Nyamasheke: Basizwe iheruheru n’inkongi yakongoye Hegitari 65 z’amashyamba
Amakuru

Nyamasheke: Basizwe iheruheru n’inkongi yakongoye Hegitari 65 z’amashyamba

Imvaho Nshya

October 27, 2023

Mu byumweru bibiri bisoza ibihe by’impeshyi by’uyu mwaka, abaturage bo mu Mirenge itandukanye y’Akarere ka Nyamasheke basigaye baririra mu myotsi nyuma y’inkongi y’umuriro yibasiye amashyamba igakongora Hegitari zirenga 65.

Mu Murenge wa Mahembe wonyine bivugwa ko hahiye Hegitari 44.5, abaturage basigajwe iheruheru n’ibyo biza bakaba bari mu bibazo bikomeye kuko ari yo yari abatunze, bagasaba Leta kubagoboka nubwo nta bwishingizi bwayo bagiraga.

Habiyaremye Ezéchiel w’imyaka 73, utuye mu Mudugudu wa Butare, Akagari ka Butare mu Murenge wa Gihombo, yabwiye Imvaho Nshya ko mu mashyamba yahiye harimo irye riri ku buso bujya kugera kuri Hegitari imwe.

Ni ishyamba yateye mu 1973 aryitezeho kuzamufasha mu masaziro ye, none igihe ryari ritangiye kumuha icyo yaritereye ryarahiye rirakongoka kandi yari yanaritanzeho ingwate yaka inguzanyo muri banki y’amafaranga y’u Rwanda hafi 300,000.

Ati: “Nifashe mapfubyi kuko ryari rintunze. Abaritwitse twarababuze, babikoze nijoro. Nashoboraga kuba narikuramo hafi  miliyoni 2 ndisaruye ryose, ariko nk’uwashakaga igiti nanyarukiragamo nkakimuha akampa antunga n’umuryango, none ubu nabuze uko nigira. Ntibanaboneka ngo baryozwe ubu bugome nta n’ubwishingizi nagiraga kuko mu giturage ntituragera aho.”

Karake Esdras w’imyaka 66, wo mu Mudugudu wa Rwatsi, Akagari ka Butare mu Murenge wa Gihombo, avuga ko uretse ishyamba rya Hegitari hafi eshatu iyo nkongi yakongoye, yanahombye ikawa ye yari yiteze gusaruramo amafaranga y’u Rwanda asaga ibihumbi 500.

Ati: “Ari ishyamba nari mfite mu bice binyuranye by’uyu Murenge, ari ikawa, byose byatwikiwe mu minsi ikurikirana. Twagiye twumva induru ngo amashyamba arahiye tugasanga ni ayacu hamwe n’ikawa, ubu turi mu buzima butugoye kandi abenshi turakuze. Mu by’ukuri turi abo gutabarwa”.

Mukamunana Anastasie w’imyaka 65 na we yavuze ko we n’umuturanyi we batwikiwe ikawa nyinshi cyane, bakaba bari mu kangaratete.

Ati: “Nkanjye n’umugabo turashaje nta kindi twakwimarira cyatubeshaho kuko mfite n’ubumuga bw’intoki bwizanye, nk’ibyo bikorwa twari twariteganyirije byadufashaga mu mashuri y’abana.

Nta mfashanyo yindi twabonye, turanibaza ukuntu ayo mashyamba n’ikawa byahiriye rimwe, mu bihe byegeranye byaradushoboye. Nubwo buzima busharira turimo, tugasaba ubuyobozi gukomeza iperereza tukareba ko bafatwa bakaturiha ibyacu bangije.”

Sengambi Albert, Umuyobozi w’Ishami ry’Ubuhinzi, Ubworozi n’Umutungo Kamere mu Karere ka Nyamasheke, avuga ko uyu mwaka ba rutwitsi bakajije umurego babifashijwemo n’izuba ryinshi ryanamaze igihe kirekire.

Bari basanzwe barafashe ingamba zo kudatanga impushya zo gutwika amakara igihe impeshyi yatangiye, hirindwa inkongi za hato na hato, ariko ngo abayiteje babaciye mu rihumye.

Yasabye abaturage kurinda amashyamba n’ikawa byabo birinda ibishirira n’amafumba y’umuriro, kunyweramo itabi, abatwika ibiyorero n’ibindi byose byakurura inkongi.

Yavuze ko amashyamba yibasiwe ari ayo mu Murenge wa Mahembe, uwa Gihombo, uwa Kirimbi n’uwa Cyato, yongeraho ko nubwo muri aya mashyamba harimo aya Leta amenshi ari ay’abaturage ari na  yo bacungiragaho ubuzima bwabo.

Yemeza ko amarira y’aba baturage yumvikana ariko ngo Akarere nta ngengo y’imari kagira yo kubashumbusha.

Yavuze kandi ko hari abamaze gufatwa bakekwaho guteza iyo nkongi. Mu bikekwa ko byabaye intandaro ni ibikorwa byo gutwika  amakara, abakora ibikorwa byo guhakura ubuki bajyana ifumba y’umuriro, abanyura mu ishyamba banywa itabi, gutwika ibiyorero n’ibindi.

Mukamunana Anastasie ufite ubumuga bw’intoki avuga ko icyari kuzamutunga kimushizeho agasaba ubufasha

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA