Padiri Dushimimana yagizwe Umuyobozi mushya wa ICK
Amakuru

Padiri Dushimimana yagizwe Umuyobozi mushya wa ICK

Imvaho Nshya

August 8, 2023

Padiri Dushimimana Fidèle wari usanzwe ari Umuyobozi Wungirije Ushinzwe amasomo n’ubushakashatsi mu Ishuri Gatolika rya Kabgayi (ICK), ni we wagizwe Umuyobozi mushya w’iyo kaminuza.

Ni nyuma y’uko uwari asanzwe ari Umuyobozi wayo Padiri Dr Balthazar Ntivuguruzwa yagizwe Musenyeri wa Diyoseze ya Kabgayi muri Gicurasi 2023.

Padiri Dushimimana yatangarije itangazamakuru ko iyo nshingano ahawe  itoroshye.

Ati “Ibi ndumva ari ibintu binteye ubwoba, kubera ko inshingano nkuru nka ziriya zitera ubwoba ni bumwe bwo guha agaciro inshingano ziremereye haba harimo ako kantu k’impugenge, wibaza ibibazo uti ese nzabibasha? Gusa nzakomereza Aho uwambanjirije yari agejeje, nkomeze ibyo yari yaratangiye birimo umushinga wo gutangiza Ishami ry’ububyaza n’ubuforomo”.

Padiri Dushimimana Fidèle yari amaze imyaka 13 akora muri ICK,  ari Umuyobozi Wungirije Ushinzwe amasomo n’ubushakashatsi mu Ishuri Gatolika rya Kabgayi (ICK), mbere yo kugera muri iyi kaminuza yabanje kuba Umuyobozi ushinzwe imyitwarire mu Isemineri nto ya Kabgayi. 

Afite impamyabumenyi y’ikirenga mu  mitekerereze n’imyitwarire ya muntu (PhD in Psychology) yavanye muri Universita Pontificia Salesiana i Roma mu Butaliyani.

Yanditswe na NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA