Ruhango: Birinda Malariya mu ngo ikabazonga bayisanze mu gishanga
Amakuru

Ruhango: Birinda Malariya mu ngo ikabazonga bayisanze mu gishanga

Imvaho Nshya

September 29, 2023

Abahinzi b’umuceri mu gishanga cya Nyakiyange giherereye mu Kagari ka Nyamagana mu Karere ka Ruhango, barataka kuba bazongwa na Malariya bandurira mu gishanga mu gihe ntacyo baba batakoze ngo bayirinde mu ngo zabo barara mu nzitiramibu ziteye imiti, basiba ibinogo no gutema ibihuru.

Abenshi muri abo baturage banavuga ko batererwa imiti mu ngo zabo, ariko bakaba bahora barwaragurika, bagakeka ko bandurira mu gishanga bahingamo umuceri  bityo bamwe bakaba baratangiye no gutanga imirima yabo ngo ihingwe n’abandi kuko Malariya yabazahaje.

Ntambabazi Zacharie avuga ko adashobora kumara amezi atatu atarwaye Malariya, akavuga ko bimugora kwemeza ko yandurira iwe mu rugo kuko aba yagerageje kubahiriza amabwiriza yo kwirinda kurumwa n’umubu mu rugo.

Yagize ati: “Ni byo Malariya turayifite kuko ntabwo nshobora kumara amezi atatu ntayirwaye kandi ngerageza kwitwararika mu rugo aho ntuye mfunga amadirishya ku gihe kandi sinturanye n’ibihuru, kandi ndara mu nzitiramibu ikoranywe umuti.”

Murekatete Claudine wo mu Mudugudu wa Bumbogo, Akagari ka Nyamagana, na we avuga ko hari abaturage bamaze kwihera imirima abandi kuko imiryango yabo yazengerejwe n’indwara ya Malariya.

Yagize ati: Dufite bamwe muri twebwe rwose bakora ubuhinzi ariko bakabukora nabi kubera ko bakunze kuzengerezwa n’uburwayi bwa Malariya. Gusa hari n’abandi bashobora kuva mu gishanga kuko ni ho habatera ikibazo kuko bahaza ari bazima bagataha bamaze gucika intege ahubwo baduhe imiti yo kwica amagi y’imibu ihororokera”.

Mu kiganiro n’Imvaho Nshya mu Ntara y’Amajyepfo bavuga ko ubumenyi buke butuma batabasha kumenya uko barandura imibu itera Malariya haba mu ngo no mu gishanga.

Perezida wa Koperative Gakumba Ananias avuga ko benshi mu bahinzi b’umuceri badafite ubumenyi buhagije ku ndwara ya Malariya.

Akomeza avuga ko mu nama bakora basanzwe bibutsa abahinzi kwirinda indwara zaba izandura n’izitandura ariko akaba yifuza ko abahinzi basobanurirwa biruseho uko bahangana n’imibu yororokera mu gishanga ikabatera uburwayi.

Umukozi w’Ihuriro ry’Imiryango itari iya Leta ishinzwe guteza imbere ubuzima no guharanira uburenganzira bwa muntu mu Ntara y’Amajyepfo Thierry Serugaba, avuga ko ubumenyi mu bagize ibyiciro bifite ibyago byo kwandura Malariya bukeneye kongerwa.

Yavuze kandi ko batangiye  guhugura abagize byiciro birimo n’abakora ubuhinzi mu bishanga kugira ngo birinde ko Malariya yakomeza kubakomerana.

Serugaba yemeza ko ibi byiciro biramutse byumvise uruhare rwabo mu kwirinda Malariya byatuma ikigero cy’abayirwara kigabanyuka kuko bazaba barakurikije ingamba zo kwirinda Malariya.

Dr Mbituyumuremyi Aimable, Umuyobozi w’Ishami rishinzwe kurwanya Malariya n’izindi ndwara zititaweho uko bikwiye mu Kigo cy’Igihugu cy’Ubuzima (RBC), avuga ko gahunda ya mbere igomba kujyana n’inyigisho bakamenya uko imibu yororoka n’aho yororokera ndetse no kuba bamenya aho amagi yayo ari mu bishanga bakoreramo.

Akomeza avuga ko abahinzi bakwiye kwigishwa kurwanya imibu no mu bwororokero bwayo bareka amazi aba mu muceri agatemba bakayasimbuza andi kugira ngo amagi yatewemo n’imibu adakura.

Yanavuze kandi ko abo bahinzi bakwigishwa no korora amafi mato arya imibu muri ayo mazi yo mu muceri, cyangwa bagahabwa imiti yica ayo magi cyangwa iyo bisiga mu gihe bari mu gishanga ku buryo imibu itabaruma bari mu kazi.

Yibutsa ko hari ubundi buryo bwakoreshwa nko kwigisha bamwe muri bo uko bapima bakanavura Malariya kugira ngo babashe kwivuza hakiri kare itarabazahaza.

Abantu bari mu byiciro bishobora kwibasirwa na Malariya barasabwa kwitwararika no gukuraho ibintu byose byakororokeramo imibu kugira ngo hagabanywe ibyago byinshi byo kwandura Malariya kandi imibu iyitera ntabwo irashiraho.

Ntambabazi Zacharie avuga ko adashobora kumara amezi atatu atarwaye Malariya

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA