Perezida Kagame yashimiye Ingabo z’u Rwanda zoherejwe muri Santarafurika
Amakuru

Perezida Kagame yashimiye Ingabo z’u Rwanda zoherejwe muri Santarafurika

Imvaho Nshya

October 25, 2023

Perezida wa Repubulika akaba n’Umugaba w’Ikirenga w’Ingabo z’u Rwanda (RDF) Paul Kagame, yohereje ubutumwa bwo gushimira abasirikare n’abapolisi bari mu butumwa bwo kugarura amahoro n’umutekano muri Repubulika ya Santarafurika ku bw’akazi gakomeye bakoze kandi bakomeje gukora.

Ni ubutumwa abasirikare n’abapolisi b’u Rwanda bashyikirijwe na Minisitiri w’Ububanyi n’Amahanga n’Ubutwererane Dr. Biruta Vincent, ubwo yabasuraga ku birindiro bikuru byabo biherereye Bangui ku wa Kabiri tariki ya 24 Ukwakira 2023.

Minisitiri Dr. Biruta yari aherekejwe n’Umunyamabanga Mukuru w’Urwego rw’Igihugu rushinzwe Iperereza n’Umutekano (NISS) Maj. Gen. Nzabamwita Joseph, n’Ambasaderi w’u Rwanda muri Repubulika ya Santarafurika Kayumba Olivier.

Abasirikare b’u Rwanda bakiriye ubwo butumwa ni aboherejwe mu butumwa bw’Umuryango w’Abibumbye (LONI) bwo kugarura amahoro muri Santarafurika (MINUSCA), ndetse n’aboherejwe n’Igihugu guhera mu mwaka wa 2020 hashingiwe ku masezerano y’ubufatanye bw’ibihugu byombi.

Perezida Kagame yavuze ko abo basore n’inkumi b’u Rwanda bakomeje gukora akazi gakomeye mu nshingano bafite zo kurinda abaturage b’icyo gihugu no guharanira ko umutekano ukomeza gusagamba.

Mu Mujyi wa Bangui nanone, Minisitiri Dr. Biruta ndetse na Maj. Gen. Nzabamwita banaboneyeho guhura n’Umugaba Mukuru wungirije w’Ingabo za Santarafurika ushinzwe igenamigambi Brig. Gen. Betibangui Arcadius, baganira ku ngingo zirimo ubutwererane bushingiye ku mahugurwa hagati ya RDF n’Ingabo za Santarafurika.

Guhera mu 2014 ni bwo Ingabo z’u Rwanda zatangiye koherezwa mu butumwa bwa Loni bwo ku garura amahoro n’umutekano muri icyo gihugu cyari cyibasiwe n’ingaruka zikomeye z’ubushyamirane bw’imitwe yitwaje intwaro, cyane cyane uwa Anti Balaka n’uwa Seleka.

Mu 2020 na bwo u Rwanda rwohereje muri icyo gihugu itsinda ry’Ingabo zihariye (Force Protection Troops) binyuze mu masezerano y’ubufatanye mu by’umutekano hagati y’ibihugu byombi, zikaba zari zigiye kunganira aboherejwe mu butumwa bwa Loni mu guhangana n’ibitero by’inyeshyamba zari zishyigikiye uwahoze ari Perezida François Bozize.

Umugambi w’izo nyeshyamba wari uwo kuburizamo amatora y’Abadepite n’ay’Umukuru w’Igihugu yabaye mu mpera za 2020, ariko Ingabo z’u Rwanda zikigerayo ibintu byarahindutse amatora akorwa mu mucyo no mu mutekano.

Kuri ubu u Rwanda rubonwa nk’umufatanyabikorwa ukomeye mu gufasha icyo gihugu guhagarara cyemye mu ruhando rw’ibihugu by’Afurika bikomeje kwiyubaka bihereye hasi.

Uretse ubufatanye mu bya gisirikare n’umutekano, u Rwanda rukomeje gufatanya na Santarafurika mu mishinga y’iterambere ibinyuze mu masezerano y’ubukungu n’ay’ubucuruzi ibihugu byombi byashyizeho umukono.

Mu bufatanye ibihugu byombi bifitanye harimo n’izo ngamba zo gushyigikira iterambere rya Santarafurika binyuze mu kunoza imitangire ya serivisi za Leta hifashishijwe ikoranabuhanga, kuvugurura imikorere y’Inzego z’umutekano no kwimakaza ishoramari.

Minisitiri Dr. Biruta yatanze ubutumwa bwa Perezida Kagame

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA