Nyamasheke: Inyubako yatumye urubyiruko rwitabira serivisi zirimo kwisiramuza
Amakuru

Nyamasheke: Inyubako yatumye urubyiruko rwitabira serivisi zirimo kwisiramuza

Imvaho Nshya

October 11, 2023

Muri iki gihe abana bagize amahirwe bafashwa n’ababyeyi babo bakabasiramuza bakiri bato, ariko abenshi mu bagezemu gihe cy’ubugimbi kuzamura usanga gufata umwanzuro wo kuyoboka ibitaro ngo bibasiramure bibanza kubagora.

Ibyo ni kimwe no ku zindi serivisi zirimo iz’imyororokere no kwirinda agakoko gatera SIDA aho abasore n’inkumi benshi bahorana ipfunwe ryo kwijyana ku mavuriro ari zo bagiye gusaba.

Urubyiruko rw’Umurenge wa Kanjongo mu Karere ka Nyamasheke rurashimira rurishimira inyubako yihariye rwubakiwe ku Kigo Nderabuzima cya Ruheru kuko irufasha kwegera izo serivisi abenshi bagiraga ipfunwe ryo kugera kwa muganga ari zo zibazanye.

Mu kiganiro n’Imvaho Nshya, bamwe mu barore n’inkumi bo muri uwo murenge bavuze ko mbere y’uko iyo nyubako iboneka wasangaga bahurira n’ababyeyi babo mu byumba bimwe bahererwamo izo serivisi ari na byo byabateraga ipfunwe.

Bavuga ko bamwe baterwaga isoni no kuba wahurira n’umuntu ukubyaye ahantu hamwe wagiye gusaba zerivisi z’ubuzima bw’imyororokere, kwisiramuza, kwaka udukingirizo n’ibindi babona nk’ibikenera kugira ibanga.

Ruvuga ko hari n’ibindi rukenera cyane nk’urubyiruko rwo mu cyaro rwabonye muri iyo nyubako nshy,  birimo  imyidagaduro bareba nk’umupira, amafilimi kuri televiziyo, ibiganiro binyuranye birwubaka, gukurikirana ingendo z’Umukuru w’Igihugu n’impanuro aha abo yagendereye, kwihugura ku ikoranabuhanga n’ibindi.

Maniriho Samuel w’imyaka 27, ati: “Yaje tuyikeneye cyane kuko urubyiruko ruba rushaka aho rwisanzurira. Hari serivisi rukenera zihariye rutaba rushaka ko abakuru bamenya, rukanashaka ubishinzwe rwisanzuraho, uzobereye mu byo kuruganiriza no kuruha inama rukeneye, kurubikira ibanga no kuruha ibyo rushaka, ariko aha ntibyahabaga nta nubwo twahazaga kuko tutabaga twizeye kwakirwa uko dushaka.”

Avuga ko amezi 2 gusa iyi nyubako imaze itangirwamo serivisi zihariye ku rubyiruko, yagaragaje impinduka kuko nko mu biruhuko urwiga rutazerereye, abashakaga kureba umupira cyangwa filimi bahuriraga ku Kigo Nderabuzima bakahaganirira ari na ko bahungukira ubumenyi butandukanye.

Muri bumwe mu bumenyi bahakura harimo kongera ubumenyi mu bijyanye no gukoresha mudasobwa n’ikoranabuhanga rya internet muri rusange.

Umukobwa w’imyaka 17 wavuganye n’Imvaho Nshya, na we yagize ati: “Nk’aha mu giturage kuza ku Kigo Nderabuzima gushaka agakingirizo cyangwa  gusaba inama ukeka ko waba utwite uri umukobwa, ni nk’ikinegu kuri wowe ubwawe no ku muryango wawe.  Kubera ko izo serivisi zatangirwaga aho duhura n’abakuru, hagati mu ivuriro, twagiraga isoni zo kuza.”

Yakomeje agira ati: “Turashimira abubatse iyi nyubako kuko bayishyize ku ruhande ucyinjira, ku buryo unaje mu ibanga nta muntu mukuru wabimenya ngo ajye kugutaranga. Ni yo mpamvu tuyitabira, tukanishimira serivisi tuhabonera n’abaziduha.”

Mubirigi Sylvestre ushinzwe ubuzima bwo mu mutwe n’izindi serivisi ziyongeraho zirimo n’iyi y’urubyiruko mu Kigo Nderabuzima cya Ruheru, avuga ko mbere y’iyi nyubako batabonaga urubyiruko rwinshi rubagana kuko  batari banafite aho kurwakirira hihariye.

Avuga ko ubusanzwe urubyiruko rukenera serivisi nyinshi mu bigo nderabuzima, zirimo iz’ubuzima bw’imyororokere, gusobanurirwa ibijyanye n’inda zitateganyijwe n’ingaruka zazo, kwisiramuza, kwipimisha no ku kuganirizwa ku gakoko gatera SIDA, kuganirizwa ku kwirinda ibiyobyabwenge, ubuzima bwo mu mutwe, udukingirizo, izijyanye n’ihohoterwa rishingiye ku gitsina n’izindi.

Yemeza ko bigorana kuvanga izo serivisi n’iz’abakuru kuko hari uruba rudashaka ko hari undi umenya ibyarwo nko gufata udukingirizo kuko   ugafashe abamubonye bahita bamwita indaya.

Ati: “Ariko aho ruboneye inyubako yarwo yihariye, buri cyumba gifite serivisi yacyo nta muntu mukuru uhagera, ruraza ku bwinshi kuko rwumva rwisanzuye, uwaje mu cyumba cy’ikoranabuhanga kwihugura mudasobwa cyangwa gushaka amakuru kuri internet akanagenda yipimishije agakoko gatera SIDA, nta kibazo kuko rwo rutaba rutinyana, n’izindi serivisi rukazibona neza, kandi zirarufasha cyane.”

Anavuga ko byatumye rutongera kugira ingeso y’ubuzererezi rujya kureba imipira mu tubari kuko rwazaniwe televiziyo ihora icanye ushaka akaza kuwureba cyangwa ibindi akeneyeho.

Yavuze ko hakenewe kongerwa mudasobwa kuko hari 5 gusa kandi ruza ari rwinshi. Ati: “Uwatwongera nk’izindi mudasobwa 5, akanongera umuyoboro wa internet byarushaho kuba byiza cyane, kuko nko mu biruhuko ruhugurana ukobana nta bindi birurangaza n’ababyeyi bakabyishmira kuko baba bazi ko nta ngeso mbi rwagiyemo.”

Umuyobozi w’Ikigo Nderabuzima Nishyirembere Vérène, asaba ababyeyi b’ako gace gushishikariza abana babo kubagana kuko noneho ahisanzurirwa habonetse.

Anasaba urubyiruko kubyaza umusaruro iyi nyubako n’ibikoresho birufasha byayishyizwemo kuko ari andi mahirwe rwungutse yo kurushaho gutegura ahazaza habo heza.

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA