OIPPA irasaba ko hashyirwaho uburyo bwo kwisuzumisha kanseri
Amakuru

OIPPA irasaba ko hashyirwaho uburyo bwo kwisuzumisha kanseri

KAYITARE JEAN PAUL

April 7, 2024

Umuryango w’Abantu bafite ubumuga bw’uruhu mu Rwanda, OIPPA, utewe impungenge na kanseri ikomeje guhitana abafite ubumuga. Uyu muryango utangaza ko buri mwaka hapfa umuntu ufite ubumuga bw’uruhu kandi ko hari abo utamenya.

Ikigo cy’Igihugu Gishinzwe Ubuzima, RBC, gitangaza ko mu Rwanda, buri mwaka abasaga 200 bahitanwa n’indwara ya kanseri y’uruhuru. Muri aba habarirwamo n’abafite ubumuga bw’uruhu.

Dr Nicodem Hakizimana, Umunyamabanga Nshingwabikorwa wa OIPPA, yabigarutseho mu mpera z’iki cyumweru, mu nama yabahuje n’abafatanyabikorwa barimo MINISANTE, RBC, RSSB n’ibitaro bitandukanye.

Kimwe mu byagarutsweho ni uburyo Leta hashyirwa imbaraga mu gusuzuma kanseri y’uruhu ku bantu bafite ubumuga bw’uruhu.

Umuntu wese ufite ubumuga bw’uruhu aba afite ibyago byo kurwara kanseri y’uruhu ku kigero cya 100%.

Dr Hakizimana agira ati: “Iyo witegereje hano mu gihugu usanga nta buryo buhari bwo kuyisuzuma hakiri kare kugira ngo nibura uwo basanga afite ibimenyetso abe yakurikiranwa.”

Abenshi bamenya ko barwaye kanseri y’uruhu igeze ku kigero itabasha kuvurwa.

Ati: “Abantu benshi batangira ari ibisebe bisanzwe bakajya kwivuriza ku kigo nderabuzima, bakavura nk’abavura ibisebe, hanyuma bikazamenyekana ko ari kanseri bigeze ku rugero umuntu adashobora kuba yakwivuza ngo abashe gukira.”

Avuga ko nta buryo buhari bwo gusuzuma kanseri y’uruhu ariko akagaragaza ko hari kanseri Leta yashyizemo imbaraga kubera ko zizwi.

Akomeza agira ati: “Iyi kanseri ifata abantu bafite ubumuga bw’uruhu, nta bantu bayivuga iyo turebye mu bihe biri imbere nitudahaguruka ngo tuvuge uburyo bwo kudusuzuma hakiri kare, tuzarwara iyi kanseri.

Turasaba Leta ko nibura mu igenabikorwa Minisiteri y’Ubuzima yakongerwamo uburyo bwo gusuzuma iyi kanseri y’uruhu.”

OIPPA yifuza kandi ko Leta yashyiraho ubukangurambaga mu kurwanya kanseri y’uruhu bihereye mu muryango kandi abaganga b’indwara z’uruhu bakabigiramo uruhare mu gusuzuma iyo kanseri hakiri kare.

Iyo izuba rivuye ku ruhu rw’umuntu ufite ubumuga rw’uruhu rirarutwika mu gihe bibaye kenshi uruhu rurwara igisebe kitazakira.

Agira ati: “Icyo gisebe abantu ntabwo bamenya ko gishobora kuvamo kanseri y’uruhu, batekereza ko ari bwo buzima bw’abantu bafite ubumuga bw’uruhu, ni yo mpamvu tuvuga ngo hakwiye gushyirwamo imbaraga abantu bafite ubumuga bw’uruhu bakajya basuzumwa hakiri kare.

Nibura buri mwaka hakabaho ubukangurambaga bwo gusuzuma abantu bafite ubumuga bw’uruhu mu gihugu hose.”

OIPPA itangaza ko buri mwaka hashyingurwa umuntu ufite ubumuga bw’uruhu wishwe na kanseri, gusa hari abatamenyekana.

Jean Damascène Hafashimana wo mu Karere ka Gicumbi ufite ubumuga bw’uruhu, ahamya ko indwara ya kanseri y’uru ari indwara ikomeye kubera ko ari imwe mu ndwara zibabangamira biturutse kuri ubwo bumuga bw’uruhu bafite.

Ati: “Abenshi mu bafite ubumuga bw’uruhu ntayo bazi, impamvu tuyivuga cyane ni ukugira ngo Leta idufashe gushyiraho uburyo bwo kwirinda kanseri y’uruhu ku bafite ubumuga bw’uruhu nkuko yita ku zindi kanseri.”

Ingabire Aimé mu Karere ka Ngororero mu Ntara y’Iburengerazuba, yemeza ko umuntu ufite ubumuga bw’uruhu aba afite ibyago byo kuba yayirwara.

Ati: “Kuyirinda ni ukwisiga amavuta, kwambara imyanda igufubitse ahantu hose, ingofero ni cyo kintu dufite muri kano kanya cyatuma twirinda kanseri y’uruhu, tukirinda kuba twahura n’izuba.”

Yifuza ko hashyirwaho uburyo bwo guhuriza hamwe abantu bafite ubumuga mu Karere runaka ku kigo cy’ubuvuzi hanyuma bagasuzumwa kanseri y’uruhu bityo uwo bayisanganye akitabwaho hakiri kare.

Irene Bagahirwa, Umukozi wa RBC mu ishami rishinzwe kurwanya indwara zitandura by’umwihariko ashinzwe agashami kita ku bikomere byo ku mubiri ndetse no bantu bafite ubumuga.  

“Iteganyabikorwa ryose dukora mu rwego rw’ubuzima abagenerwabikorwa bazamo, ntabwo dushobora gukora iteganyabikorwa ry’imyaka 5 hatajemo abagenerwabikorwa.

Iyi nama yabaye, ihuye nuko turimo gukora iteganyibikorwa ry’imyaka 5, ubu ni uburyo bwiza cyane bw’ubuvugizi buzatuma n’igitekerezo cyatangiwe muri iyi nama gihabwa Agaciro.”

Inzego zitandukanye za Leta zagaragarijwe ikibazo cya Kanseri y’uruhu ifata abafte ubumuga bw’uruhu

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA