Rusizi: Abari bazengerejwe n’isuri bakiriye neza  amaterasi y’indinganire
Amakuru

Rusizi: Abari bazengerejwe n’isuri bakiriye neza amaterasi y’indinganire

Imvaho Nshya

September 17, 2023

Abaturage b’Imirenge ya Gashonga, Rwimbogo, Nzahaha, Gikundamvura, Nkungu na Nyakabuye mu Karere ka Rusizi, bibasirwaga n’isuri yatwaraga ubutaka n’imyaka yabo ikajya mu kibaya cya Bugarama, barashimira Perezida wa Repubulika y’u Rwanda Paul Kagame nyuma y’uko bakorewe hegitari zirenga 100 z’amaterasi y’indinganire.

Abo baturage bavuga ko nyuma y’imyaka myinshi bahinga bagasa n’abahingiye ubusa kubera isuri yakunkumukanaga ubutaka bwabo iburoha mu migezi yabujyanaga kwangiza ikibaya cy’umuceri cya Bugarama, kuri ubu bizeye guhinga bakeza muri iki gihembwe cy’ihinga gitangiye.

Ni igikorwa bakorewe n’Umushinga uteza imbere ubuhinzi n’ubworozi bugamije ubucuruzi (CDAT), ukorera mu Kigo cy’Igihugu gishinzwe guteza imbere ubuhinzi n’ubworozi (RAB), waje ugamije guhashya isuri yangiza ikibaya cy’umuceri cya Bugarama.

Igakumirwa ihereye ku ntangiriro yayo, mu misozi ihanamye y’imirenge igikikije, imanurira ubutaka bwose mu migezi ya Njambwe, Gatabuvuga, Nyagataka, Cyagara na Rungunga bukagera kibaya cya Bugarama, ikangiza inzu n’imirima y’abaturage irimo n’iyi y’umuceri.

Hakizayezu Valens wo mu Kagari ka Karemereye, Umurenge wa Gashonga, umwe mu bagezweho n’aya mahirwe, avuga ko bagiye kuyabyaza umusaruro ufatika, kuko ngo ari ubwa mbere bagiye guhinga bafite icyizere ko nta mvura izagwa ngo ibatwarire ubutaka, ibateze isuri baruhire ubusa.

Ati: “Aya mahirwe akomeye duhawe n’Umukuru w’Igihugu cyacu tugomba kuyabyaza umusaruro. Uyu ni umushinga w’ingirakamaro cyane kuko twari twarabuze icyo dukora n’icyo tureka, nta gafumbire washyiramo wanga ko kazagenda, ariko ubu tugiye kongera ibikorwa by’ubuhinzi n’ubworozi, nkizeza ko nzakuba inshuro zirenga 3 umusaruro nanjyaga mbona kuko ibyinshi ari ibyigenderaga ngasarura udusigaye.”

Nzayisenga Xavier, Umuhuzabikorwa w’uyu mushinga mu Turere twa Rusizi na Nyamasheke, yavuze ko mu mezi 7 ashize bamaze amaterasi y’indinganire ku buso burenga hegitari zirenga 100.

Abaturage bizeye ko ubutaka bwabo butazongera kuruhukira mu Kibaya cya Bugarama

Avuga ko uretse iyi Mirenge, indi ine irimo uwa Muganza, Gitambi, Bugarama na Butare, bagombaga kuhakora imirwanyasuri kuri hegitari 1950, ariko bimaze kugaragara ko amaterasi atanga umusaruro cyane, akanongera ubutaka  kurusha imirwanyasuri, iriya mirwanyasuri  izavujwamo amaterasi.

Akomeza ahaya ko bagera kuri iriya misozi ihanamye basanze ubutaka bwaragundutse kubera isuri yabutwaraga buri mwaka n’ubusigaye bwarashaririye nta musaruro ugaragara butanga, abaturage bakaba batarashoboraga kwihaza mu biribwa kandi bahorana imvune bahinga.

Ati: “Nyuma yo kubutunganya rero nubwo tutavuga ko twarangije neza; ku bufatanye na ba nyirabwo, turateganya kubuhingamo ibigori muri iki gihembwe cy’ihinga, bitabujije ariko ko n’umuturage washyira igishyimbo iruhande rw’icyo kigori byazamukana; cyane ko tunagiye kubaha ifumbire y’imborera ihagije bazashyiramo tukizera tudashidikanya kubona umusaruro wikubye inshuro zirenze 3 uwari usanzwe uboneka.”

Yizeza ko akurikije uburyo ayo materasi yakozwe mu buhanga buhanitse, nafatwa neza ikibazo cy’isuri yabakeneshaga kigiye kuba amateka. Ku mikingo y’amaterasi baca ngo bazahatera urubingo rwiza rwa kijyambere aborozi bazabone ubwatsi bw’amatungo yabo.

Avuga ko ibyo byose abaturage babikorerwa ku buntu kuko uyu mushinga ari uw’abaturage, muri gahunda za Guverinoma  y’u Rwanda irangajwe imbere na Perezida wa Repubulika, zo kugeza iterambere n’imibereho myiza ku Banyarwanda bose.

Byari biteganyijwe uwo mushinga ko uzamara imyaka 5 muri aka Karere, ukaba ariko ngo waratangiye ukererewe, usigaje imyaka 4, icyakora ko hari amahirwe ko uwo mwaka bakererewe bawongeraho.

Uretse kurwanya isuri kuri iyi misozi no gutunganya ikibaya cya Bugarama, hakazakorwa n’ibindi bifasha abaturage birimo guteza imbere imishinga y’abaturage y’ubuhinzi n’ubworozi, bahabwa inguzanyo binyuze muri Banki y’u Rwanda y’Amajyambere (BRD).

Byari biteganijwe ko uwo mushinga uzakora amaterasi ku buso bwa hegitari 210 n’imirwanyasuri kuri hegitari 1950 mu mirenge 10, bikaba bishobora guhinduka hagakorwa hegitari zirenga 300 z’amaterasi, imirwanyasuri igasigara gusa aho bari barayikoze mu Murenge wa Nzahaha, indi ikazakorwa n’imiganda y’abaturage.

Munyemanzi Ndagijimana Louis, Umuyobozi wunhirije w’Akarere ka Rusizi ushinzwe iterambere ry’ubukungu, na we yemeza ko ari umushiga uzasigira Akarere ibifatika mu kongera umusaruro muri iriya Mirenge yari yaribasiwe n’isuri.

Asaba abaturage gufatiraho bakabyaza umusaruro wose ushoboka aya mahirwe babonye nk’igihamya cy’imiyoborere myiza y’Igihugu ishyira umuturage ku isonga.

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA