Prof. Malonga arasaba ishoramari mu iterambere ry’Igiswahili mu Rwanda
Amakuru

Prof. Malonga arasaba ishoramari mu iterambere ry’Igiswahili mu Rwanda

NTAWITONDA JEAN CLAUDE

July 16, 2023

Prof. Pacifique Malonga, umwanditsi, umunyamakuru wigenga n’impirimbanyi mu guteza imbere ururimi rw’Igiswahili ku Mugabane w’Afurika, yatangaje ko yifuza kubona abashoramari bafata urwo rurimi nk’amahirwe akomeye y’ishoramari mu Rwanda. 

Ni mu gihe urwo rurimi rukomeje gutezwa  imbere ku mugabane w’Afurika nk’urwa mbere ruzagira uruhare rukomeye mu guhuza Abanyafurika, rukaba rutanga amahirwe y’ishoramari atangaje mu ishyirwa mu bikorwa ry’Isoko Rusange ry’Afurika (AfCFTA). 

Igiswahili ni ururimi bivugwa ko rukomoka muri Afurika y’Iburasirazuba n’iyo hagati. Umuryango w’Afurika Yunze Ubumwe (AU) usanga kuruteza imbere ku mugabane byakoroshya ukwihuza kw’Uturere n’Umugabane muri rusange kuko ari rwo rurimi gakondo rwabaye mpuzamahanga rufitanye isano ya bugufi n’Indimi nyinshi z’Abanyafurika. 

Mu kwimakaza iterambere ry’urwo rurimi, AU yashizeho Politiki zirushyigikira ndetse hasinywa n’amasezerano atandukanye yo kurushyira muri gahunda z’uburezi ku Mugabane w’Afurika wose. 

Prof. Malonga yagaragaje impamvu ari ingenzi gushora imari mu kwimakaza Igiswahili, ashimangira ko urwo rurimi rushobora gutanga umusanzu ukomeye mu kwihuza kw’Afurika nk’umusingi w’amahoro, ubworoherane no gukumira amakibirane mu bihugu bigize uyu Mugabane. 

Yagize ati: “Gushyigikira ishyirwaho n’ishyirwa mu bikorwa rya Politiki zigenga imikorere n’imikoreshereze y’Igiswahili n’izindi ndimi mu Rwanda, by’umwihariko ku Giswahili cyamaze kwemezwa nk’ururimi rukoreshwa mu kazi muri AU, ni ingenzi cyane gushora imari mu kurwimakaza, kuruteza imbere no kurukoresha mu Rwanda.”

Prof. Malonga akomeza avuga ko Minisiteri ifite mu nshingano iterambere ry’indimi n’umuco ikwiye gusuzuma ibibazo byose bibangamira iterambere ry’indimi z’Afurika cyane cyane Igiswahili n’Ikinyarwanda, ari na ko ishyiraho gahunda yo gukurikirana uburyo izo ndimi zarushaho kwaguka zambukiranya imipaka. 

Yakomeje agira ati: “Guhererekanya amakuru n’ibitekerezo hagati y’Abanyarwanda, inzego bireba n’abafatanyabikorwa baharanira iyo ntego, bikwiye guhabwa agaciro gakomeye kandi bigakurikiranwa mu bwitonzi.”

Asaba kandi ko hakorwa ubukangurambaga no gukwirakwiza amakuru arebana n’inyungu cyangwa amahirwe yo kumenya no gukoresha Igiswahili mu Rwanda, mu Karere no ku yindi migabane. 

Yasabye kandi gushyiraho Inama yihariye ishinzwe gukurikirana ishyirwa mu bikorwa ry’iterambere ry’Igiswahili, kurihuza n’irigezweho mu bindi bihugu no gushyigikira iyandikwa ry’ibitabo cyangwa izindi mfashanyigisho n’integanyanyigisho.  

Yanagaragaje kandi agaciro ntagereranywa k’abahanga mu rurimi rw’Igishwahili bo mu Rwanda, kuko ari bo bafasha kumenya ibikenewe bijyanye n’ibyifuzo by’Abanyarwanda ndetse n’Abanyafurika. 

Yifuza ko mu Rwanda hashyirwaho gahunda ihamye y’imikoreshereze y’Igiswahili nk’uko bimeze mu bindi bihugu bihuriye mu Muryango w’Afurika y’Iburasirazuba (EAC). 

Ati: “Guverinoma y’u Rwanda ikwiye guhagararirwa mu nzego zose zishinzwe kwimakaza Igiswahili zo mu Karere no ku Mugabane, nka “Hakama” yagize uruhare mu ishyurwaho ryayo, kandi igashyira imbaraga nyinshi mu gukoresha amahirwe n’ubushobozi bihari.”

AU yemeje Igiswahili nk’ururimi rwemewe gukoreshwa mu kazi

Hakenewe indangamuntu na Pasiporo y’Igiswahili bihuza EAC

Prof Malonga asanga Umuryango w’Afurika y’Iburasirazuna (EAC) ukeneye kugira Indangamuntu na Pasiporo bihuriweho, kandi ngo Igiswahili ni rwo rurimi rworoheye abaturage bo mu Karere rushobora gukorwamo ibyo byangombwa. 

Yavuze kandi ko bigoye kubona iterambere rihamye ry’ubucuruzi mu Karere mu gihe Igiswahili cyaba cyirengagijwe, cyane ko ari ururimi rukoreshwa na benshi kuva muri Repubulika Iharanira Demokarasi ya Congo (RDC), mu bice bimwe na bimwe bya Uganda, mu Rwanda, mu Burundi, Kenya, Sudani y’Epfo na Tanzania. 

By’umwihariko ku Rwanda nk’Igihugu kidakora ku nyanja, rukeneye gufungura ubucuruzi mu bihugu by’abaturanyi, aho Igiswahili cyaba ikiraro gikomeye mu guhererekanya amakuru no kubaka umubano ukomeye mu baturanyi. 

Prof.Malonga ati: “Mu Kinyarwanda baravuga bati ‘Agafuni kabagara ubucuti ni akarenge, urujya n’uruza mu Karere ni ingenzi cyane mu kubaka ubushuti n’ukwihuza kuramba bishimangira ubufatanye n’itumanaho.”

Kwimakaza ikoreshwa ry’Igiswahili mu Rwanda bisobanuye gushyigikira ubutwererane n’ubufatanye hagati y’ibihugu by’Afurika bihuriye ku ndimi z’aba Bantu n’Igiswahili kirimo.

Asaba Guverinoma y’u Rwanda n’Inzego zose z’uburezi gutegura ibihembo bigenerwa imiryango n’abantu ku giti cyabo bitanga umusanzu ukomeye mu kwimakaza Igiswahili n’Ikinyarwanda, atari ku rwego rw’Igihugu gusa ahubwo bigakorwa no ku rwego rw’Akarere n’Afurika muri rusange. 

Afite icyizere ko Abanyafurika nibafatanya bazagera ku ntego yo kugeza Igiswahili n’izindi ndimi gakondo ku rwego rw’Isi yose. Ati: “Nk’uko Perezida wa Repubulika Paul Kagame adahwema kubivuga, ‘Sisi si migomba mifupi’, (Ntabwo turi insina ngufi). Turashoboye rwose. Ahari ubushake haba ugushobora.”

TANGA IGITECYEREZO

  • Jean de Dieu TURINIMANA
    July 20, 2023 at 6:44 pm Musubize

    Ni ukuri ibintu Prof. Malonga avuga ni ukuri pe,igiswahili nigitezwe imbere kandi bitewe n’uko ari ururimi rw’ababantu rworohera abanyarwanda kurusha izindi ndimi bityo kugirana ubutwererane n’abaturanyi byatworohera cyane. Yewe mbona Malonga yaragize uruhare rukomeye mu guteza imbere igiswahili mu Rwanda inzego zifite indimi mu nshingano zikwiye kumutera ingabo mu bitugu mu buryo bwose kuko yagaragaje ubushake n’ubuhanga bwinshi. Ndamwibuka kuri za Televiziyo yigisha igiswahili ku buryo hari benshi bavuga igiswahili neza kubera mzehe Malonga.
    Malonga komereza aho mbona bizageraho bigakunda kuko na AU yamaze kubona ko igiswahili cyagira akamaro kanini

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA