Perezida Kagame yashimiye Hongiriya yageneye u Rwanda miliyari 60 Frw
Amakuru

Perezida Kagame yashimiye Hongiriya yageneye u Rwanda miliyari 60 Frw

NTAWITONDA JEAN CLAUDE

July 16, 2023

Leta y’u Rwanda yongeye gushimira Hongiriya yemeye guha u Rwanda inguzanyo ya miliyari zirenga 60 z’amafaranga y’u Rwanda (miliyoni 52 z’amadolari y’Amerika), yo kuvugurura uruganda rw’amazi rwa Karenge.

Perezida wa Repubulika y’u Rwanda Paul Kagame, yashimiye Perezida wa Hongiriya Katalin Novà kuri iki Cyumweru taliki ya 16 Nyakanga ubwo bagiranaga ikiganiro n’abanyamakuru. 

Mu kwezi k’Ugushyingo 2021 ni bwo u Rwanda na Hongiriya (Hongrie) byashyize umukono ku masezerano y’inguzanyo ingana na miliyoni 52 z’amadolari y’Amerika azakoreshwa mu mushinga wo gukwirakwiza amazi meza mu Mujyi wa Kigali no mu duce tuwegereye binyuze mu kwagura uruganda rw’amazi rwa Karenge.

Byari biteganyijwe ko iyo nkunga yagombaga gutuma uruganda rwa Karenge ruva ku bushobozi bwo gutunganya  metero kibe 15,000 ku munsi rukagera ku bushobozi bwo gutunganya metero kibe 48,000 ku munsi. 

Perezida Kagame yagize ati: “Turashima inkunga yatanzwe na Hongiriya yo kuvugurura uruganda rw’amazi rwa Karenge.”

Yakomeje ashimangira ko u Rwanda na Hongiriya bigiye gufatanya mu gukoresha neza ingufu za nikeleyeri, nyuma y’amasezerano yashyizweho umukono uyu munsi. 

Perezida Kagame yaboneyeho kugaragaza ko u Rwanda na Hongiriya bisangiye icyerekezo cyo guhangira imirimo urubyiruko no kubakira ubucuruzi ikirere gitekanye. 

Yavuze ko binyuze mu masezerano yashyizweho umukono n’impande zombi uyu munsi, u Rwanda na Hongiriya byongeye kwiyemeza kubakira kuri icyo cyerekezo bisangiye mu guhanga amahirwe agirira akamaro abaturage n’ibihugu byombi.

Perezida Katalin Novák yashimye uko yakiriwe mu Rwanda by’umwihariko agaragaza umunezero yatewe n’amakuru Perezida Kagame yahishuye yo gufungura Ambasade i Budapest, mu Murwa Mukuru wa Hongiriya. 

Ku gicamunsi cyo kuri iki Cyumweru nanone, Perezida Katalin Novák yasuye Urwibutso rwa Jenoside rwa Kigali, yunamira inzirakarengane zishwe muri Jenoside yakorewe Abatutsi mu 1994. 

Kuri uyu mugoroba, Perezida Kagame yamwakiriye ku meza hamwe n’itsinda bari kumwe, mu kwishimira umubano w’ibihugu byombi. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA