Nyabihu: Umudugudu w’Icyitegererezo wahinduye abanyamujyi abahoze mu manegeka
Amakuru

Nyabihu: Umudugudu w’Icyitegererezo wahinduye abanyamujyi abahoze mu manegeka

Imvaho Nshya

October 23, 2023

Abaturage batujwe mu Mudugudu w’Icyitegererezo wa Kazirankara uherereye mu Murenge wa Shyira mu Karere ka Nyabihu, bavuga ko kuri ubu ubuzima bwabo bwahindutse kuko basigaye barahindutse abanyamujyi bakibagirwa amanegeka bahozemo yashyiraga ubuzima bwabo mu kaga.

Abo baturage bavuga ko n’abandi baturage bagituye batatanye mu misozi yo mu Karere ka Nyabihu bakwiye kugezwaho iri terambere kuko rituma ibikorwa remezo bibegera ndetse n’imibereho yabo ikajyana n’igihe Isi igezemo.

Kuri ubu batuye heza, bororera mu biraro, abana babo biga hafi ndetse n’imibereho yabo yose yahindutse iya gisirimu. Uretse abatuye muri uwo Mudugudu w’Icyitegererezo, n’abatuye mu nkengero zawo bavuga ko hari ibikorwa remezo byahise bibegerezwa kubera uwo mudugudu.

Umudugudu w’Icyitegererezo wa Kazirankara watujwemo abaturage batari bishoboye n’abari batuye mu manegeka bo mu Karere ka Nyabihu n’abo mu zindi mpande z’Igihugu, aba bose rero bakaba ngo bishimira iterambere begerejwe, abari batuye mu misozi ikikije uyu Mudugudu wa Kazirankara bo ngo iterambere ryabasanze aho bari biyicariye.

Nubahumpatse Edison, umwe mu baturage bo muri Santere y’ubucuruzi ya Vunga mu Murenge wa Shyira.

Yagize ati: “Kuba Nyakubahwa Perezida wa Repubulika Paul Kagame yarubatse hano uyu Mudugudu w’Icyitegererezo ni bimwe mu byatumye hano haba nk’i Kigali, reba amavuriro, uhereye kuri ibi Bitaro bya Shyira, Umudugudu w’Icyitegererezo  watumye hano haza amashanyarazi kuri buri wese, ariko rero muri byose icyadushimishije kuruta ibindi ni amashuri hano hafi, ndetse n’ibitaro.

Yakomeje avuga ko mu gihe kera byagoranaga kuba umuntu yakwiga kuko umwana yakoraga amasaha arenga atatu ngo agere ku ishuri, kuri ubu abana babonye amashuri mu marembo yabo ndetse n’ayisumbuye.

Yakomeje agira ati: “Twize dukora urugendo rw’amasaha 3, waba wemerewe kujya mu yisumbuye ukajya i Butare n’ahandi. Bari bamwe batirirwaga bajyayo ahubwo bakagurisha amazina yabo none hano hari amashuri umuntu atangira abanza, akahava arangije ayisumbuye”.

Nubahumpatse akomeza avuga ko kuba uriya Mudugudu warahubatswe waje ari igisubizo kuri bo  ngo kuko kugeza ubu nta mwana w’aho ukivuga ngo nta ho kwiga yabona.

Yagize ati: “Ubu umwana rwose arangiza icyiciro cya mbere cy’ayisumbuye atatsinda ngo akomeze akajya kwiga umwuga yihitiyemo, yagaruka agasanga agakiriro kari neza neza mu marembo y’iwabo. Mbese Imidugudu y’Icyitegererezo njye mbona ari iterambere ryatekerejwe rikwiye no kuzagera kuri buri wese kuko nabonye bituma tuzigama n’ubutaka kandi tukagerwaho n’iterambere”.

Umuyobozi w’Akarere ka Nyabihu Mukandayisenga Antoinette, asaba abaturage kubyaza umusaruro amahirwe begerejwe.

Yagize ati: “Kuba hariho gahunda yatekerejwe na Leta yo gutuza abaturage ahantu hatabashyira mu kaga harimo n’uriya Mudugudu w’Icyitegererezo wo muri Shyira. Ni ikimenyetso ko ubuyobozi mbere na mbere buha agaciro umuturage, nkaba rero nsaba abaturiye uriya mudugudu n’abari mu nkengero zawo kuwubyaza umusaruro bahereye ku mashuri bajyanemo abana.  Harimo byinshi byatuma umuntu abaho ku buzima bwiza, harimo Agakiriro, ibitaro n’ibindi, bityo rero babifate neza birinda uwabisenya.”

Kugeza ubu Mudugudu wa Kazirankara muri Shyira utuwemo n’imiryango igera ku 108, abaza kuhashaka serivisi zinyuranye harimo n’amashuri bakaba baturuka mu Murenge wa Mugunga wo mu Karere ka Gakenke n’uwa Shyira wo muri Nyabihu.

Bimwe mu byo bishimira kandi harimo ibiraro rusange n’Ibitaro bya Shyira begerejwe byatashywe ku mugaragaro na Perezida Paul Kagame mu mwaka wa 2017 kimwe n’uriya Mudugudu wa Kazirankara.

Abaturage bishimira ko begerejwe Ibitaro bya Shyira
Abaturage bavuga ko banyuzwe n’uko ubuzima bwabo bwahindutse bakaba barabaye nk’abanyamujyi serivisi zose zibari hafi

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA