Perezida Kagame arafungura Inama yiga ku itumanaho rya telefoni
Amakuru

Perezida Kagame arafungura Inama yiga ku itumanaho rya telefoni

NTAWITONDA JEAN CLAUDE

October 25, 2022

Kuri uyu wa Kabiri taliki ya 25 Ukwakira 2022, u Rwanda rwakiriye Inama Mpuzamahanga yiga ku ikoranabuhanga rya telefoni, ibaye iya mbere ibereye muri Afurika ihuza abatumirwa basaga 2000 baturutse mu bihugu bitandukanye ku Isi.

Ku mugoroba wo ku wa Mbere, Perezida wa Repubulika y’u Rwanda Paul Kagame yaraye yakiriye ku meza bamwe mu bitabiriye iyo nama muri Kigali Convention Center, basangira ibya nimugoroba mu rwego rwo kubaha ikaze.

Mu bakiriwe mu birori byo kubaha ikaze harimo n’Umuyobozi Mukuru w’Ikigo Mpuzamahanga gishinzwe Itumanaho rya Telefoni (Global Ststem for Mobile Communications/ GSMA) Mats Granryd.

Biteganyijwe ko iyo nama iraza no guhuza abahagarariye ibigo birenga 400 bikora mu ruhererekane rw’itumanaho rya telefoni ifungurwa ku mugaragaro na Perezida Kagame, uza kugeza impanuro kuri abo batumirwa baturutse mu bice bitandukanye by’Isi.

Umuyobozi Mukuru wa GSMA Mats Granryd, avuga ko bashimishijwe no kuba Perezida Kagame ari we utangiza iyo nama kuri uyu wa Kabiri.

Yagize ati: “Ni iby’igiciro gikomeye kuba Nyakubahwa Perezida Paul Kagame ari we uzafungura inama yacu ya mbere yiga ku Isi ya Telefoni muri Afurika ibaye imbonankubone. Ubwitabire bwe bushimangira uruhare rw’ingenzi telefoni zikwiye kugira mu kuyobora iterambere ry’ubukungu n’uburumbuke ku mugabane w’Afurika wose.”

Yakomeje ahamya ko yiteguye kwitabira iyo nama izarangwa n’ibiganiro byisanzuye kandi bitanga umusaruro mu kurushaho kongera uruhare rwa telefoni mu iterambere, byitezwe kubera i Kigali. 

Iyo nama ihurije hamwe abantu bafite ubunararibonye butandukanye mu rwego rw’itumanaho rya telefoni, harimo n’abanyepolitiki baturutse muri Minisiteri z’ikoranabuhanga ku Isi, imiryango itegamiye kuri Leta, ibigo by’ubucuruzi n’iby’ubushakashatsi.

Ibereye mu Rwanda mu gihe ihuzanzira ryo guhamagara rya telefoni rigera kuri 99.9% by’abaturarwanda,na ho ihuzanzira ry’umuyoboro mugari wa internet rikaba riri ku kigero cya 97%.

U Rwanda ruri mu bihugu bitatu by’Afurika biza imbere mu kugira ihuzanzira rya internet rikora neza nk’uko bitangazwa n’Urwego rw’Igihugu rw’Iterambere, aho imijyi y’ingenzi irangwamo internet ya 4G.

Nanone kandi, iyi nama ibereye mu Rwanda mu gihe Leta ikomeje umushinga wo gukwiza telefoni zigezweho mu baturage, muri gahunda ya Connect Rwanda yatangijwe mu mwaka wa 2019 mu rwego rwo kwihutisha iterambere ry’ubukungu bushingiye ku ikoranabuhanga.

Amafoto yo ku Mugoroba wo ku wa Mbere yafashwe na Village Urugwiro

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA