Nyamasheke:  Yatangiye atekera abarobyi ubu arakoresha abarenga 40
Amakuru

Nyamasheke:  Yatangiye atekera abarobyi ubu arakoresha abarenga 40

Imvaho Nshya

October 5, 2023

Urugendo rw’iterambere rwa Turinabo Patrick uvuga ko kuvukira mu muryango ukennye cyane byamuteye kuruha akiri umwana, ariko ku bwo gukora cyane no gucunga neza duke abona, cya giti cy’umuruho kimubyarira imbuto z’umugisha.

Yatangiye atekera abarobyi, abigiraho, none ubu yinjiza amafaranga y’u Rwanda arenga miliyoni ebyiri buri kwezi atabariyemo amafaranga y’u Rwanda arenga ibihumbi 600 asohora buri kwezi ahemba abarobyi barenga 40 asigaye akoresha.

Turinabo Patrick w’imyaka 38 y’amavuko, yavukiye mu Mudugudu wa Mushungo, Akagari ka Nyarusange, Umurenge wa Kirimbi mu Karere ka Nyamasheke.

Avuga ko kubera se yashatse abagore benshi bigatuma atita ku bana yabyaye, yisanze atekera abarobyi afite imyaka 9 gusa, aho kujya ku ishuri ngo yige nk’abandi bana bo mu kigero cye.

Muri ako kazi yatangiye ataragera ku myaka y’ubukure yahembwaga amafaranga 2.500 ku kwezi akabona n’ibyo kurya buri munsi, maze ya mafaranga akayashyira nyina.

Nyuma y’amezi abiri, ayo mafaranga yageraga ku bihumbi bitanu, umubyeyi we akamuguriramo ihene.

Ati: “Nakomeje gutyo mu buzima bubi cyane ariko ndihangana, ku myaka 15 ngira amahirwe umusore twari duturanye waje no gushyingiranwa n’umwe muri bashiki banjye, na we washakiraga ubuzima mu Kivu akodesha ikipe y’amato 3 y’amafaranga miliyoni 2.5.

Yampaye akazi kuko nari maze kumenya gukurura ikamba ry’imitego irimo isambaza zarobwe mba mvuye ntyo mu gutekera abarobyi.”

Avuga ko yahembwaga icyo gihe amafaranga 8.000 akanagira isambaza ahabwa ku zarobwe akazigurisha ku buryo yabonaga amafaranga agera ku 20 000 akayashyira nyina na yo akayamuguriramo ihene zaje kugera kuri makumyabiri.

Akomeza avuga ko ku myaka 19 yavuye ku gukorera ayo mafaranga atera intambwe yo gukodesha ikipe y’amato. Icyo gihe yariyandayanze ashaka amafaranga y’u Rwanda ibihumbi 150,000 ashakisha uburyo na we yagira igifatika azana mu muryango.

Ati: “Icyo gihe amahirwe yatangiye kunsekera kuroba biraza, nubakamo inzu y’amabati 35, nguramo inka yo gukwa n’udusambu duto two guhinga tujyanye n’ubushobozi nabonaga, ariko mbona ko icyizere cy’ubuzima bwiza kigenda kiza. Ku myaka 23 nashatse umugore, wa musore twari duturanye wari warampaye akazi yashyingiranywe na mushiki wanjye, aba abaye andi mahirwe kuko we yari amaze gutera imbere mu burobyi.”

Avuga ko ku nama za muramu we icyo gihe yavuye ku gukodesha ikipe yari afatanyije n’abandi afata inguzanyo mu kigo cy’imari bateranya ikipe ya 2.500.000.

Kugira umugore ngo byaramufashije cyane icyo gihe, twa dusambu yari yarizigamiye baraduhinga, ubushobozi buriyongera, asubiza muramu we aye kuri ya kipe ayegukana yose.

Yarayikoresheje irasaza ariko ayikuyemo inshya, aza kugera ku makipe 2 agizwe n’amato atandatu, bidatinze agera kuri 3 imwe igeze kuri 3 500 000. Yaje kugura iya 4 n’ubuhinzi bugenda neza, ari bwo yanimutse aho yabaga atura aharushijeho kuba heza mu Kagari ka Kibogora, Umurenge wa Kanjongo.

Yagiye gutura mu kibanza cyaguze miliyoni eshatu, hakaba harimo inzu akomeje kubaka ifite agaciro ka miliyoni 25 z’amafaranga y’u Rwanda, akaba yaraguze n’indi mirima 2 icyegereye ya 5,500,000, umwe awuhingamo urutoki.

Umwaka ushize hafi y’aho atuye yahaguze undi murima wa miliyoni umunani, anahagura inzu yo guturamo n’indi y’ubucuruzi kuri 8 000 000 zombi akaba azikodesha amafaranga y’u Rwanda ibihumbi 90 000 ku kwezi.

Avuga ko mu kwagura ibikorwa, muri ya makipe 4 yagurishijemo 2 ashaje, ubu ari gukoresha andi 2 mashya ari kumwe n’imitego yayo azamutwara miliyoni 10 z’amafaranga y’u Rwanda, akazayashyira mu kiyaga ku isubukura ry’uburobyi mu mpera z’uku kwezi.

Ati: “Ubu nkoresha abakozi barenga 40 mu burobyi gusa, bose hamwe mbahemba amafaranga arenga 600,000 buri kwezi kuko hari abahembwa menshi n’abahembwa make. No mu bikorwa by’ubuhinzi n’ubworozi nkoresha abarenga 10 buri kwezi”.

Mfite ingurube 7 z’agaciro ka miliyoni ebyiri zose hamwe, inka 2 nziza zikamwa n’inyana zazo, inkoko, ishyamba nsaruramo miliyoni 5, ikawa mbonamo arenga miliyoni 5 uko nsaruye n’ibindi.”

Avuga ko byose abikesha imiyoborere myiza, umutekano n’impanuro za Perezida wa Repubulika Paul Kagame udahwema gushishikariza abaturarwanda bose gukora bishakamo ibisubizo.

By’umwihariko, arashimira nyina umubyara wakomeje kumuba hafi kugeza n’uyu munsi hamwe na muramu we kuko bose bagize uruhare rukomeye mu iterambere we n’umuryango we bamaze kugeraho.

 Kuri ubu afite intego yo kubaka inyubako ikomeye y’ubucuruzi aho yabona hunguka, akanagura imodoka itwara imizigo yamufasha kugeza umusaruro w’ibyo akora ku masoko atandukanye ndetse akanagura imitekerereze yinjira no mu bucuruzi bufatika.

Avuga ko ababazwa cyane n’abasore n’inkumi bapfusha ubuzima bwabo ubusa n’abumva ko Imana itabazi cyangwa ko ntaho bagera, akabashishikariza gukora cyane no kutiheba mu buzima kuko isaha iyo ari yo yose ubuzima bwahinduka mu gihe ukora ibyiza kandi udacika intege.

Yiyemeje gutanga ubwo buhamya ahereye ku bakozi be, akanabasaba kubyaza umusaruro amahirwe yose babona. Yishimira ko ubu icyo ashatse kurya cyose atakigirira ikibazo, yubashywe mu bandi, n’abazi ubuzima bwe bwa kera batamusuzugura kandi na we ntasuzugure abo akoresha barimo n’abakora imirimo yahereyeho.

Inka 2 zimuha umukabo utubutse na zo ziri mu byo yigejejeho
Isambu
Inzu nshya Turinabo Patrick arimo kuzuriza anayituyemo
Turinabo Patrick ari muri umwe mu mirima yaguze
Iri ni ishyamba rya Turinabo Patrick
Turinabo wigeze gutekera abarobyi akoresha abarenga 40 muri uyu mwuga
Imwe mu ngurube za Turinabo zimuha umusaruro

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA