Nyamagabe: Amashuri yigamo abana b’impunzi yubakiwe ibyumba by’amashuri
Amakuru

Nyamagabe: Amashuri yigamo abana b’impunzi yubakiwe ibyumba by’amashuri

NTAWITONDA JEAN CLAUDE

May 30, 2023

Abayobozi b’ibigo by’amashuri mu Karere ka Nyamagabe mu Ntara y’Amajyepfo, bishimira ko ibyumba by’amashuri byubatswe n’umushinga ‘Jya Mbere’ uterwa inkunga na Banki y’Isi ugashyirwa mu bikorwa na Minisiteri ishinzwe Ibikorwa by’Ubutabazi (MINEMA) byakemuye ikibazo cy’ubucucike mu mashuri. 

Ni umushinga ugamije imibanire n’iterambere ry’impunzi n’Abanyarwanda batuye hafi y’inkambi bityo bakabona serivisi z’ibanze zibafasha mu iterambere.

Umushinga Jya Mbere wubatse ibyumba by’amashuri 73 ku bigo by’amashuri 9. Ibigo 6 muri ibi, bifite ibyumba by’amashuri bigeretse.

Ibyumba by’amashuri n’ubwiherero byubatswe, byatwaye asaga miliyari 1.7 mu gihe ibikoresho byatanzwe n’uyu mushinga ku bigo by’amashuri bifite agaciro ka miliyoni zisaga 90.

Fr Basigariye Faustin, Umuyobozi w’ishuri rya Don Bosco Nyamagabe TSS, avuga ko ibyumba by’amashuri 8 bubakiwe byagize uruhare mu kugabanya ubucucike mu ishuri.

Agaragaza ko ibyumba by’amashuri byubatswe byagize uruhare mu kongera ireme ry’uburezi.

Ati: “Tutarubakirwa ibi byumba by’amashuri, byasabaga ko ishuri turigabanyamo ibice bibiri tugashyiramo tiripulegisi. Kuva twubakiwe ibi byumba, byongereye ireme ry’uburezi mu myigire no mu myigishirize”.

Ubuyobozi bwa Don Bosco Nyamagabe TSS buvuga ko muri iri shuri higamo impunzi 200 mu gihe abasigaye ari Abanyarwanda kandi ko basabana.

Fr Butegwa Aimable, Umuyobozi ushinzwe amasomo muri iri shuri yahamirije Imvaho Nshya ko mbere abanyeshuri biga amasomo y’ubumenyi ngiro batsindaga ku kigero cya 30/60, ubu ngo umwaka ushize hatsinze 49/60.

Ati: “Imitsindire igenda izamuka kuko abujuje 60/60 umwaka ushize, barasaga 30”.

Abanyeshuri barimo n’ab’impunzi basigaye biga batekanye

Gashema Esperant Umuyobozi w’abanyeshuri akaba n’umwe mu mpunzi ziga kuri Don Bosco Nyamagabe TSS na Kayigama Marie Claire bavuga ko mbere bigaga nabi kuko bigaga bacucitse, ubu ngo biga bisanzuye.

Hagenimana Martin, Umuyobozi w’ishuri rya G.S Gasaka riherereye mu Kagari ka Kigeme mu Murenge wa Gasaka, na we avuga ko bari bafite ubucucike bukabije aho mu ishuri rimwe higagamo abana 60 basaga.

Nyuma yo kubakirwa ibyumba by’amashuri 9 n’ubwiherero 34 ubucucike bwaragabanyutse.

Yagize ati: “Abana biga mu mashuri abanza bigaga inshuro 2 ku munsi. Bakiga mu gitondo bagataha abandi bakaza kwiga nyuma ya saa sita. Aho twubakiwe ibyumba by’amashuri, abana biga mu gito na nyuma ya saa sita. Byanatumye kandi dutangiza ishuri ry’inshuuke”.

Impunzi zo mu Nkambi ya Kigeme ziga kuri G.S Gasaka zibarirwa kuri 60% mu gihe abasigaye ari Abanyarwanda. 

Mushimiyimana Judith wigisha mu mwaka wa mbere w’amashuri abanza kuri G.S Gasaka, yabwiye Imvaho Nshya ko mbere yo kubakirwa wasangaga ishuri ririmo abana bari hagati ya 130 na 140.

Ubu ngo biga mu ishuri ari 47. Ati: “Bituma mbakosora nkabarangiza, ndabakurikirana nkamenya ibibazo bafite mu miryango bityo kubigisha bikanyorohera. Ikindi kandi imitsindire yariyongereye”.

Abiragiye Françoise, Umuyobozi w’ishuri E.S Mudasomwa riherereye mu Murenge wa Tare mu Karere ka Nyamagabe, avuga ko nyuma yo kubakirwa ibyumba by’amashuri n’umushinga Jya Mbere byatumye umubare w’abanyeshuri wiyongera.

Umwaka ushize bari abanyeshuri 230 ubu E.S Mudasomwa ryigwaho n’abanyeshuri 402. Abanyeshuri b’impunzi biga muri iki kigo ni 26. 

Avuga ko nta kibazo cy’ubucucike bari bafite. Ati: “Ibyumba twubakiwe byatumye dusaba andi mashami. Mbere twari dufite amashami ya MEG na MCE ubu hiyongereyeho amashami ya PCB na MCB”.

Akomeza agira ati: “Abana barushijeho kwiga no gukunda ishuri”.  

Umunyamabanga Nshingwabikorwa w’Akarere ka Nyamagabe Ngarambe Alfred, ashimira umushinga Jya Mbere wubatse ibyumba by’amashuri  muri aka Karere.

Avuga ko nko mu mashuri y’imyuga n’ubumenyi ngiro, kongeramo ibyumba by’amashuri ngo bivuze ko biri muri gahunda yo kongera imirimo.

Ati: “Kongera ibyumba by’amashuri by’umwihariko mu bigo byigisha amasomo y’imyuga n’ubumenyi ngiro ni muri ya gahunda yo kongera imirimo idakorerwa mu biro. Iyi mirimo ya tekinike yatumye abantu bihangira imirimo”.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA