Perezida Kagame ntarumva uko AI izambura abantu imirimo
Amakuru

Perezida Kagame ntarumva uko AI izambura abantu imirimo

NTAWITONDA JEAN CLAUDE

April 26, 2023

Mu byumweru bishize, ibitangazamakuru bitandukanye ku Isi byasamiye hejuru ubushakashatsi bwavugaga ku buryo ikoranabuhanga ry’ubwenge muntu butari karemano rizwi nka Artificial Intelligence (AI) rishobora kwambura abantu imirimo ihoraho irenga miliyoni 300, by’umwihariko ku Mugabane w’u Burayi n’Amerika.

Perezida wa Repubulika y’u Rwanda Paul Kagame, yavuze ko nubwo iyo ngingo yavuzweho cyane kugeza n’ubu hatarasobanuka uburyo iryo koranabuhanga rizatwara imirimo y’abantu kandi na ryo rikeneye gukoreshwa n’abantu kugira ngo ritange umusaruro. 

Perezida Kagame yabikomojeho mu ijambo yagejeje ku bitabiriye Inama ya 6 yiga ku Iterambere ry’Ikoranabuhanga ku mugabane w’Afurika (TAS2023), aho yashishikarije Abanyafurika gukorana ibakwe mu kwakira iryo koranabuhanga rya AI kuko rizazana ibisubizo birambye ku bibazo binyuranye byari byarababayeho akarande.

Ati: “Iri koranabuhanga rikomeye ryavuzweho byinshi mu byumweru bishize, ahanini ku mpamvu zumvikana. N’ubu ntibirasobanuka uko rizagira ingaruka ku mirimo ihari, n’ingaruka z’umutekano rizazana. 

Ariko byamaze kugaragara ko Afurika ifite byinshi izaryungukiraho kubera uburyo rigabanya ibyuho by’umusaruro hagati y’imirima y’Afurika ndetse n’abo duhanganye ku yindi migabane. Bityo dukwiye kwihutira kwakira ikoranabuhanga ry’ubwenge muntu butari karemano tukaryifashija mu kudukorera.”

Ubwo bushakashatsi bwakozwe na Banki y’Ishoramari yitwa Goldman Sachs bugaragaza ko nubwo iyo mirimo izigarurirwa n’ikoranabuhanga rya AI, ariko rizanagira uruhare mu kongera agaciro k’ibicuruzwa na serivisi ku kigero kiri hejuru ya 7%.

AI ni ikoranabuhanga ryitezweho guhindura byinshi ku Isi, kuko igihe rizaba rimaze kugera hose abantu batazongera kugorwa na buri kintu cyose batagaho umwanya munini bakoresha imbaraga zabo.

Perezida Kagame yashimangiye ko ikoranabuhanga ari ryo ritanga icyizere ku hazaza hazima h’Afurika, aboneraho no guhishura ko kuri ubu umubare munini w’akazi kagezweho gahangwa muri Afurika gashamikiye kuri ryo hamwe n’ihuzanzira rya internet. 

Perezida Kagame yagejeje ijambo ku bitabiriye Inama ya Transform Africa muri Zimbabwe

Ati: “Ibyo biragera no ku kazi kamenyerewe nka gakondo nk’ubuhinzi, ubucukuzi n’ubucuruzi. Ni ibintu bizarushaho kwihuta no kwiyongera.”

Ibyafasha Afurika kwitegura ahazaza horohejwe n’ikoranabuhanga 

Perezida Kagame yavuze ko kugira ngo ikoranabuhanga ribyare umusaruro wifuzwa muri Afurika ari uko yaba yageze ku bintu bine by’ingenzi.

Icya mbere yagaragaje ni uko buri wese agomba kuba afite ihuzanzira rya internet inyaruka kandi ihendutse, ndetse akaba afite telefoni cyangwa mudasobwa bigezweho (smart device).

Ati: “Internet inyaruka ikoreshwa kuri telefoni imaze iminsi ikwirakwizwa ku muvuduko wo hejuru, ariko hejuru ya 60% by’Abanyafurika igeraho ntibayikoresha. Dukwiye gukomeza kugabanya ibiciro.”

Icya kabiri, yavuze ko hakwiye kugabanywa ibyuho mu bumenyi n’ubuhanga mu bijyanye n’ikoranabuhanga, kuko imwe mu mpamvu nyamukuru Abanyafurika bataribyaza umusaruro ari uko badafite ubumenyi buhagije kuri ryo cyangwa se rikaba riri mu rurimi batumva. 

Icya gatatu, ni ukurinda amakuru bwite n’umutekano wo ku ikoranabuhanga na ho icya kane kikaba ukwihuza k’Umugabane w’Afurika binyuze mu Isoko Rusange ry’Afurika (AfCFTA), Ihuriro ryoroshya itumanaho ryambuka imipaka muri Afurika (One Africa Network) andi mahuriro. 

Yakomeje agira ati: “Dukwiye kugira amakuru yambuka imipaka y’ibiranga abantu n’ubucuruzi, mu gihe dukoresha ikoranabuhanga mu kugabanya imbogamizi ku bucuruzi.”

Perezida Kagame asanga Abanyafurika bafite ubushobozi bwo kugera kuri izo ngingo, akaba yabasabye kongera umuvuduko mu guharanira kugera ku ikoranabuhanga rigezweho ritanga ibisubizo ku bibazo bahura na byo mu buzima bwa buri munsi. 

Yashimiye Perezida wa Zimbabwe Emmersom Mnangagwa wateguye akaba yanakiriye Inama ya Transform Africa, Umuyobozi wa Smart Africa Lacina Koné n’abafatanyabikorwa batanze inkunga kugira ngo iyi nama ibashe guteranira i Victoria Falls hagati y’italiki ya 26 kugeza ku ya 28 Mata 2023. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA