbuga nkoranyambaga, umuyobozi w’itsinda ‘Muze Turwubake’

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA