RDF ntibereyeho gushoza intambara – Perezida Kagame
Amakuru

RDF ntibereyeho gushoza intambara – Perezida Kagame

Imvaho Nshya

August 18, 2023

Perezida wa Repubulika Paul Kagame akaba n’Umugaba w’Ikirenga w’Ingabo z’u Rwanda, yabwiye Ingabo z’u Rwanda ko Igisirikare cy’u Rwanda RDF kidashinzwe gushoza intambara, ahubwo ko akazi kacyo ari uguharanira amahoro.

Ni ubutumwa yagejeje ku ngabo ubwo yakurikiranaga imyitozo yo kumasha y’ingabo z’u Rwanda yabereye mu kigo gitangirwamo amasomo ya gisirikare i Gabiro kuri uyu wa Kane tariki ya 17 Kanama 2023, izwi ku izina rya Exercise Hard Punch 04/2023.

Yagize ati: “RDF ntabwo ibereyeho gushoza intambara ahubwo ibereyeho kwirinda, kurinda amahoro hano iwacu n’ahandi mwagiye mujya byagaragaye mutabaye benshi dufite ibyo duhuriraho nk’Abanyafurika cyangwa inshuti ziba zatwitabaje”.

Umukuru w’Igihugu yakomeje asobanura ko kuzuza inshingano babifashwamo no kurangwa n’ikinyabupfura.
Ati: “Disipulini (Ikinyabupfura) ni urufunguzo rudufasha kugera ku ntego mu nshingano dukora zose. Disipulini ituma na ya mikoro tudafite mu buryo buhagije ajya aha ngombwa ntiyangirike, amikoro ajya ahangombwa ntiyangirike.

Disipulini rero nayo ntabwo ihagije ariko ni yo twubakiraho; hari ukumenya, hari ukwiga bizamura bwa bushobozi, kuko ushobora kugira disipulini, waba udafite ubumenyi, udafite kwiga, udafite amahugurwa, iyo disipulini ubwayo gusa utubakiyeho ntaho ikugeza.”

Perezida Kagame yakomeje avuga ko kandi iyo disipulini itagarukira ku kurinda amahoro, ahubwo ijyana no kubaka igihugu.

Ati: “Ndabanza mpere ku myumvire n’umwuga nka RDF, ntabwo turinda igihugu gusa, twaranacyubatse turacyubaka n’ubu turacyakomeza kucyubaka.”

Iyo myitozo iba ikomatanyije igahuza ingabo zirwanira mu kirere no ku butaka ndetse n’ingabo zidasanzwe (Special Force), iba igamije gukarishya ubushobozi bwabo, bakamenya uko bitwara ku rugamba, uko ibyiciro by’ingabo bifatanya mu gihe cy’urugamba n’ibindi.

Iyi myitozo yari yitabiriwe n’abandi bayobozi bakuru nk’Umugaba Mukuru w’Ingabo z’u Rwanda, Lieutenant General Mubarakh Muganga, Minisitiri w’Ingabo Juvenal Marizamunda n’abandi bayobozi.

Yanditswe na NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA