Perezida Kagame yirukanye Gen. Muganga na Gen Mutiganda muri RDF
Amakuru

Perezida Kagame yirukanye Gen. Muganga na Gen Mutiganda muri RDF

NTAWITONDA JEAN CLAUDE

June 7, 2023

Perezida wa Repubulika akaba n’Umugaba w’Ikirenga w’Ingabo z’u Rwanda Paul Kagame, yirukanye muri RDF Abajenerali babiri kubera ibyaha bakoze cyangwa imyitwarire mibi itajyanye n’umwuga wa gisirikare. 

Abo bajenerali birukanywe burundu mu gisirikare ni Maj. Gen. Aloys Muganga na Brig. Gen. Francis Mutiganda, birukanywe hamwe n’abandi bofisiye 14. 

Itangazo ryashyizwe hanze na Minisiteri y’Ingabo rivuga ko birukanywe ryasohotse kuri uyu wa Gatatu taliki ya 7 Kamena 2023.

Iryo tangazo riragira riti: “Nyakubahwa Perezida wa Repubulika y’u Rwanda akaba n’Umugaba w’Ikirenga wa RDF, yirukanye Maj. Gen. Aloys Muganga, Brig. Gen. Francis Mutigana n’abandi bofisiye 14. 

Yanemeje kandi iyirukanwa ry’abandi basirikare 116 bafite amapeti atandukanye anemeza ihagarikwa ry’amasezerabo y’akazi ku bandi 112.”

Icyemezo cyo kwirukanwa no guhagarikwa mu nshingano cyahise cyubahiriza kikimara gutangazwa. 

Umuvugizi w’Ingabo z’u Rwanda Brig. Gen. Ronald Rwivanga, yavuze ko abasirikare birukanywe n’abahagarikiwe akazi bazize amakosa akomeye bakoreye mu kazi ku buryo hari n’abazakurikiranwa n’inkiko.

Maj. Gen. Muganga yabaye Umugaba w’Agateganyo w’Inkeragutabara mu 2018, mu mwaka wakurikiyeho agirwa Umuyobozi w’Ishami rya Gisirikare rikoresha imodoka z’intambara (Mechanized Division). 

Ku rundi ruhande, Brig. Gen. Mutiganda yabaye Umuyobozi w’Ishami rishinzwe Umutekano wo hanze y’Igihugu mu Rwego rw’Igihugu rushinzwe Ubutasi n’Umutekano (NISS) kugeza mu kwezi k’Ukwakira 2018 ubwo yasubizwaga ku Birindiro Bikuru bya RDF.

Itegeko Nomero 38/2015 ryo mu 2015 rirebana no kumanura mu ntera, gukura mu nshingano, gusubiza mu buzima busanzwe no kwirukana muri RDF, riteganya ko abasorikare bakuru cyangwa abato bashobora kwirukanwa mu nshingano bitewe n’imyitwarire mibi. 

Iyirukanwa ry’abo Bajenerali n’abandi basirikare batandukanye bibaye nyuma y’aho Perezida Kagame, akoze impinduka zikomeye mu buyobozi bw’Ingabo z’u Rwanda. 

Juvénal Marizamunda yagizwe Minisitiri w’Ingabo,asimbura Maj. Gen. Albert Murasira, na ho Lt. Gen. Mubarakh Muganga agirwa Umugaba Mukuru asimbuye Gen. Jean-Bosco Kazura. 

TANGA IGITECYEREZO

  • Ntare Adarberth
    June 7, 2023 at 8:36 am Musubize

    Kuvugurura noguhana abakoze amakosa nibimwe mubintu biranga umuyobozi ukunda igihugu.Ndashimira Perezida wa Republika kuba akomeje kuvugurura nigisirikare hamwe nizindi nzego nkuru zigihugu.Turabizi ko igisirikare gifite uruhare runini mukubaka igihugu…..imikorere nimitwarire yabasirikare igomba gutanga urugero muri society nyarwanda.

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA