Qatar yifurije ishya n’ihirwe Umugaba Mukuru w’Ingabo z’u Rwanda
Amakuru

Qatar yifurije ishya n’ihirwe Umugaba Mukuru w’Ingabo z’u Rwanda

NTAWITONDA JEAN CLAUDE

June 18, 2023

Intumwa za Qatar zasuye Umugaba Mukuru w’Ingabo z’u Rwanda Lt Gen Mubarakh Muganga, ziboneraho kumwifuriza ishya n’ihirwe mu mirimo ye mishya yatangiye.

Izo ntumwa ni Ambasaderi wa Qatar mu Rwanda Misfer bin Faisal Al-Shahwani na Lt. Col. Ali bin Mohammad Al Safran uhagarariye inyungu za gisirikare za Qatar mu Rwanda. 

Ku ruhande rw’u Rwanda, Umugaba Mukuru wa RDF Lt. Gen. Mubarakh Muganga yari agaragiwe na Gen Patrick Karuretwa, Umuyobozi w’Ishami rishinzwe Ubutwererane Mpuzamahanga mu bya Gisirikare. 

U Rwanda na Qatar bikomeje kwishimira umusaruro w’umubano mwiza mu nzego zitandukanye zirimo n’ubufatanye mu bya gisirikare. 

Muri Werurwe 2022, u Rwanda na Qatar byasinyanye amasezerano y’ubutwererane mu bya gisirikare ashimangira umubano ibihugu bikomeje gusigasira mu nzego zitandukanye.

Ayo masezerano yashyiriweho gutangiza uburyo bwumvikanyweho bw’imikoranire mu bya gisirikare no kubungabunga amahoro n’umutekano mu bihugu byombi ndetse no mu Karere buri gihugu kibarizwamo.

Intumwa za Qatar zifurije ishya n’ihirwe Lt. Gen. Mubarakh Muganga nyuma y’aho ku wa 5 Kamena ari bwo Perezida wa Repubulika y’u Rwanda akaba n’Umugaba w’Ikirenga wa RDF Paul Kagame yamugize Umugaba Mukuru. 

Icyo gihe hakozwe impinduka zikomeye mu buyobozi bukuru bw’Ingabo z’u Rwanda,  ndetse hanashyirwaho Minisitiri w’Ingabo mushya, ari we Juvénal Marizamunda. 

Lt. Gen. Muganga afite imyaka 56 y’amavuko, akaba amaze mu gisirikare imyaka irenga 30.

Ni impuguke mu buyobozi aho afite impamyabumenyi y’icyiciro cya Kabiri cya Kaminuza mu bijyanye n’Ubuyobozi (Public Administration), bivuze ko afite ubuhanga mu miyoborere iharanira impinduka nziza n’iterambere. 

Nanone kandi yize n’andi masomo ajyanye n’imiyoborere arimo irirebana n’Ubumenyi bwo Kuyobora yigiye muri Kaminuza ya Gisirikare ya Tsinghua mu Bushinwa, n’andi yihariye kuri Afurika yigiye mu Ishuri Rikuru rya Gisirikare rya Nasser, High War College-Cairo, mu Misiri (Egypt).

Lt. Gen. Muganga yakurikiranye amahugurwa mpuzamahanga atandukanye ya gisirikare arimo aya gisirikare no gutegura intambara muri Kaminuza ya Gisirikare y’Igihugu cy’u Bushinwa, n’amahugurwa ajyanye no gushyigikira ibikorwa byo kubungabunga amahoro yakurikiraniye mu Kigo cy’Amahugurwa ashyigikira Amahoro cyo muri Kenya.

Mu mwaka wa 2006, Lt. Gen. Muganga yahuguwe no ku kuyobora ingabo mu gihugu kigendera kuri demokarasi, isomo yakurikiraniye mu Kigo cy’Amahugurwa ashyigikira Amahoro cyo muri Kenya. 

Mu 2005 na bwo yakurikiranye amahugurwa agenerwa Abagaba b’Ingabo yakurikiraniye i Lusaka muri Zambia. 

Mu busore bwe, ahayinga mu mwaka wa 1988-1989, ni bwo yasoje amasomo ya gisirikare mu mahugurwa yaherewe i Jinja muri Uganda.

Lt. Gen. Muganga yayoboye inzego zinyuranye mu Ngabo z’u Rwanda muri icyo gihe gisaga imyaka 30 y’ubunararibonye mu bya gisirikare. 

Hagati y’umwaka wa 2008 na 2012, yabaye Umuyobozi wa  Diviziyo ya Kane, na ho hagati ya 2013 na 2015 ayobora Diviziyo ya Gatatu.

Hagati y’umwaka wa 2016 n’uwa 2021, Lt. Gen. Muganga yari Umuyobozi wa Diviziyo ya Mbere akaba n’umwe mu bagize Inama y’Ubutegetsi y’Isoko ry’Inzego z’Umutekano (AFOS).

Uyu mugabo yahawe ibihembo n’imidali bitandukanye harimo umudali wo kubohora Igihugu, uwo kurwanya Jenoside, uw’ububanyi n’amahanga impeta y’indwanyi ku rugamba n’ibindi. 

TANGA IGITECYEREZO

  • Minani
    June 18, 2023 at 11:02 am Musubize

    Iyo mbonye ibigwi bye nibaza icyomaze muriki gihugu nkumva ndihebye rwose

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA